1 Mwaalongo bangu', nkati yinu kanekube na balimu baingi, kwa mwanjaa mutangite panga twenga twabalimu twaalu'a ukumilwa muno kwapi'ta bandu bi'ngi'. 2 Twenga twaboti twendakosa mumakowe mbali'mbali'. Na manaitei mundu ywoywoti aponanganali muulongeli wake, aywo nga mundu ntimya, kai' awesa kwikanikia yi'ga yake yoti. 3 Twenga tuyi'ya lijamu* munkano wa falasi, li'nga apange kati mwatupala. Kwa nyo twiilongoya yi'ga yabe yoti yenda pandu popoti patupala. 4 Au mulinguli ngalaba. Pamope no panga nga ngu'lu' muno, nayembe inokolwa na limbu'nga likali', lakini igalambuyilwa na nsukani nsini muno, no pelekelwa popoti papala ywailongoya. 5 Nyinyonyo na lulimi nga kili'mbi'li'mbi' kisene bai muyi'ga, lakini luwesa kwipunia makowe maku'lu' muno.

Muganiye lilimi lya mwoto mwaliwesa tiniya mwitu nku'lu' muno! 6 Kwa nyo lulimi nga kati mwoto, lutwi'li ulau woti. Lulimi nga kili'mbi'li'mbi' simo bai muili'mbi'li'mbi' yitu ya yi'ga, lakini luwesa bambiya ulau kwa mundu ywoti, no langamisa maisa gake goti kwa mwoto wangayomoka. 7 Bandu bawesa uga inyama ya sampuli mbali'mbali', iyuni, inyama yaikwaba na yumbe yoti ya mubaali. 8 Lakini ntu'pu' ywawesike kuluuga lulimi lwake. Lulimi nga kili'be kilau, ulau wangali totokelwa, na lutwi'li sumu yaibulaga. 9 Tutumya lulimi kwa kunkwi'ya Bwana ywabile Tati' bitu. Lakini kai' tutumya lulimi lwolwolwo kwa ndi'la ya kwalaani bandu babaumbilwe na Nnu'ngu' kwa uyi'me wake. 10 Milongelo yo yalya no laani ipita munkano gumo. Mwaalongo bangu', ipalikwali panga nya. 11 Buli, kinywanyu sa pandu pamo kiwesa piya masi' maangalau na matombolou kai'? 12 Mwaalongo bangu' buli, ntini uwesa pambiya njaituni? Au nnjabibu uwesa pambiya tini? Nyinyonyo, kinywanyu sa masi' matombolou, kiwesali piya masi' maangalau.

13 Buli, nga ywaku' mwene ikima na malango nkati yinu? Bai, alaye likowe lyo kwa nnyendo wake unannoga, kwo panga iyendo kwo liya kwakubu'kana na ikima. 14 Lakini manaitei mumyoyo yinu kutwi'li bwigu nkali' na kwipenda mwabene, kanemwilumbe kwa kitumbu sa ago kwa mwanjaa, kwipuna kwinu kulu'e panga ubu'su' wauiya kweli. 15 Ikima ya sampuli yo ibu'kali kunani, ila ibu'kana na dunia nayembe nga ya kiyi'ga na ya kisetani. 16 Mwanjaa popoti papabile na bwigu na kwipenda bene, nga papabile na bulwe na ulau wa kila sampuli. 17 Lakini ikima yaibu'ka kunani, wi'ti' mbeleteu, bu'kapo ipenda amani kai' yo tu'lya, yaiyi'ki'tya pi'kania bi'ngi' kwo gegeya, yaitwi'li kiya na iyendo inannoga, yangali baa na ubauli wala ubu'su'. 18 Mauno ga aki gapandilwa muamani na balu' babaleta amani.