1 Kwai'mbu', Nnu'ngu' aalongei na au'ku' bitu kwo pi'tya alondoli bake. Aalongei nabo mala yambone na kwa ndi'la mbali'mbali'. 2 Lakini kwa masu'ba gano ga kuundi'la, alongei na twenga kwo pi'tya Mwana wake ywammi'i panga nnisi wa yoti, kai', kwa ywembe aaumbike dunia. 3 Aywo Mwana alaya ng'alang'atya kwa utukupu wa Nnu'ngu' na ube wake. Aipanga ili'be yoti ikamwane pamope kwa uweso wa liyi'gi'yo lyake. Nembe aaipiyite apange salaka ya kwapeletea bandu masambi gabe, aayi'i kunani no tama kummalyo ga Nnu'ngu' Nku'lu'.

4 Nnu'ngu' aampangite Mwana wake abe nku'lu' kulikoni malaika kati mu'lu' mwaampei lina liku'lu' kulikoni lya malaika. 5 Kwa mwanjaa, ntu'pu' malaika ywoywoti ywaabakiyilwe na Nnu'ngu' panga, "Wenga wa Mwana wangu', nenga li'no nipangike na Tati' bako." Wala ammakiyeli malaika ywoywoti, "Nenga naapanga na Tati' bake, naywembe aapanga Mwana wangu'." 6 Kai', Nnu'ngu' palu' pantumike Mwana wake mmele padunia aabaike, "Malaika bangu' boti bankilikiti." 7 Lakini bu'kana na malaika aatibaya, "Aapangite malaika bake babe kati nsunga, na atumisi bake kati malimi ga mwoto." 8 Lakini bu'kana na Mwana, Nnu'ngu' aatibaya,

Kiti'gu' sako sa lenji, wa Nnu'ngu', saakonda pangali yomoka!

Wenga watawala bandu bako kwa aki.

9 Wenga upenda aki no sukya ulau.

Ngapo Nnu'ngu', Nnu'ngu' wako, akubawi kwa lyengo lyake

kwa kukumiminikiya mauta ga pulaa ngu'lu' kulikoni aino.

10 Na kai',

"Bwana, kwai'mbu' wenga waumbike dunia,

kunani nga lyengo lya maboko gako.

11 Yoti yaabu'ka, lakini wenga waigala masu'ba goti,

yoti yaumala kati ngu'bo.

12 Waaituwana kati likoti,

nayembe yaagalambuyilwa kati ngu'bo.

Lakini wenga wa yu'yu'lu'yu'lu' masu'ba goti,

na maisa gako gaayomokali."

13 Nnu'ngu' ammakiyeli katu ata yumo ywa malaika bake, "Utame kummalyo gangu', mpaka naabi'ke andumu bako pai' ya magu'lu' gako." 14 Malaika nga namani, ila loo babantumikia Nnu'ngu' no tumilwa kwayangatia balu' babakosopolelwa na Nnu'ngu'.