1 Nenga na Petili nantumilwe wa Yesu Kilisitu, nimwandikyanga mwenga mwamusaulilwe na Tati' Nnu'ngu', mwenga mwamutalukine no tama kati mwaalungulungu akwo Ponto, Galatia, Kapadokia, Asia na Bisinia. 2 Tati' Nnu'ngu' bansawi mwenga bu'ka kwai'mbu' kwo binia kwabe, na mupangilwe mwaapeleteu na Loo mupate kunnyu'wa Yesu Kilisitu no peleteyelwa kwa myai yake.

Ninnu'byanga ngu'ngu' na amani yambone.

3 Alumbilwe Nnu'ngu' na Tati' ba Bwana witu Yesu Kilisitu! Kwa kiya sake kiku'lu' aatupangite tubelekwe mala yenebi'li' kwa kunnyu'ya Yesu bu'ka kwa awi'li na kutuyalya liu'bi'lyo lyene ukoto. 4 Nambi'yambi', tupi'kanilya lisi balaka yaibi'kilwe na Nnu'ngu' kunani kwa bandu bake. Balaka yo iwesali bola, alabika wala umala. 5 Nnu'ngu' atumya makakala gake maku'lu' li'nga kunni'ndi'la mwenga kwa mwanjaa mumwu'bi'lya Yesu Kilisitu. Aalu'a yendelya kunni'ndi'la mpaka ukosopoli pawalu'a umukulwa masu'ba ga kuundi'la. 6 Ali' limpanga mupulaike muno, ata ikapangite kwa masu'ba masene mwendausunika kwa kitumbu so auyilwa na ngu'su'mbu' mbali'mbali'. 7 Mapayilwo go gaipaya imani yinu ibonekane panga ya kakape. Pamope no panga zaabu kikowe sakialabika, lakini ipeleteyelwa kwo yoselwa pamwoto. Nyinyonyo na imani yitu yaibile na samani kulikoni zaabu, ipalikwa ipayilwe li'nga panga ya kakape. Na kwa kitumbu so, mwalu'a pata sipwa, utukupu na isima palu' paapitya Yesu Kilisitu. 8 Ywembe mwendakumpenda pamope no panga munammonali, ata nambi'yambi' mummonali lakini mwendakumwu'bi'lya no pulaika muno kwa pulaa yangali longeleka na yene utukupu, 9 kwa mwanjaa, muupokya ukosopoli wa loo yinu, na amo nga mwaili'nga imani yinu.

10 Alondoli ba Nnu'ngu' baatipekeseni no lokikiya bu'kana na ukosopoli wo, ngabalondwa panga, ngu'ngu' ilu'a kumwikya mwenga. 11 Loo wa Kilisitu aabile nkati yabe aalondwi panga Kilisitu aalu'a ku'su'mbu'lwa, na payaapi'ta ngu'su'mbu' yo aalu'a pata utukupu. Alondoli bo ba Nnu'ngu' baapalike muno batange panga makowe go gaapangika pakubawi na gampata kitiwi. 12 Nnu'ngu' aaumukuli alondoli bo panga, makowe gabalondwage gaabileli ga pwaila yabe bene, ila gaabile ginu mwenga. Nabembe bamwali Abali yo Inannoga kwa uweso wa Loo Mpeleteu ywaatumilwe bu'ka kunani. Makowe go ata malaika bendaminyikiya muno kugatanga.

13 Kwa nyo, mutame wiso kwa kugatumya malango ginu. Mutame minyo na mubi'ke liu'bi'lyo linu lyoti mungu'ngu' yi'lu' yamwaapeyelwa paabonekana Yesu Kilisitu. 14 Mwenga mwabana ba Nnu'ngu' ywamunnyu'wa, katu kanemuyi'ki'ti kugabi'ngi'ya maminyikio maakau gamwaabile nago pamwaabile mwaalalo. 15 Ila, mupalikwa baa mwaapeleteu muiyendo yinu yoti kati mu'lu' mwabile mpeleteu yu'lu' ywaankemite. 16 Kwa mwanjaa Nnu'ngu' aalongei mu Maandiko Mapeleteu panga, "Mubee mwaapeleteu, kwa mwanjaa nenga nampeleteu."

17 Pamuntambwa Nnu'ngu' mwenga munkema Tati'. Bai, mutange panga ywembe amuukumu kila mundu bu'kana na iyendo yake pangali bawa. Kwa nyo, mutumi wakati winu wauigalile pano padunia kwa kunkilikitya Nnu'ngu'. 18 Kwa mwanjaa mwenga mutangite panga, mwaakosopolilwe bu'ka munnyendo winu wangalipwaika wamwaupoki bu'ka kwa api'ndo binu. Lakini mutange panga Nnu'ngu' ankosopoli lili kwa ili'be yaialabika, kwa mbanje wala zaabu, 19 ila kwa myai ya samani ya Kilisitu, ywaabile kati mwana ngondolo ywangali sambi wala lilembele. 20 Ywembe aabaulilwe na Nnu'ngu' dunia ibile balo umbilwa, ngaumukulwa mumasu'ba gano ga kuundi'la kwa kitumbu sinu. 21 Kwo pi'tya ywembe, mumwu'bi'lya Nnu'ngu' ywannyu'yite bu'ka kwa awi'li na kumpeya utukupu, li'nga imani na mau'bi'lyo ginu gabe kwa Nnu'ngu'.

22 Mwiipeletiye loo yinu kwa kwiyu'wa yi'lu' kweli, na nambi'yambi' muwesa kwapenda ainu pangali unapiki. Bai, mupendane kwa mwoyo woti. 23 Kwa mwanjaa mubelekwi mala yenebi'li', belekwa kwo ku'bu'kineli na akinatati' binu mwabene babawesa waa, ila mubelekwi kwa liyi'gi'yo lya Nnu'ngu' lyalibile likoti no konda mpaka milele. 24 Kati mwagabaya Maandiko Mapeleteu,

"Bandu boti babile kati maakapi,

na utukupu wabe woti ubile kati lilu'ba lya maakapi.

Maakapi gendapu'pwa na malu'ba gendapolota.

25 Lakini liyi'gi'yo lya Nnu'ngu' likonda milele."

Liyi'gi'yo lyo nga ayo Abali Inannoga yamualilwe.