1 Muyendeli pendana kati mwaalongo. 2 Kanemulibali kwakemya ageni, kwa mwanjaa kwo panga nya bandu bi'ngi' baakemi malaika pangali tanga. 3 Mwaku'mbu'ki bababile muutabilwe, kati mutabilwe pamope nabo. Kai' mwaku'mbu'ki balu' babaku'su'mbu'lwa, kati muku'su'mbu'lwa pamope nabo.

4 Ndoa ipalikwa iisimilwe na bandu boti, nsengo na nnyumbo bapalikwa baubi'ke kuutalu usapu, kwa mwanjaa Nnu'ngu' aalu'a kwaukumu apege na babapita panja ya ndoa.

5 Mugali'ndi'le maisa ginu na kipi'li' so penda mbanje, inni'ngane yi'lu' yamubile nayo, kwa mwanjaa Nnu'ngu' abaya, "Naakulekali katu, wala kukulibalya." 6 Kwa nyo tuwesa lowa baya pangali yogopa, "Bwana nga nnyangatiyi wangu', naayogopali. Mundu aanipanga ki'li'?"

7 Mwaku'mbu'ki alongosi binu babannyi'ganiye liyi'gi'yo lya Nnu'ngu'. Mwilinguli miyendo yabaabile nayo mpaka kuundi'la, na muyige imani yabe. 8 Yesu Kilisitu nga yu'yu'lu'yu'lu' liso, li'no na ata milele. 9 Kanemukongelwe na mayi'gano mbali'mbali', kwa mwanjaa, ngu'ngu' ya Nnu'ngu' nga yaikangamaya myoyo yinu na kwenda salya yaibu'kana na kilyo lili. Salya yo kwa babaikota yayangatiali kili'be.

10 Twenga tubile na kibi'ki'lyo panga balu' babantumikia Nnu'ngu' muema ya Ayahudi ntu'pu' aki yo lya salaka yaibu'ka nkati yake. 11 Mpi'ndo nku'lu' ywa dini apu'twa myai ya inyama na kwipeleka Papeleteu Muno, li'nga aipiye salaka kwa kitumbu sa sambi. Lakini nyama ya inyama yo yendetolelwa no tiniyilwa kuutalu na pandu pamaema. 12 Nyinyonyo na Yesu nembe aaku'su'mbu'lilwe panja ya kilambo, li'nga aapeleteye bandu masambi gabe kwa ndi'la ya myai yake. 13 Kwa nyo tunnyendeli panja ya kilambo, na tukomeye oni kati ywembe mwaakomiye. 14 Kwa mwanjaa pano padunia ntu'pu' nni'ma wo konda, ila tuupi'kanilya wu'lu' wawisa. 15 Bai, tuyendeli kunnumba Nnu'ngu' kwo pi'tya Yesu, kwa mwanjaa sipwa yitu ya kuliyi'ki'tya lina lyake nga salaka yatumpikia. 16 Kanemulibali panga makowe manogau no panga kiselele muili'be yinu yamubile nayo, kwa mwanjaa salaka kati yo ngayainnogelelya Nnu'ngu'.

17 Mwayu'we alongosi binu no kota amuli yabe, kwa mwanjaa bembe bakeleka kwa kitumbu sa loo yinu, na baalu'a piya isabu ya utumisi wabe nnu'ngi' ya Nnu'ngu'. Mana mwaayu'wa, baalu'a panga kasi kwa pulaa, ila mana baapanga kwo usunika, mwapatali pwaila.

18 Muyendeli kutulu'bya, kwa mwanjaa tubile na zamili mbeleteu yo pala tama kwa nnyendo unannoga kwa bandu boti. 19 Ninnu'ba munilu'bi muno, li'nga Nnu'ngu' aniki'li'bu'ye kai' kwinu kiyu'ngu'ya.

20 Nnu'ngu' wa amani aannyu'yite Bwana witu Yesu, nsungi nku'lu' wa ngondolo, kwa kitumbu so yitana myai yake yaipanga malagano ga milele. 21 Nnu'ngu' ampange mwenga mube mwaatimilika mukila nnyendo unannoga, apange gagannogelelya nkati yitu kwa ndi'la ya Yesu Kilisitu. Utukupu ube kasake milele na milele. Amina.

22 Mwaalongo bangu', ninnu'banga muno mugapoki mayi'gi'yo gano go kwi'li'ka mwanjaa nimwandiki kwa mayi'gi'yo masene bai. 23 Nipala mutange panga nnongo witu Timoteo ayu'gu'lilwe bu'ka muutabilwe, mana aaika kiyu'ngu'ya, naalu'a isa pamope nakwe kuntyangilya.

24 Mwasalimie alongosi binu boti pamope na apeleteu boti. Alongo ba Italia bendakunsalimia. 25 Ngu'ngu' ya Nnu'ngu' ibe pamope na mwenga.