1 Bai, kwa mwanjaa lilagano lyo yingya mukipu'mu'lyo sake likabalo, tutame minyo li'nga yumo ywitu aakane koselwa yingya. 2 Kwa mwanjaa, Abali Inannoga ialilwe kwitu twenga kati mwayaalilwe kwa abo bandu ba kwai'mbu'. Lakini liyi'gi'yo lyo lyaapwaikeli, kwa mwanjaa baaliyu'wine lakini baalipokili kwa imani. 3 Bai, twenga twatuu'bi'lya tupata kipu'mu'lyo so saalagi Nnu'ngu', kati mwaabaike, "Naatiusika nganilapa, ‘Katu, bandu bo baayingyali pandu pangu' po pu'mu'lya panaabi'kile.’" Nnu'ngu' aalongei go pamope no panga lyengo lyake lyo umba dunia lyayomwike. 4 Bu'kana na lisu'ba lya saba Maandiko Mapeleteu gabaya, "Nnu'ngu' aapu'mu'li lisu'ba lya saba, aagalei mengo gake goti." 5 Lakini kati mwanibaite, Nnu'ngu' aabaite panga, "‘Katu, bandu bo baayingyali pandu pangu' po pu'mu'lya panaabi'kile.’" 6 Bai, alyo lilagano lyo yingya likabalo, kwa mwanjaa balu' babaalongoli aalilwa Abali Inannoga baasindwi yingya mo kwa kitumbu so kotoka yu'wa kwabe. 7 Kwa kitumbu si', Nnu'ngu' abi'ka kai' lisu'ba li'ngi' lyalikemelwa "Li'no." Nembe aalibaite lisu'ba li'lu' myaka ya nsu'gu' kwa ndi'la ya Daudi, bu'kana na Maandiko gagalongoli bayilwa, "Li'no mana muliyu'wine lilobe lya Nnu'ngu', kanemwipange myoyo yinu minonopau."

8 Kenda Yoshua akaaikiya bandu pandu pakipu'mu'lyo, Nnu'ngu' alu'e longelyali kai' bu'kana na lisu'ba li'ngi' lyo pu'mu'lya. 9 Kwa nyo, balo kubile na lisu'ba lya kipu'mu'lyo sa Sabato kwa bandu ba Nnu'ngu'. 10 Mwanjaa, kila ywayingya pakipu'mu'lyo sa Nnu'ngu' aalu'a pu'mu'lya bu'ka mulyengo lyake kati mu'lu' Nnu'ngu' mwaapu'mu'lile bu'ka mulyengo lyake. 11 Bai, tukasane yingya mukipu'mu'lyo so li'nga aakane baa yumo ywitu ywaalu'a koselwa yingya kwo kotoka yu'wa kati mwabaapangite bembe.

12 Liyi'gi'yo lya Nnu'ngu' lyu'mi na libile na makakala. Bwu'gi wake upi'ta lipanga lyalitema ku'no na ku'no. Lipuwana kabisa mpaka paukwembana mwoyo na loo, na paikwembana ili'mbi'li'mbi' ya yi'ga na mauta ga mukyupa. Liyi'gi'yo lyo, lyendapekeseni no tanga mawaso na mabinio ga myoyo ya bandu. 13 Ntu'pu' kyumbe sakiiyanika kwa Nnu'ngu'. Ili'be yoti kwake ywembe yumukulilwe, na kwake ywembe twaapalikwa awanikia iyendo yitu yoti.

14 Bai, tubile na mpi'ndo nku'lu' ywa dini ywaayi'i no yingya mpaka kunani, Yesu Mwana wa Nnu'ngu'. Kwa kitumbu so, tugakamuliye gatugau'bi'lya. 15 Mpi'ndo ywa Dini ywo, ngaywatangite ukigopi witu, kwa mwanjaa aapayilwe kwa mali'la goti kati twenga, lakini ywembe aapangiteli sambi. 16 Kwa nyo, tukangamale egelya nnu'ngi' ya kiti'gu' sa kikulungwa sa Nnu'ngu' mwene ngu'ngu', li'nga atubi'ki kiya na kutuyangatia kwa ngu'ngu' yake patupalikwa yangatiyilwa.