1 Mwanjaa salya nga kiwili bai sa makowe ganannoga gagaalu'a isa, na kwenda nga makowe gene lili. Kwa nyo, salaka yabapiya bandu kila mwaka bu'kana na salya yo, katu iwesali kwapeletea bandu babamwu'bi'lya Nnu'ngu'. 2 Ikapangage kakape ayo salaka yabe iwesa peleteya masambi gabe, balu'e yendelyali kwiukumu panga babile na sambi, na salaka ayo yoti, ilu'e ika kuundi'la. 3 Lakini salaka yabapiya kila mwaka ipanga yaaku'mbu'ki'ya masambi gabe, 4 kwa mwanjaa iwesekanali myai ya malu'me ga ng'ombe na mbwi bu'ya sambi.

5 Kwa nyo Kilisitu paabile kaisa padunia, ammakiye Nnu'ngu',

"Wenga waapendili salaka wala mapiyo, lakini unibi'ki wiso yi'ga.

6 Wenga upendili salaka yo tiniya, wala salaka yo samya sambi.

7 Apo nganibaya, ‘Nibile pano wa Nnu'ngu', li'nga timisa gopendile, kati mwaiandikilwe mu Maandiko Mapeleteu bu'kana na nenga.’"

8 Kilisitu aabaite wi'ti', "Wenga waapendili salaka wala mapiyo, na salaka yo tiniya, wala salaka yo samya sambi." Aabaite nyo pamope no panga salaka yoti ipiyilwa bu'kana na salya ya Musa. 9 Bu'kapo ngabaya, "Nibile pano wa Nnu'ngu', li'nga timisa gopendile." Kwa nyo Nnu'ngu' ngabu'ya salaka ayo nongoi no bi'ka salaka yimo kwa ndi'la ya Kilisitu. 10 Kwa mwanjaa Yesu Kilisitu aatimisike mwapendi Nnu'ngu' kwa ndi'la ya salaka ya yi'ga yake yayaapiyilwe mala yimo bai kwa nsimu woti, twenga tupeleteyelwa masambi gitu.

11 Kila mpi'ndo ywa dini ayi'ma kila lisu'ba panga ibala, no kokotya piya salaka yi'yi'lu'yi'lu', yangali wesa samya sambi katu. 12 Lakini Kilisitu aaipiyike panga salaka mala yimo bai kwa nsimu woti li'nga atubu'ki'ye masambi gitu. Bu'kapo ngatama kuluboko lwamalyo lwa Nnu'ngu', 13 na akwo aali'nda mpaka Nnu'ngu' paalu'a kwabi'ka andumu bake pai' ya magu'lu' gake. 14 Bai, kwa salaka yake yimo, Kilisitu ngaatimilisa bandu bake milele, nga balu' boti babapeleteyelwa masambi gabe.

15 Na ywembe Loo Mpeleteu atukong'ondelya bu'kana na likowe li'. Abaya wi'ti', 16 "Li'no nga lilagano lyanilu'a panga nabo kwa masu'ba gagaisa, abaya Bwana. Nilu'a bi'ka salya yangu' mumyoyo yabe no andika mulunda lwabe." 17 Bu'kapo ngayongeya baya, "Naalu'a ku'mbu'kyali kai' masambi gabe, wala ulau wa iyendo yabe." 18 Bai, manaitei Nnu'ngu' ayomwike kwasamya bandu masambi gabe, ipanga ntu'pu' kitumbu kai' so piya salaka yo samya sambi.

19 Kwa nyo mwaalongo bangu', kwa kitumbu sa myai ya Yesu tubi'kilwe ulu yingya Papeleteu Muno pangali bwoga, 20 kwo pi'tya li'lu' panjia, lombolya yi'ga yake, ngayaituyu'gu'li ndi'la yayambi' na ya ukoti. 21 Twenga tubile na mpi'ndo nku'lu' ywa dini ywaiyi'mya nyumba ya Nnu'ngu'. 22 Kwa nyo tumwegeli Nnu'ngu' tubile na myoyo ya kweli na kumwu'bi'lya kwo timilika, kwa mwanjaa Nnu'ngu' aapeletiye myoyo yitu milau kwa ndi'la ya myai ya Yesu na yi'ga yitu yaapeleteyilwe na masi' malengebau. 23 Tupalikwa kamulikiya si'lu' satukiu'bi'lya, kwa mwanjaa Nnu'ngu' ywaalagile nga ywau'bi'li'ka. 24 Tukabwane no ku'mbu'ki'yana twabene na bene, li'nga tupendane no panga makowe ganannoga. 25 Wala kanetukotoke kwembana pamope kati bi'ngi' mwabakotoka kwembana. Ila tupalikwa yendelya sengana muno, kwa mwanjaa tutangite panga lisu'ba lyo buya Bwana lyegelile.

26 Mana katuyendelya panga sambi kwa lipu'njo ku'no katuutanga ukakape, ntu'pu' salaka yaiwesa piyilwa kai' kwa kitumbu so bu'ya sambi. 27 Apo sakiigala ngo li'nda kwa bwoga ukumu, na mwoto nkali' wauyaka, wawaalu'a kwalangamisa andumu ba Nnu'ngu'. 28 Mundu ywoywoti ywaaitauki salya ya Musa, aabulagilwe pangali kiya, kwa ukong'ondeli wa bandu abi'li' au atatu. 29 Buli, muganiya mbwatyo yaku' ngali' yapalikwa peyelwa mundu ywansalawa Mwana wa Nnu'ngu', no balanga panga myai ya lilagano lyalipeleteya sambi kili'be sa ngamali? Buli, apalikwa pangilwa namani yu'lu' ywankupulu Loo Mpeleteu ywa ngu'ngu'? 30 Kwa mwanjaa tuntangite yu'lu' ywabaite, "Bu'kana no bukiya, nenga nganilu'a bukiya." Na ywembe ngabaya kai', "Bwana aalu'a kwaukumu bandu bake." 31 Likowe lyo yogopelwa muno tu'mbu'ka mumaboko ga Nnu'ngu' ywabile nkoti.

32 Mugaku'mbu'ki masu'ba galu' gamwaatumbwi kumwu'bi'lya Kilisitu, pamope no pi'ta mungu'su'mbu' yambone, lakini mwaayendeli komeya kwo kangamala. 33 Pi'ngi' mwaabile kamupwi'wi'lwa no ku'su'mbu'lwa pabandu. Na pi'ngi' mwaabile kamwaayangatia balu' babapangilwage manyatau. 34 Mwaabi'ki kiya balu' babaabile muutabilwe, kamuyi'ki'tya kwo napusika pokonyolwa mali yinu, kwa mwanjaa mwaatangite panga mubile na mali ya ngama muno na yokonda. 35 Kwa nyo kanemuuleke ukangamau winu, kwa mwanjaa mwaalu'a pokya upo ngu'lu'. 36 Mupalikwa baa na ukomeyi li'nga muwese panga gapendi Nnu'ngu' no pokya si'lu' saalagile. 37 Mwanjaa kati mwagabaya Maandiko, "Balo pasene bai yu'lu' ywapalikwa isa aalu'a isa, wala asi'yali. 38 Mundu wangu' mwene aki aalama kwa ndi'la ya imani. Lakini naampulaikyali yu'lu' ywagalambukya nsu'gu' kwa kitumbu so yogopa." 39 Lakini twenga tubileli mwa bababuyangani nsu'gu' no oba, ila twenga tubile pamope na balu' babamwu'bi'lya no kosopolelwa.