1 Bai, kwa mwanjaa Kilisitu aatesilwe muyi'ga yake, na mwenga mutame wiso na mabinio gaagalu'galu', kwa mwanjaa ywembe ywatesilwe muyi'ga alaya panga, alekangine na sambi. 2 Tumbulya nambi'yambi', maisa gagaigile go tama pano padunia, gapalikwa galongoyelwe kati mwapala Nnu'ngu', kwenda kwa maminyikio ga kimundu lili. 3 Mwanjaa, masu'ba ginu gagapite gali'ngani kwo panga makowe gabapanga bandu bangali kuntanga Nnu'ngu'. Mwaatami kwo panga upege, kwipenda mwabene, lobya, kalamu yo milamuno, nywa muno na ata kwikilikitya inyago. 4 Nambi'yambi', bandu bangali kuntanga Nnu'ngu' bendasangala kwa kitumbu so kotoka panga nabo kiselele palu' pabapanga malau go pi'ti'li'ki'ya, kwa nyo bendakuntukana. 5 Lakini baapalikwa kwiyi'mya nnu'ngi' ya Nnu'ngu', ywembe atami wiso kwaukumu bandu boti, bau'mi na babawile. 6 Mwanjaa, kwa kitumbu so ata abo babawile baalilwe Abali Inannoga, pamope no panga baaukumilwe muyi'ga kati mwabaukumilwa bandu bi'ngi', baatama muloo kati Nnu'ngu' ywatama muloo.

7 Kuundi'la wa ili'be yoti wegelile. Kwa nyo mupalikwa tama kwo li'ngi'lya no keleka li'nga muwese saalya. 8 Likowe lya ngama muno nga ali', mupendane kwa mwoyo woti, kwa mwanjaa upendo uwi'ki'lya uyolou wa sambi. 9 Mukemyane mwabene na bene pangali ku'ku'li'ka. 10 Kila mundu apalikwa tumya ngu'ngu' yayaliwite bu'ka kwa Nnu'ngu' kwa pwaila ya bi'ngi' kati ywakota wiso upo mbali'mbali' ya Nnu'ngu'. 11 Ywalongela kili'be, gaagalongela gabe kati galongelelwa na Nnu'ngu', ywatumika apalikwa tumika kwa makakala gayaliwa na Nnu'ngu', li'nga mumakowe goti, Nnu'ngu' akwi'yi'lwe kwa ndi'la ya Yesu Kilisitu mwene utukupu na makakala goti gake milele na milele, amina.

12 Mwamambwiga bangu', kanemusangale kwa mateso gamugapata nambi'yambi', kwa mwanjaa mateso go gaipaya imani yinu. Kanemuwase ali' lyalipitya kwinu panga likowe lya ayabu. 13 Ila, mupulaike panga mupanga kiselele mumateso ga Kilisitu li'nga muwese baa na pulaa ngu'lu' palu' pawaumukulwa utukupu wake. 14 Nantali yinu manaitei kamutukanilwa kwa kitumbu sa lina lya Kilisitu, mwanjaa Loo ntukupu wa Nnu'ngu' atama na mwenga. 15 Kaneabe mundu ywoywoti pakati yinu ywapalikwa teselwa kwa kitumbu ywembe mmulagi, mwii, nnau au ywaiyingiya mumaisa ga mundu ywi'ngi'. 16 Lakini mana mundu kateseka kwa mwanjaa ywembe Nkilisitu, bai kaneaibone oni, ila ankwi'ye Nnu'ngu' kwa mwanjaa mundu ywo akemelwa kwa lina lyo.

17 Nsimu wa ukumu wikite, na ukumu yo itumbulya kwa bandu bake mwene Nnu'ngu'. Manaitei ukumu yo itumbulya kwitu twenga, bai kuuyomolyo wake kwaalu'a panga buli kwa balu' bangali u'bi'lya Abali Inannoga ya Nnu'ngu'? 18 Kati mwagabaya Maandiko Mapeleteu, "Inonwipe kwa bandu bene aki kosopolelwa, yaapanga buli, kwa bangali kunkilikitya Nnu'ngu' na bene sambi?" 19 Kwa nyo, balu' babateseka bu'kana na mwapala Nnu'ngu', baibi'ke loo yabe mumaboko ga Muumba wabe ywau'bi'li'ka, ku'no kabayendelya panga ganannoga.