1 Nyinyonyo na mwenga mwa akinaayumbo, mwagegekeye akinasengo binu li'nga mana mubile na annalu'me bangali u'bi'lya liyi'gi'yo lya Nnu'ngu', bau'bi'li kwa kuubona nnyendo winu. Yaapalikwali longela kikowe, 2 kwa mwanjaa baaubona nnyendo winu mwaunogelile na wa kunnyogopa Nnu'ngu'. 3 Kanemwu'bi'li kwiinemeka kwo tiba ndibe, wala ili'be ya zaabu no wala ngu'bo ya bei ngu'lu'. 4 Ila, ugolou winu upalikwa utumbuli pamwoyo, ugolou wangali alabika lombolya loo yo tu'ya no gegeya. Awo nga ugolou wa samani ngu'lu' kwa Nnu'ngu'. 5 Nyo, ngamwabaainemike alwawa ba kwai'mbu' bene ikima babantumikiye Nnu'ngu', baatami pai' ya amuli ya akinasengo babe. 6 Sara, nga yumo ywa alwawa babapalikwa yigilwa, kwa mwanjaa ywembe aannyu'wine nsengowe Bulaimu ata kunkema bwana wake. Na mwenga mwaalwawa, mwa bana ba kweli ba Sara mana mubile kamupanga galu' gagapalikwa pangali yogopa.

7 Nyinyonyo na mwenga mwa analu'me, mutame na ayumbo binu kwa malango kamutanga panga bembe ntu'pu' makakala kati mwenga. Mwalinguli wiso kwa isima, kwa mwanjaa na bembe baalu'a lisi ngu'ngu' ya ukoto pamope na mwenga. Kwa nyo, mwanalu'me mupange nyo li'nga gamulu'ba kwa Nnu'ngu', gapokelelwe.

8 Likowe lya kuundi'la nga ali', mube na libinio limo, kamubi'kyana kiya, kamupendana kati mwaalongo, mube mwaliya ku'no kamugegekeyana. 9 Kanemwabukiye bandu kwa malau gabampangya, kati ulau kwa ulau au litukano kwa litukano, ila mwalu'bi bayaliwe, kwa mwanjaa mwenga mwaakemilwe na Nnu'ngu' li'nga mulisi balaka. 10 Kati mwagabaya Maandiko Mapeleteu,

"Ywapala pulaikya maisa,

na kulibona lisu'ba lyo yaliwa,

lulimi lwake kanelulongele malau,

ayepe longela ubu'su'.

11 Aibawe na ulau, apange manogau,

apale amani na kwibi'ka pamwoyo.

12 Mwanjaa, Bwana aalingulya bene aki na kugapi'kania gabalu'ba.

Lakini aalaya su'gu' bandu babapanga malau."

13 Manaitei kamubinia panga manogau, nyai ywaapala kunsulu? 14 Lakini, ata ikatei mwaateseka kwa kitumbu so panga manogau, Nnu'ngu' aalu'a kunnyalya. Kanemunnyogope mundu ywoywoti wala kanemuyi'ki'ti yogoya kwabe. 15 Lakini mumpei utukupu Kilisitu, ywembe nga Bwana mumyoyo yinu. Mutame wiso kunnyangwa kila mundu ywannaluya bu'kana na mau'bi'lyo gagabile nkati yinu. 16 Lakini mupange nnyo kwo gegeya na isima. Mubini ganannoga li'nga pamutukanilwa, balu' babalongela malau bu'kana na nnyendo winu unannoga mu Kilisitu, baibone oni. 17 Mwanjaa nantali teselwa kwa kitumbu so panga manogau manaitei nga mwapendi Nnu'ngu', kulikoni teselwa kwa kitumbu so panga malau. 18 Kwa mwanjaa,

Kilisitu aatesilwe mala yimo kwa kitumbu sa masambi gitu,

mwene aki kwa kitumbu sabe bangali aki,

li'nga atulete kwa Nnu'ngu'.

Aabulagilwe yi'ga lakini aayu'yilwe kiloo.

19 Kwa nyo, aayi'i kwialya loo akwo kwaitabilwe.

20 Abo, nga balu' babaakani kunnyu'wa Nnu'ngu' paali'ndike kwo komeya nsimu wa Nuu paabile kaitengenesa safina. Nkati ya sombo so, baayingi bandu banane bai babaakosopolilwe kwo pi'tya masi'. 21 Masi' ga nga mpwano wa ubatiso waunkosopolya masu'ba gano kwo yu'ka kwake Yesu Kilisitu, kwenda bi'ka kuutalu usapu wa yi'gali, ila lilagano lya mabinio ganannoga kwa Nnu'ngu'. 22 Ywembe aayi'i kunani na nambi'yambi' atami kummalyo ga Nnu'ngu'. Atawala malaika na yumbe yoti yene utawala na yene makakala.