1 Melkisedeki aai nkulungwa wa Salemu, na mpi'ndo ywa dini ya Nnu'ngu' Nku'lu', Bulaimu paabile kagobwa bu'ka kungondo kwaabulige akulungwa apo aakwembine na Melkisedeki, nembe ngannyalya Bulaimu. 2 Bulaimu aampei lumo kwa ku'mi ya kila kili'be sabile naso. Na lina lya Melkisedeki lilombolya, "Nkulungwa wa Aki" na kai', "Nkulungwa wa Salemu," lombolya "Nkulungwa wa Amani." 3 Ibayilwa panga abelei ba Melkisedeki, wala lukolo lwake lutanganikweli kai' belekwa no waa kwake kutanganikweli. Ywembe mpi'ndo nku'lu' ywa dini wa milele kati Mwana wa Nnu'ngu'.

4 Lolange aywo Melkisedeki mwaabile nku'lu', ata tati' bitu aku'lu' Bulaimu bampei lumo kwa ku'mi ya ili'be yoti yabaapokonywi kungondo. 5 Bu'kana na salya ya Musa, bandu ba nyumba ya Lawi bababile api'ndo ba dini, bapalikwa pokya lumo kwa ku'mi ya ili'be bu'ka kwa alongo babe ata ikatei nabembe ba lukolo lwa Bulaimu. 6 Aywo Melkisedeki ywembe aabileli ywa lukolo lwa Lawi, lakini ata nyo aapokile lumo kwa ku'mi ya ili'be bu'ka kwa Bulaimu. Na Melkisedeki ngaanyalya Bulaimu ywaapeyilwe lilagano na Nnu'ngu'. 7 Kakape itanganikwe panga ywayalya nga nku'lu' kuliko ywayaliwa. 8 Api'ndo ba dini babapokya lumo kwa ku'mi, bano bandu babawaa. Lakini Melkisedeki ywapoki lumo kwa ku'mi bu'ka kwa Bulaimu ywembe balo nkoti kati mwagabaya Maandiko Mapeleteu. 9 Bulaimu aapiyike lumo kwa ku'mi kwa Melkisedeki, na ata Lawi ywembe lukolo lwake lwalupokya lumo kwa ku'mi. Tuwesa baya panga, Lawi aapiyike kwa Melkisedeki kwo pi'tya au'ku'be Bulaimu. 10 Bulaimu paakwembine na Melkisedeki, Lawi aabile balo belekwa, lakini aabile nkati ya myai ya au'ku'be Bulaimu.

11 Baisilaili baapeyilwe salya ya Musa, na salya yo yabu'kine na upi'ndo nku'lu' wa dini ya Lawi. Ata nyo upi'ndo wa dini wo watimilikeli, kwa kitumbu so ngaapalikwa mpi'ndo ywi'ngi' ywa dini ywabile kati Melkisedeki na ywabu'ka panja ya lukolo lwa Aluni. 12 Kwa mwanjaa paugalambuka upi'ndo wa dini, salya nayembe ipalikwa galambuyilwa. 13 Mpi'ndo nku'lu' wa dini ywalongelelwa pano nga Bwana Yesu, ywembe aabileli Nnawi. Kai' ntu'pu' ywaabile mpangakasi wa upi'ndo nku'lu' wa dini ywabu'kite mulukolo lwake. 14 Mwanjaa itanganikwe panga Bwana witu aapitike mulukolo lwa Yuda, lukolo lwo Musa alongeili bu'kana na upi'ndo wa dini.

15 Makowe go gabile mpu'la muno kwa mwanjaa, mpi'ndo ywi'ngi' ywa dini ywabile kati Melkisedeki apitike. 16 Ywembe apangilweli mpi'ndo ywa dini kwa kitumbu so timisa salya yaibaya panga api'ndo ba dini bapite mulukolo lwa Lawi. Ila apangilwe mpi'ndo ywa dini kwa kitumbu sa makakala gake ga ukoti wangayomoka. 17 Kwa mwanjaa Maandiko gakong'ondelya panga, "Wenga wa mpi'ndo ywa dini milele, kati mwaabile Melkisedeki." 18 Bai, amuli ya kwai'mbu' iputilwe kwa mwanjaa yaai ya ukigopi na yangali pwaika. 19 Kwa mwanjaa salya ya Musa yawesikeli timilisa likowe lyolyoti. Lakini nambi'yambi' tupeyilwe liu'bi'lyo li'ngi' linogau muno lyalitupanga tukombwe kumwegelya Nnu'ngu'.

20 Pamope na go, Nnu'ngu' aabi'kite lilagano lya kumpanga Yesu abe mpi'ndo nku'lu' ywa dini kwa kilapo. Lakini bandu bi'ngi' pabaapangilwe api'ndo ba dini kwaabile ntu'pu' kilapo. 21 Lakini Yesu apangilwe mpi'ndo nku'lu' ywa dini kwa kilapo sa Nnu'ngu'. Nnu'ngu' atikummakia, "Bwana abi'ka lilagano kwa kilapo, naywembe aagalambuyali maganio gake. Wenga wampi'ndo ywa dini milele." 22 Kwa kitumbu sa kilapo si' ilombolya panga Yesu nga ukakape wa lilagano lyalibile linannoga muno kulikoni li'lu' lya nsimu wa Musa.

23 Nsimu wa lilagano lya kwai'mbu' api'ndo ba dini baabile bambone, kwa mwanjaa baayendeli lili kwipanga kasi yabe kwa kitumbu so waa. 24 Lakini Yesu abileli kati bembe, ywembe ywa milele na upi'ndo wake wa dini wa milele. 25 Kwa nyo ywembe akombwa kwakosopolya mpamo bandu boti babamwisilya Nnu'ngu' kwo pi'tya ywembe, kwa mwanjaa ywembe nkoti milele na endakwalu'bya masu'ba goti.

26 Mpi'ndo nku'lu' ywa dini wa sampuli yi' nga ywatumpala muno kasitu kwa mwanjaa, ywembe ntu'pu' kipi'li', mpeleteu, ntu'pu' likosa, abi'kilwe kuutalu na bene sambi no tu'ndu'bi'yi'lwa kunani. 27 Yesu abileli nsawani na api'ndo bi'ngi' ba dini. Balu' babaapalikwe wi'ti' piya salaka kila lisu'ba kwa kitumbu sa masambi gabe bene, bu'kapo ga bandu, ila ywembe aapiyike salaka yimo bai kwa nsimu woti, kai' aipiyike mwene. 28 Salya ya Musa isawage bandu akigopi kwapanga api'ndo aku'lu' ba dini nsawani na bandu boti. Lakini bu'ka pasalya yo, Nnu'ngu' alapite kilapo sakumpanga Mwana apange mpi'ndo nku'lu' ywa dini ywabile ntimilika milele.