1 Maku'mbwano na bulwe waupitya nkati yinu ubu'ka kwaku'? Buli, aga gabu'kanali na maminyikio ginu gagataukana nkati ya yi'ga yinu? 2 Muminyikia ili'be, na kwa mwanjaa mwiipatali, mwibona ili'ngani ata bulaga. Mubi'ka bwigu lakini mupatali kili'be, kwa nyo mwendayu'mana no ku'mbwana. Mupatali kili'be kwa mwanjaa mukilu'bali kwa Nnu'ngu'. 3 Pamulu'ba mupatali kwa mwanjaa mulu'ba kwa mabinio maakau, mulu'ba li'nga mupate timisa maminyikio ginu. 4 Mwenga mwabandu bangali u'bi'li'ka, mutangiteli panga limbwiga na dunia nga undumu kwa Nnu'ngu'? Kwa nyo mundu ywoywoti ywapala panga limbwiga na dunia, aywo apangika nndumu ywa Nnu'ngu'. 5 Kanemuganie panga Maandiko Mapeleteu gaabaite mayi'gi'yo gabule pagaabaite, "Loo ywabi'kilwe na Nnu'ngu' nkati yitu abile na bwigu pi'ta." 6 Lakini ngu'ngu' yatuipata kwa Nnu'ngu' nga ngu'lu' pi'ta, kwa mwanjaa Maandiko Mpeleteu gabaya, "Nnu'ngu' aataukya babaipuna, lakini apeya ngu'ngu' babagegekeya."

7 Bai, munnyu'we Nnu'ngu', muyi'me kwo kangamala kunkana Ibilisi na ywembe aalu'a kuntila. 8 Mumwegeleli Nnu'ngu', naywembe alu'a kumwegelelya. Mupeleteye maboko ginu, mwenga mwabene sambi. Mwiipeleteye myoyo yinu mwenga mwamubile na mabinio gabi'li'. 9 Muusunike, lombola no li'la, eka kwinu kugalambuyilwe kube lombola, no pulaika kwinu kugalambuyilwe kube usunika muno. 10 Mwiuluye nnu'ngi' ya Bwana, na ywembe aalu'a kuntu'ndu'bi'ya.

11 Mwaalongo bangu', kanemubi'kyane lukoolo mwabene na bene. Ywammi'kya lukoolo nnongowe na kumuukumu, aywo aisalawa salya na kwiukumu. Manaitei kawiukumu salya, bai wenga wiyu'wali salya ila wendakwiukumu. 12 Nnu'ngu' mwene ngaywabi'ka salya, na ngaywawesa ukumu. Ywembe ngaywawesa kosopolya no langamisa. Lakini wenga wanyai ata uwese kumuukumu nnyino?

13 Bai, munipi'kani wiso mwenga mwamubaya panga, "Li'no au malau', twaalu'a yabwa mwanja wo yenda kukilambo nsi'si', twaalu'a tama kwo mwaka gumo, katupanga nsuluso witu no pata pwaila." 14 Mwenga mutangiteli ata maisa ginu mwagaalu'a baa malau'! Maisa ginu ki'li'? Mwenga nga kati luti lwalubonekana kwa wakati nsene bai, bu'kapo lwendaku'ngu'lu'ka. 15 Paali pake mupalikwa baya, "Mana Bwana apendile, twaalu'a tama kwo no panga li'no na li'lu'." 16 Lakini nambi'yambi' mwendakwilumba na kwipuna. Kwipuna kwa sampuli yo nga ulau. 17 Bai, mundu ywoywoti ywatangite manogau gagapalikwa panga, lakini kakotoka panga, aywo ngaywapanga sambi.