1 Bai, muuleke ulau woti, na sampuli yoti ya ubu'su', unapiki na bwigu, wala kanemubalane ata pasene. 2 Kati mu'lu' bana ilekeleke mwabaminyikiya mabele, namwenga nyinyonyo mupalikwa baa na nnyota ya mabele ga kiloo, li'nga kwa makakala gake mupate ku'la no kosopolelwa. 3 Kati mwagabaya Maandiko Mapeleteu, "Mukwipwi panga Bwana nga nnogau."

4 Bai, munnyendeli Bwana! Ywembe nga liwe lyu'mi lyalikanilwe na bandu, lakini kwa Nnu'ngu' nga liwe lyalisawile na lya samani ngu'lu'. 5 Munnyendeli ywembe kati maliwe mau'mi, mukasengeke no pangika nyumba ya kiloo, amo mwalu'a tumikia kati mwaapi'ndo aku'lu' ba dini mwamupeletike kwo piya salaka ya kiloo yaiyi'ki'ti'lwa kwake kwa ndi'la ya Yesu Kilisitu. 6 Kwa mwanjaa, bu'kana na ywembe yandikilwe mu Maandiko panga, "Lola, nibi'ka liwe mu Sayuni liwe lya nsingi, lisaulilwa na lyene samani. Mundu ywamwu'bi'lya ywo aaibonali oni."

7 Kwinu mwenga mwamuu'bi'lya liwe lyo, nga lya samani ngu'lu', lakini kwa balu' bangali u'bi'lya, "Liwe lyabalikani asengi, nambi'yambi' lipangike liwe liku'lu' lya pakitumembe." 8 Kai', Maandiko gabaya, "Liwe lyo nga li'lu' lyabaliku'bala bandu, mpi'mbi' wa kwatu'mbu'ya bandu." Bandu baku'bala kwa mwanjaa baliu'bi'li lili li'lu' liyi'gi'yo lya Nnu'ngu', na ago nga gababi'kilwe bu'ka tokyaa.

9 Lakini mwenga mwabandu mwamusaulilwe na Nnu'ngu' na upi'ndo nku'lu' wa dini ya kikulungwa. Mwenga mwa taipwa lyalipeletike na mwabandu baa kisake mwamubaulilwe na Nnu'ngu'. Musaulilwe li'nga mwiale iyendo ngu'lu' ya yu'lu' ywankemite bu'ka kulubi'ndu' na kunnyingiya ku bweya wake wa ayabu. 10 Masu'ba ga nsu'gu', mwaabileli mwabandu ba Nnu'ngu', lakini nambi'yambi' mwenga mwabandu bake. Kai', mwaabi'kilweli kiya na Nnu'ngu', lakini nambi'yambi' mubi'kilwe kiya.

11 Mwaapendwa bangu', ninking'indya mwenga kwa mwanjaa, pano padunia mwaageni na mwaapi'tandi'la, bai mugayepe maminyikiyo ga yi'ga gagayu'mana na loo yinu. 12 Nnyendo winu pakati ya bandu bangalikuntanga Nnu'ngu', upalikwa ube unannoga muno li'nga ata mana banku'pi'ki'ya panga mupanga maakau, bawese tanga iyendo yinu ngolou na nnyo bankwi'ye Nnu'ngu' lisu'ba lyo isa kwake.

13 Bai, mwibi'ke pai' ya utawala woti wa kimundu kwa kitumbu sa Bwana. Mumwisimu nkulungwa winu, kwa mwanjaa ywembe nga kolongosi nku'lu' munni'ma winu. 14 Mwayu'we alongosi babatumilwe na nkulungwa. Batumilwe li'nga kwapwatya babapanga makosa, na kwalumba babanogeya. 15 Kwa mwanjaa Nnu'ngu' apala kwo panga kwitu manogau, twiimiye milongelo ya kilalo ya bandu bangali malango. 16 Mutame kati bandu bababile ulu, lakini kanemutumi uulu wo li'nga kugawi'ki'lya malau lili, ila mutame kati mwaatumisi ba Nnu'ngu'. 17 Mwaisimu bandu boti, mwapende alongo binu aumini, munnyogope Nnu'ngu', na kumwisimu nkulungwa.

18 Mwenga mwaabanda, mwatumikiye angwana binu kwa isima yoti, kwenda kwa balu' babaliyaa na bene ikima baili, ila ata kwa bababile alau. 19 Mwanjaa, mana mundu akomeya ngu'su'mbu' yangali yake kwa kumwisimu Nnu'ngu', bai, Nnu'ngu' alu'a kunnyalya. 20 Kwa mwanjaa mupata ki'li' pamuku'mbu'lwa kwa kitumbu so panga sambi? Lakini mana kauteselwa kwo panga manogau no komeya, ali' Nnu'ngu' alipendile. 21 Ago nga gamukemilwe, mwanjaa Kilisitu mwene aatesilwe kwa kitumbu sinu, ngaanekya go li'nga mubi'ngi'ye njayo yake. 22 Kati mwagabaya maandiko Mapeleteu panga, "Ywembe aapangiteli sambi wala likowe lya ubu'su' lyayu'wanikeli munkano wake." 23 Paatukanilwe ywembe ayangwili kwa matukano, patesilwe ywembe ayogwiyeli, ila aagabi'i mau'bi'lyo gake kwa Nnu'ngu', akimu mwene aki. 24 Ywembe mwene aagapu'twi masambi gitu muyi'ga yake kunani ya nsalaba, li'nga twenga kanetutawalilwe na sambi kai', ila tutame maisa ga kumpulaisa Nnu'ngu'. Kwo ku'mbu'lwa kwake, tupatike ukoto. 25 Mwenga mwaabile kati ngondolo babaobite, lakini nambi'yambi' muki'li'bwike kwa nsungi na nni'ndi'li ywa loo yinu.