1 Bai, natwenga tuti'li'tilwe na kipi'nga kiku'lu' sa akong'ondeli, bai tubi'ke kuutalu kila kipungo sakitukanikia na sambi yi'lu' yaituli'ndi'ndya, li'nga tubutuke muno lubi'lo kwo komeya mumasindano gatubi'kilwe. 2 Bai, tupalikwa tunninguli Yesu kwa mwanjaa ywembe ngaywatumbwile na ngannyomoleli wa imani yitu, ywembe aaitangite pulaa yaibi'kilwe nnu'ngi' yake. Aakomiye waa panani ya nsalaba pangali kwibona oni, na nambi'yambi' atami lwingo lwamalyo wa kiti'gu' sa lenji sa Nnu'ngu'.

3 Muganiye bu'kana na Yesu ywaakomiye malau ga balu' bene sambi, li'nga mwaakane totokelwa no ti'kwanika mwoyo. 4 Pamope no panga mwendakasana muno kwisinda sambi, lakini balo munaku'mbwanali ata ika po yitana myai yinu. 5 Buli, mulibalile galu' mayi'gi'yo go yi'ya mwoyo gamubakiyilwe na Nnu'ngu' panga, mwenga mwabana bake? Gagabaya,

"Mwana wangu', kaneusalawe mbwatyo ya Bwana,

wala kaneuti'kwanike mwoyo paakukwi'li'ka.

6 Mwanjaa Bwana ankwi'li'ka kila ywampenda, na kai' ankwi'li'ka kila ywankema panga mwana wake."

7 Kwa nyo mukomeye pamuyi'ganilwa na Nnu'ngu' kwo pwatilwa, apanga nya kwa mwanjaa mwenga mwabana bake. Mwanjaa mwana ywaku' ywangali pwatilwa na mmelei wake? 8 Lakini mana mukotwike pwatilwa kati bana bi'ngi', bai, mwenga mwabana ba Nnu'ngu' lili, ila mwabana ba alamu. 9 Pamope na go, akinatati' bitu babatupapike, baabile kabatukwi'li'ka, na twenga twendekwaisimu. Buli, Tati' bitu ba kiloo muno lili twenga kwayu'wa, li'nga tupate lama? 10 Akinatati' bitu ba dunia baatukwi'li'ke kwa nsimu nsene bai, kati mwabaapendi bene, lakini Nnu'ngu' atukwi'li'ka kwa pwaila yitu, li'nga tupate baa twapeleteu kati ywembe. 11 Kwi'li'ki'lwa kwenda likowe lyo pulaikya lili ila lyo usunika, lakini kuundi'la balu' babayi'ganilwe no kwi'li'ki'lwa, batama kwa amani no panga makowe ga aki.

12 Kwa nyo mugayi'i makakala maboko ginu gagabile ga ukigopi, na mayuwa ginu gagatombolwike. 13 Muyendeli tyanga mundi'la yaisu'mbu'lwike, li'nga si'lu' sakilemile, kanekilumiyilwe, ila kitepulwe.

14 Mupale kwo binia tama kwa amani na bandu boti no kasana tama muupeleteu, kwa mwanjaa ntu'pu' mundu ywaawesa kummona Bwana pangali baa nawo. 15 Mwilinguli wiso li'nga mundu ywoywoti kaneakoselwe ngu'ngu' ya Nnu'ngu', na kyi'ki' kibabau saakane ipuka, kwaauya bandu baingi na kwayi'ya usapu bu'kana na so. 16 Nyinyonyo mulinguli wiso li'nga nkati yinu kaneabee mundu mpege au ywangali kunkilikitya Nnu'ngu', kati Esau ywaapi'miye aki yake ya mwana mmele kwa kitumbu sa nkungu gumo wa kilyo. 17 Mwenga mutangite panga ata paapalike kwipata kai' yi'lu' balaka yake, aatikanilwa kwa mwanjaa apatikeli lipala lyo galambukya kwa Nnu'ngu', pamope no panga aipalike kwa moli.

18 Mwenga, mwai munaikali pandu powesa kupakunywa no yaka mwoto palubi'ndu', na pene kimbu'nga kati kitu'mbi' sa Sinai, 19 nyinyonyo, wayu'wanike nnindimo wa lipenga au kati lilobe lya mayi'gi'yo go yogoya mpaka balu' babaayu'wine baalu'bite kanebabakiyilwe liyi'gi'yo li'ngi' kai'. 20 Baabaite nya mwanjaa baakombwili komeya amuli yabaapeyilwe na Nnu'ngu' panga, "Ata mana kinyama saakunywa kitu'mbi' si', saalu'a ku'mbu'lwa maliwe." 21 Goti gagaapitike kukitu'mbi' sa Sinai, bandu gaatikwang'ondoya muno ata mpaka Musa aabaite, "Nendalendema muno no yogopa."

22 Lakini mwenga mwikite kukitu'mbi' sa Sayuni, munni'ma wa Nnu'ngu' ywabile nkoti, Yelusalemu ya kunani. Munni'ma wo, malaika bakongolekine kwa pulaa maelupu kwa maelupu. 23 Mwenga mwikite pakipi'nga kiku'lu' sa bana abele ba Nnu'ngu', balu' babaandikilwe maina gabe kunani. Muyi'ma nnu'ngi' ya Nnu'ngu' ywai akimu ywa bandu boti na nnu'ngi' ya loo ya bandu anogau babaapangilwe atimilika na Nnu'ngu'. 24 Mwikite kwa Yesu ywabile mwawaniyi mulilagano lyayambi', na myai yake yainyunyikilwe, ibaya makowe manogau kulikoni yi'lu' ya Abeli.

25 Bai, mwilinguli kanemunkani kumpi'kania yu'lu' ywalongela na mwenga. Manaitei balu' babaakani kumpi'kania ywembe ywaakwi'li'ke pano padunia baakosopolilweli, twenga tulu'a kosopolelwa buli mana katukana kumpi'kania yu'lu' ywatukwi'li'ka bu'ka kunani? 26 Nsimu wu'lu' lilobe lyake lyalendemiye dunia, lakini nambi'yambi' alagi panga, "Naalu'a lendemeya kai' nni'ma woti, na kwenda nni'ma bai lili, ila ata kunani." 27 Liyi'gi'yo li', "kai'" lilaya mpu'la panga ili'be yaiumbilwe yaalu'a lendema no bu'yi'lwa li'nga iigale ili'be yangali wesa lendema.

28 Kwa nyo tupalikwa kunsukulu Nnu'ngu' kwa mwanjaa aatuyi'ki'ti panga kiselele muukulungwa wake pangali lendemeyelwa. Tunkilikiti Nnu'ngu' kwa ndi'la yainnogelelya, kwa isima no yogopa, 29 mwanjaa Nnu'ngu' witu nga kati mwoto wauwesa langamisa.