1 Mwaalongo bangu', kwa mwanjaa mumwu'bi'li Yesu Kilisitu, Bwana mwene utukupu, kanemwabawe bandu. 2 Tubaye mundu yumo ywaayingya pamukongolekana ywaweti lupete lwa zaabu na ngu'bo ya bei ngu'lu', na popopo ngayingya kai' nki'ba mwene buula, 3 na mwenga ngamumpeya isima yu'lu' ywaweti magu'bo ga bei ngu'lu' na kummakia, "Utame pandu papapanogelile," Lakini yu'lu' nki'ba ngamummakia, "Wenga uyi'me palu'," au, "Utame pano papipi panipala bi'ka magu'lu' gangu'." 4 Buli awo ubauli lili nkati yinu? Buli, mwibonali panga muamwi maakau?

5 Mwaalongo bangu', mupi'kani! Buli, Nnu'ngu' aasawili balu' bababile aki'ba padunia no baa matayili muimani no lisi ukulungwa waalagile balu' babampenda? 6 Lakini mwenga munsalawi yu'lu' nki'ba. Buli, abo matayili ka ngababantotya na kumpeleka mwenga kumankama? 7 Buli, bembe ka nga balu' babalikupulu lina li'lu' lya Yesu Kilisitu lyalibile lya ngama muno lyamukemilwe nalyo?

8 Mu Maandiko Mapeleteu, salya ya ukulungwa wa Nnu'ngu' ibaya panga, "Umpende ywa papipi yako kati mu'lu' mwawipenda wamwene," Mana kamupanga nnya, mwendanogeya. 9 Lakini mana kamwabawa bandu, mupanga sambi, na salya imukumu panga mwenga mwaakosa. 10 Kwa mwanjaa mundu ywoywoti ywakamwa salya yoti lakini kati'kwana yimo, aywo aapanga kati ati'kwaniye salya yoti. 11 Kwa mwanjaa yu'lu' ywabaite, "Kaneupange upege," nga yu'yu'lu'yu'lu' ywabaite, "Kaneubulage." Kwa nyo, ata ikatei upangali upege, lakini kobulaga, wenga upanga uti'kwaniye salya. 12 Bai, mulongele no panga kati mwabandu mwamwaalu'a ukumilwa kwa salya yi'lu' yaileta uulu. 13 Kwa mwanjaa Nnu'ngu' alu'a pangali na kiya paalu'a kumukumu mundu ywangali panga kiya. Lakini kiya sa Nnu'ngu' saalu'a kwisinda ukumu.

14 Mwaalongo bangu', kubile na pwaila yaku' mundu baya abile na imani, lakini kakotoka laya iyendo? Buli ayo imani yawesa kunkosopolya? 15 Manaitei nku'wo au nnu'mbu'wo abile na buula au ntu'pu' kilyo, 16 na yumo ywinu ngammakia, "Uyende kwa amani, ukayote mwoto no yukuta," pangali kumpeya si'lu' sapala bu'kana na upali wake, yapanga na pwaila yaku'? 17 Nyinyonyo na imani kisake pangali iyendo, ilaya mpu'la panga imani yinu iwile.

18 Lakini mundu awesa baya, "Wenga ubile nayo imani, nenga nibile nayo iyendo!" Aya! Unilaye mundu mwawesa baa na imani pangali iyendo, na nenga nilu'a kulaya imani yangu' kwa ndi'la ya iyendo yangu'. 19 Buli, wendau'bi'lya panga kubile na Nnu'ngu' yumo? Eloo! Lakini ata masetani gau'bi'lya nyo no lendema kwo yogopa. 20 Wenga wannogeloge! Buli upala layilwa panga imani pangali iyendo ipwaikali kili'be? 21 Buli, Bulaimu tati' bitu baabalangilweli aki kwa kumpiya mwana wabe Isaki panga salaka pakibi'ki'lyo? 22 Kakape uwesa kwibona imani yo mwaipangite kasi pamope na iyendo yake, kwa nyo imani yake yaatimilike kwa iyendo yake. 23 Kwa nyo ngagatimya galu' Maandiko Mapeleteu gagabaya, "Bulaimu aamwu'bi'li Nnu'ngu' ngabalangilwa panga mundu mwene aki nnu'ngi' yake." Na nyo ngakemelwa mbwigalye Nnu'ngu'. 24 Bai, mwibona panga Nnu'ngu' ammalangilya mundu panga mwene aki nnu'ngi' yake bu'kana na iyendo yake, kwenda bu'kana na imani yake bai lili.

25 Nyinyonyo ata kwa Rahabu, yu'lu' mpege, aabalangilwe aki kwa galu' gaapangite, paapoki balu' apekeseni na kwatoloya kwa kwabakia bali'nge ndi'la yi'ngi'. 26 Kati mu'lu' mwaibile yi'ga pangali loo iwile, nga nyinyonyo na imani pangali iyendo iwile.