1 Nambi'yambi' mupi'kani mwenga mwamatayili, muli'le no lombola kwa lilobe liku'lu' kwa kitumbu sa tabu ngu'lu' yailu'a kumwisilya. 2 Utayili winu uboi na magu'bo ginu baotwaniye ngu'lu'ku'lu'. 3 Zaabu na mbanje yinu itu'i ngugu, na ngugu yo ilu'a kunkong'ondelya bu'kana na mwenga, nayembe ilu'a lya yi'ga yinu kati mwaibile mwoto. Mwenga mwiikongoli mali mumasu'ba gano ga kuundi'la. 4 Mupi'kani, apangakasi binu mwabaku'ku'li'ka! Baapangite kasi mumigunda yinu lakini mwaali'piteli. Na babaamuni mauno na bembe bendaku'ku'li'ka, na kili'lo sabe kiyu'wanike mumasikilo ga Bwana Mwene Uweso Woti. 5 Mutami mudunia no pulaikya maisa ga kitayili. Mwinenepiye kwa kwibi'ka wiso sinjilwa. 6 Mutikwaukumu na kwabulaga bandu bene aki, bangali taukana na mwenga.

7 Kwa nyo mwaalongo bangu', mukomeye mpaka paalu'a buyangana Bwana. Mulinguli, nni'mi mwauli'nda nng'unda wake upiye mauno ga pwaila. Ywembe ali'nda kwo komeya ula wa ntu'lo na kyuku mpaka kuundi'la. 8 Na mwenga mupalikwa komeya, kai' muyi'me mwakangamala, kwa mwanjaa buya kwa Bwana Yesu kwegelile.

9 Mwaalongo bangu', kanemuku'ku'li'kyane li'nga mwaakane ukumilwa. Akimu ayi'mi paniango! 10 Mwalinguli alondoli babaalondwi kwa lina lya Bwana, li'nga baa lukongo lwo komeya mungu'su'mbu'. 11 Twaakema abo panga bayaliwite, kwa mwanjaa baatikomeya. Muyu'wine abali yo komeya kwa Ayubu, na mutangite mu'lu' Bwana mwaampangile kuundi'la. Mwanjaa, Bwana atwi'li muno kiya.

12 Pi'ta pa ago goti, mwaalongo bangu', kanemulape, ipange kunani au pai' au kwa kili'be si'ngi' sosoti. "Eloo" yinu ibe eloo, na "Lili" yinu ibe lili, li'nga mwaakane yingya muukumu ya Nnu'ngu'.

13 Buli, abile mundu pakati yinu ywaku'su'mbu'lwa? Bai, apalikwa alu'be Nnu'ngu'. Au abile mundu ywapulaika? Bai, apalikwa ayi'mbe myambo yo lumba. 14 Buli, kubile na ntamwe pakati yinu? Apalikwa kwakema api'ndo ba kanisa, na bembe bannu'bi na kumpakaya mauta kwa lina lya Bwana. 15 Mana kabalu'ba kwa imani, aywo ntamwe aalu'a yu'yu'ki'lwa na ywembe Bwana aalu'a kunkakatuya, na manaitei aapangite sambi, aalu'a samilwa. 16 Bai, muyi'ki'ti ungama masambi ginu mwabene na bene no lu'byana kwa Nnu'ngu' li'nga mupate pona. Lu'ba kwa mundu mwene aki kubile na makakala kai' kupanga kasi. 17 Elia aai mundu kati twenga. Ngalu'ba kwo binia panga ula kaneanie, na ula aanileli munni'ma kwa myaka itatu na myei sita. 18 Bu'kapo ngannu'ba Nnu'ngu' kai', ula ngania bu'ka kumaunde na nni'ma ngaupiya mauno.

19 Mwaalongo bangu', yumo ywinu mana aobite no yenda kuutalu na kweli, na ywi'ngi' mundu kunki'li'bu'ya, 20 mutange panga, aywo ywanki'li'bu'ya mwene sambi bu'ka mundi'la yake yo oba, aalu'a kwikosopolya loo yake bu'ka mukiwo, na sambi yambone alu'a samilwa.