1 Kwa nyo kanetuki'li'bu'ki mayi'gano galu' malongoi gagabu'kana na Kilisitu, ila tuyendeli kasana kwiyi'gana, li'nga tube twaakomala muimani. Kai' kanetuyendeli bi'ka nsingi wa mayi'gano go galambuka bu'kana na yendo yaileta kiwo na ga kumwu'bi'lya Nnu'ngu'. 2 Kai' kanetuyendeli kwiyi'gana mayi'gano ga kwipeleteya yi'ga, ga kwabi'kya bandu moko, ga uyu'ki wa awi'li, na ga ukumu yangayomoka. 3 Na ago ngatulu'a panga, mana aapenda Nnu'ngu'.

4 Bai, baabile bandu babaapeyilwe bweya no pata upo ya kunani, ngabapangilwa umope na Loo Mpeleteu, 5 balu' babaapayite unogau wa Liyi'gi'yo lya Nnu'ngu' na makakala ga utawala wa dunia yayaaisa, 6 bu'kapo mana batu'mbwike muimani yo, iwesekanali kwaki'li'bu'ya li'nga bapate galambuka mala yi'ngi' kai' bu'ka muiyendo yabe ndau. Kwa mwanjaa, bammamba Mwana wa Nnu'ngu' pampanda pabi'li' na kumwisia nnu'ngi' ya bandu.

7 Bwi' waunni'li'lwa ula mala yambone no piya ili'be mbali'mbali' ya kumpwaika nni'mi, awo uteyaliwa na Nnu'ngu'. 8 Lakini bwi' mana kaubaliya mikongo ya mimimwa na manyei, apo ntu'pu' pwaila kwa nni'mi, Nnu'ngu' aikosya lasi na kuundi'la yake kuisonja mwoto.

9 Lakini mwaapendwa bangu', ata ikatei nilongela nya, nibile na ukakape panga mupanga manogau gagalaya panga mukosopolilwe. 10 Nnu'ngu' nga mwene aki, na aalibalyali yendo yinu inannoga yamupangite na upendo wamuulayite kwa kitumbu sake, kwa kwayangatia aumini ainu bu'ka kwamutumbwile mpaka nambi'yambi'. 11 Kilu'lu' situ kila yumo ywinu ayendeli kasana panga nyinyonyo mpaka kuundi'la wake, li'nga galu' gamugau'bi'lya gatimi. 12 Bai, kanemube mwaakata ila mube nsawani na balu' babau'bi'lya no komeya, baapoki galu' goti gaalagi Nnu'ngu'.

13 Nnu'ngu' paampei Bulaimu lilagano lyake, aalapike kwa lina lyake mwene, kwa mwanjaa paabileli na ywoywoti ywaabile nku'lu' kumpi'ta ywembe. 14 Nnu'ngu' ngabaya, "Kakape nilu'a kuyalya na kukupeya lubelekwo lwambone." 15 Bulaimu aali'ndike kwo komeya, bu'kapo nga pokya si'lu' saalagilwe na Nnu'ngu'. 16 Bandu batumya lina lya mundu ywabile nku'lu' muno pi'ta bene li'nga panga lilagyo lyene kilapo. Kilapo kikong'ondelya panga sakilongelelwa nga sa kakape na ntu'pu' ntau bu'kana na so. 17 Nyinyonyo Nnu'ngu' aalikong'ondeli lilagano lyake kwa kilapo. Aapangite nyo kwo pala laya kwa bandu mpu'la panga, babaapokya lilagano lyake lyagalambukali. 18 Nnu'ngu' aapangite ili'be yi' ibi'li', lilagano na kilapo, panga katu aagalambuyali kwa mwanjaa ywembe mmu'su'li. Aapangite nyo li'nga kutuyi'ya mwoyo twatubutuki kasake tuli'ndi'ndi liu'bi'lyo lya makowe gagaaisa. 19 Liu'bi'lyo lyatubile nalyo nga kati kiyi'mi'kyo situ, kikangamala na sa kakape sakituli'ndi'la kiyenda mpaka nsu'gu' ya panjia mulwingo lwa papeleteu muno munyumba ya Nnu'ngu' kunani. 20 Yesu aalongoli yingya pandu palu' kwa kitumbu situ. Apangilwe mpi'ndo nku'lu' ywa dini ywangali yomoka, kati mwaabile Melkisedeki.