1 Nenga na Yakobi, nantumisi wa Nnu'ngu' na wa Bwana Yesu Kilisitu. Nimwandikyanga mwenga, mwaaumini ba ngolo ku'mi na ibi'li' ya bandu ba Nnu'ngu', mwamubaganike mudunia yoti. Salamu.

2 Mwaalongo bangu', pamupata mapayilwo ga sampuli mbali'mbali', mwibalangili panga mwendanapusika muno, 3 kwa mwanjaa, mutangite panga payilwa kwa imani yinu kuyongekeya ukomeyi. 4 Muyendeli komeya mpaka kuundi'la, li'nga mube mwabandu mwamukomile na mwamukamilike, pangali pu'ngu'ki'lwa kili'be sosoti. 5 Lakini manaitei yumo ywinu apu'ngu'kilwe na ikima na annu'be Nnu'ngu', na ywembe alu'a peyelwa. Kwa mwanjaa Nnu'ngu' aapeya bandu boti pangali kalipya na kwa mwoyo nnogau. 6 Lakini apalikwa alu'be kwa imani, pangali kyukala sosoti. Mwanjaa mundu mwene kyukala, alandana na mabi'mbi' ga baali, gaganokolwa na mbu'nga ku'no na kwo. 7,8 Kwa nyo, mundu ywai na kyukala, mwene mabinio gabi'li' muiyendo yake yoti, kaneaganiye panga aalu'a pokya kili'be bu'ka kwa Bwana.

9 Muumini ywabile nki'ba apalikwa apulaike muno, kwa mwanjaa Nnu'ngu' ampangite au'bu'yi'lwe. 10 Lakini aumini matayili bapalikwa napusika muno palu' pabauluyilwa na Nnu'ngu'. Kwa mwanjaa matayili baalu'a oba kati malu'ba ga mmwitu. 11 Lisu'ba palibanjwa no balaa muno, lyoto lyake ngaliyu'mi'ya maakapi, na galu' malu'ba gake ngagapolota no obeya ugolou wake. Nyinyonyo na tayili, naywembe aalu'a oba ku'no kayendelya na mengo gake.

12 Nantali mundu ywakomeya nsimu wa mapayilwo, kwa mwanjaa mana ayomwike sinda alyo lipayilwo, aalu'a peyelwa taji ya ukoto wangayomoka, yaalagi Nnu'ngu' kwapeya balu' babampenda. 13 Mundu papayilwa apalikwali baya, "Nipayilwa na Nnu'ngu'." Kwa mwanjaa Nnu'ngu' awesali payilwa na malau, wala ywembe awesali kumpaya mundu ywoywoti. 14 Lakini kila mundu apayilwa kwo utilwa no kongelwa na maminyikio gake manyatau. 15 Bai, ago maminyikio manyatau mana gakomile, gapapa sambi, na ayo sambi mana ikomile ipapa kiwo.

16 Mwaalongo bangu' mwamupendilwe, kanemukongelwe. 17 Kila upo inannoga yaikamilike ibu'ka kunani kwa Tati', Nnu'ngu' ywaumbike ili'be yoti yaipiya bweya. Ywembe agalambukali wala yelenganika kati mwakipanga kiwili. 18 Kwo penda kwake mwene Nnu'ngu', aatupapike twenga kwa liyi'gi'yo lyake lya kakape, li'nga tube kati mili'mbu' muili'be yake yoti yaiumbike.

19 Mwaalongo bangu' mwamupendilwe, muku'mbu'ki likowe li'! Kila mundu apalikwa abe nnyu'yu'u wo yu'wa, na kwenda wo longela wala usika lili. 20 Kwa mwanjaa nyongo ya mundu ipangali aki ya Nnu'ngu'. 21 Kwa nyo mugabi'ke kuutalu makowe goti maakau na iyendo yoti ndau. Mukamwe liyi'gi'yo lya Nnu'ngu' lyalibi'kilwe nkati ya myoyo yinu kwo gegekeya, kwa mwanjaa alyo ngaliwesa kunkosopolya. 22 Kanemwikonge mwabene kwo pi'kania liyi'gi'yo lyake bai, ila mupalikwa mupange galu' gagabayilwa. 23 Kwa mwanjaa mundu mana kapikania Liyi'gi'yo lya Nnu'ngu' bai no kotoka panga si'lu' sakibayilwa, ywembe nga kati mundu ywailingulya kuminyo yake mukilolo. 24 Endakwilingulya mwene bu'kapo endabu'ka, lakini mana abu'i bai endakwilibalya mu'lu' mwabile. 25 Lakini mundu ywalingulya kwo binia salya yaikamilike yayaapeya bandu uulu, no yendelya kwikamwa, na kwenda kwo yu'wa baili bu'kapo libalya, ila katimisa galu' gagabayilwa, mundu ywo aayaliwa na Nnu'ngu' kwa kila kikowe sakipanga.

26 Manaitei mundu kaganiya panga abile nayo dini, lakini kasindwa kuluki'li'bu'ya lulimi lwake longela maakau, aikonga mwene na dini yake ipwaikali kili'be. 27 Dini yaibile mbeleteu, yangali baa na usapu, yaiyi'ki'ti'lwa na Nnu'ngu' Tati' bitu nga yi'no, kwayangatia bana aki'ba na alwawa awi'li'ka muupali woti, na kwiili'ndi'la mwabene na ulau wa dunia yi'.