1 Kwa nyo, tupalikwa tama minyo muno kugakamwa gatuyi'ganilwe, li'nga twaakane kugaleka bu'ka mundi'la ya kakape. 2 Lilagano lya salya lyabaapeyilwe au'ku' bitu, baalipoki kwa malaika wa Nnu'ngu', lyaai lya kakape. Kwa nyo, bandu boti babaapangite umbu'ku'su' wo yu'wa, Nnu'ngu' aapwati bu'kana na masambi gabe. 3 Twengale buli! Tulu'a yepa buli ukumu mana katuusalawa ukosopoli nku'lu' kati wu'? Wembe, waatumbwi bayilwa na Bwana, bu'kapo ngaukong'ondelwa kwitu na babannyu'wine panga kweli. 4 Nnu'ngu' nembe aakong'ondeli ukosopoli wo kwo laya myasu, maayabu na makakala ga sampuli yambone, na kwa upo ya Loo Mpeleteu kati mwapendi mwene.

5 Nnu'ngu' aabi'ili malaika baitawale dunia yayambi' yatuilongelya abali yake. 6 Kai', Maandiko Mapeleteu gabaya,

"Mundu nga namani ata unng'wasili,

Mundu nga ki'li' ata unku'mbu'ki?

7 Wampangite baa pai' ya malaika pasini bai,

Unng'walike taji ya utukupu na isima,

8 ngabi'ka kila kili'be pai' ya magu'lu' gake."

Ibayilwa panga, Nnu'ngu' ammi'i Kilisitu abe ntawala wa ili'be yoti, lombolya pangali kukileka ata kili'be simo. Ata nyo, nambi'yambi' tummonali kaitawala ili'be yoti. 9 Lakini tummona Yesu ywembe Nnu'ngu' aampangite nsene kulikoni malaika, pasini bai. Aapangite nyo li'nga kwa ndi'la ya ngu'ngu' yake, Yesu awee kwa kitumbu sa kwakosopolya bandu boti. Kwa kitumbu so teselwa no waa kwake, Nnu'ngu' aampei utukupu na isima. 10 Yaabile aki panga Nnu'ngu' ywaumbike na kwipanga ili'be yoti ibe kati mwaibile, aampangite Yesu abe ntimilika kabisa kwa ndi'la ya mateso li'nga aalete bana bambone bapange kiselele muutukupu wake, kwa mwanjaa ywembe ngaalongoya kuukosopoli.

11 Kwa mwanjaa, Yesu na bandu baapeleteya masambi gabe, Tati' babe bamo, naso nga kitumbu panga aibonali oni kwakema alongobe. 12 Kati mwabaya, "We Nnu'ngu', naalu'a kwayaulya alongo bangu' abali yako. Naalu'a kulumba kwa myambo, patukwembana kwa kitumbu sako." 13 Kai' abaya, "Liu'bi'lyo lyangu' nammi'kya Nnu'ngu'." Kai' abaya, "Nenga nibile pano pamope na bana baanipei Nnu'ngu'."

14 Bai, kwa mwanjaa bana babile na yi'ga na myai, naywembe nyinyonyo apangite kiselele kwa gogogo, li'nga kwa ndi'la ya kiwo amwalabiye yu'lu' ywaabile na makakala ga kiwo, lombolya Ibilisi. 15 Kai', Yesu aawile li'nga kwabi'ka ulu bandu babaabile abanda kwa kitumbu so yogopa kiwo mumaisa gabe goti. 16 Kwa mwanjaa kakape panga, ywembe aaisili kwayangatia malaika, ila kwayangatia bababile ba lubelekwo lwa Bulaimu. 17 Kwa kitumbu so, aapalikwe abe kati mwababile akinalongobe kwa makowe goti, li'nga abe mpi'ndo nku'lu' ywa dini ywaabile na kiya no u'bi'li'ka mumengo gake nnu'ngi' ya Nnu'ngu'. Kwa ndi'la yo, aawesite kwipiya salaka ya kwaawana bandu na Nnu'ngu', li'nga Nnu'ngu' aasami bandu masambi gabe. 18 Na kwa mwanjaa Yesu aatipayilwa no ku'su'mbu'lwa, awesa kwayangatia balu' babapayilwa.