1 Kwa mwanjaa, kila mpi'ndo nku'lu' ywa dini ayi'mi'kilwe kuntumikia Nnu'ngu' kwa kitumbu sa bandu li'nga apiye mapiyo na salaka kwa kitumbu sa sambi. 2 Kwa mwanjaa mwene nkigopi, awesa kwabi'kya kiya balu' babapanga makosa pangali tanga. 3 Kwa nyo, apalikwa piya salaka kwenda kwa bandu bi'ngi' baili, ila na kwa kitumbu sa masambi gake mwene. 4 Ntu'pu' mundu ywawesa kwipeya mwene isima ya kwipanga mpi'ndo ywa dini. Kila mundu asaulilwa na Nnu'ngu' apange mpi'ndo ywa dini kati mwaabile Aluni.

5 Nyinyonyo nembe Kilisitu aaipangiteli mwene isima yo panga mpi'ndo ywa dini, ila mwene Nnu'ngu' ngansawile na kummakia, "Wenga wa Mwana wangu', nenga li'no nipangike na Tati' bako." 6 Aalongei kai' pandu pi'ngi', "Wenga nga wampi'ndo ywa dini milele kati mwaabile Melkisedeki."

7 Yesu aatami pano padunia, kwa kili'lo kiku'lu' na moli, kasalya na kunnu'ba Nnu'ngu' mwene uweso wa kunkosopolya bu'ka kiwo. Kwa mwanjaa apangage isima kwa Nnu'ngu', nembe ngannyu'wa. 8 Pamope no panga Yesu aai Mwana wa Nnu'ngu', aaiyi'ganiye yu'wa kwa ndi'la ya mateso gagampatage. 9 Bu'kana na lyo, Nnu'ngu' aampangite Yesu abe kitumbu sa ukosopoli wa milele, kwa boti babannyu'wa. 10 Nembe Nnu'ngu' ngansawa panga mpi'ndo nku'lu' ywa dini kati mwaabile Melkisedeki.

11 Tubile na makowe gambone go longela bu'kana na Yesu panga mpi'ndo ywa dini, lakini inonwipe kummakiyanga, kwa mwanjaa mwenga mwatopau bo tanga. 12 Sai'no mwenga mwaapalikwe panga mwa balimu, lakini mukabalo pala mundu ywa kunnyi'gana, mayi'gano malongoi ga liyi'gi'yo lya Nnu'ngu'. Mupalikwa pelya mabele paali pa kilyo kinonopau. 13 Kila ywapalikwa pelya mabele bai akabalo mwana, nnangu'ta atangiteli makowe ga aki nga kili'gani. 14 Lakini kilyo kinonopau kili'ngana kwa bandu akomala, babayobelile no tanga manogau na maakau.