1 Imani ngo baa na ukakape wa makowe gatugalolela, no u'bi'lya mpamo makowe gangali bonekana. 2 Mwanjaa imani ya sampuli yi', au'ku' bitu ba kwai'mbu' bampulaise Nnu'ngu'.

3 Kwa imani, tutangite panga dunia yaaumbilwe kwa amuli ya Nnu'ngu', ayi' ilombolya panga ili'be yaibonekana, yaaumbilwe kwa ili'be yangali bonekana.

4 Kwa imani, Abeli aampikiye Nnu'ngu' salaka inannoga muno kulikoni Kaini. Kwa imani yo Nnu'ngu' ngammalangilya Abeli panga mundu mwene aki kwa kwipokya salaka yake. Pamope no panga Abeli aawile lakini mpaka nambi'yambi' imani yake iyendelya longela kwitu.

5 Kwa imani, Enoki aamiyilwe bu'ka mudunia pangali waa. Aabonekineli kai', kwa mwanjaa Nnu'ngu' aantweti yenda kunani. Kwa mwanjaa Maandiko Mapeleteu gabaya panga, paabile balo tolelwa apangage makowe manogau kwa Nnu'ngu'. 6 Lakini pangali imani iwesekanali kunnogelelya Nnu'ngu', kwa mwanjaa kila mundu ywaisa kwa Nnu'ngu' apalikwa au'bi'li panga Nnu'ngu' abile, na apeya upo balu' babampala kwo binia.

7 Kwa imani, Nuu paakwi'li'kilwe na Nnu'ngu' bu'kana na makowe gagaabile balo bonekana, ngannyu'wa na aatengenise safina li'nga kwikosopolya mwene na akinalongobe. Bu'kana na go, dunia yoti ngaiukumilwa. Naywembe Nuu kwa imani yake, ngabalangilwa panga mundu mwene aki kwa Nnu'ngu'.

8 Kwa imani, Bulaimu annyu'wine Nnu'ngu' paakemilwe ayende kunni'ma waapeyilwe na Nnu'ngu' ube wake, pamope no panga aatangiteli pandu payenda. 9 Kwa imani, aatami kati nng'eni kunni'ma waalagilwe na Nnu'ngu'. Aatami mumaema pamope na Isaki na Yakobi babaapoki malagano gaagalu'galu' bu'ka kwa Nnu'ngu'. 10 Kwa mwanjaa Bulaimu aabile kaupi'kanilya nni'ma wene misingi yo konda, na mwene Nnu'ngu' ngaywaubi'i wiso na kuusenga. 11 Kwa imani Sala pamope no panga aai nng'oi muno, aau'bi'li panga Nnu'ngu' alu'a timisa lilagano lyake, ngayi'ma ndumbo. 12 Kwa nyo, bu'kana na mundu yu' yumo yani Bulaimu, ywaabile kati ng'waa, ngababelekwa bandu bambone kati ndondwa ya kumaunde na lwangi lwa kumbwani lwangabalangika.

13 Bandu ba boti baawile muimani pangali pokya li'lu' lilagano, lakini baalibweni kwa kuutalu na ngabalikwi'ndi'lya. Na bembe baayi'ki'tile panga, baabile ageni na api'ta ndi'la bai pano padunia. 14 Bandu bababaya makowe kati ga, balaya mpu'la panga bapala nni'ma wabe bene. 15 Kenda bakaku'mbu'kya nni'ma wabaulei patumbu, balu'e pata lipala lyo buyangania kwo. 16 Lakini bandu ba baminyikiya nni'ma unannoga muno, yani nni'ma wa kunani. Kwa nyo Nnu'ngu' aisikali kemelwa Nnu'ngu' wabe, kwa mwanjaa ywembe ayomwike kwabi'kya wiso muyi wabe.

17 Kwa imani, Bulaimu paapayilwe na Nnu'ngu' kumpiya salaka mwana wake wa kisake Isaki, aayi'ki'ti kumpiya kwa Nnu'ngu' pamope no panga ywembe ngaywaapoki lilagano lyo, 18 kwa mwanjaa Nnu'ngu' ammakiye, "Kwa ndi'la ya Isaki walu'a pata lubelekwo lwalwaakemelwa lwako." 19 Bulaimu au'bi'li panga Nnu'ngu' awesa kwayu'ya bandu bu'ka kuuwi'li. Nnu'ngu' pankanikiye Bulaimu kummulaga Isaki, yaai nga kati ayu'yi'lwe kai' bu'ka kuuwi'li.

20 Kwa imani, Isaki aatikwayalya Yakobi na Esau bu'kana na maisa gabe ga masu'ba gagaaisa. 21 Kwa imani, Yakobi paabile kaegelya waa, ngaayalya bana boti abi'li' ba Yusupu, ngankilikitya Nnu'ngu', ku'no ayegekile ntwe wake mu yi'lu' pimbo yake.

22 Kwa imani, Yusupu paabile papipi no waa, aabakiye Baisilaili babu'ke na yupa yake pabaabu'ka kunni'ma wa Misili.

23 Kwa imani, abelei ba Musa bammwiyite mwana wabe kwa myei itatu bu'ka belekwa, kwa mwanjaa baamweni mwana nng'olou, na wala baaiyogwipeli amuli ya nkulungwa wabe Falao.

24 Kwa imani, Musa paakomile, aakani kemelwa mwana wa biti Falao. 25 Aibweni nantali pata ngu'su'mbu' pamope na bandu ba Nnu'ngu', kulikoni pulaikya makowe ga sambi kwa masu'ba nsi'si' bai. 26 Aibweni pata ngu'su'mbu' kwa kitumbu sa Kilisitu kubile na pwaila ngu'lu' kulikoni utayili woti wa kunni'ma wa Misili, kwa mwanjaa aabile kapi'kanilya pata upo bu'ka kwa Nnu'ngu' kwa masu'ba gagaisa.

27 Kwa imani Musa aabu'i Misili pangali yogopa nyongo ya nkulungwa, na aaki'li'bu'kili nsu'gu' kwa mwanjaa, aabile kati mundu ywamweni Nnu'ngu' ywangali bonekana. 28 Kwa imani yoyoyo Musa aaibi'i Pasika, ngaabakia Baisilaili bapakaye myai panani ya milyango, li'nga yu'lu' malaika ywalangamisa paapi'ta aakane kwalangamisa abele analu'me ba Baisilaili.

29 Kwa imani, Baisilaili baalokite Baali ya Shamu kati batyanga muuyu'mu, lakini Amisili pabaapayite loka, masi' gaatikwawi'ki'lya, boti ngabawaa.

30 Kwa imani, ingu'mbi' ya Yeliko yaabomwanike bu'ka pa Baisilaili tyanga kabati'li'ta kwa masu'ba saba. 31 Kwa imani, Rahabu yu'lu' mpege aalangamisweli pamope na balu' babaankani Nnu'ngu', kwa mwanjaa ywembe aakemi balu' apekeseni.

32 Bai, nilongele namani kai'? Wakati unili'nganali wo yaulya bu'kana na imani ya Gideoni, Balaki, Samsoni, Yefta, Daudi, Samweli na alondoli. 33 Kwa imani, bandu bo baaku'mbwaniye ngondo na akulungwa, ngabasinda. Baapangite makowe ga aki no pokya gabalagilwe na Nnu'ngu'. Baatabite mikano ya imba. 34 Ngabaimiya mwoto nkali', baaponagilwe bulagilwa kwa lipanga, baabile akigopi lakini Nnu'ngu' ngaapeya makakala. Baabile akangamala mungondo, ngabagasinda mayesi ga kigeni. 35 Alwawa baapoki bandu babe babaabile awaa, bayu'yi'lwe.

Lakini bi'ngi' baatiku'su'mbu'lwa na bembe ngabakana yu'gu'li'lwa, li'nga baapate yu'yi'lwa no yingya mumaisa ganannoga muno. 36 Bi'ngi' baatisalangilwa no ku'mbu'lwa mikwasu, na bi'ngi' baatabilwe minyololo no taikulilwa muutabilwe. 37 Na bi'ngi' baaku'mbu'lilwe maliwe no bulagilwa, bi'ngi' baakatilwe ipande ipande na nsumeno, bi'ngi' babulagilwe kwa lipanga. Baati'li'tike ti'li'tike ku'no baweti maki'ngo ga ngondolo na mbwi, baabile bandu aki'ba, bendeteselwa no pangilwa manyatau. 38 Bandu bo baawike mulupu'ngu'ti' na muitu'mbi', baabile kabatama mumapango na mumai'mbwa. Dunia yaapalikweli baa na bandu anogau kati bo.

39 Bandu ba boti Nnu'ngu' aatipulaika nabo kwa kitumbu sa imani yabe, lakini ntu'pu' ata yumo ywabe ywaapoki si'lu' sabaalagilwe na Nnu'ngu'. 40 Kwa mwanjaa, Nnu'ngu' aalongoli kutubi'kya kili'be sa ngama muno li'nga bembe kanebatimilike pangali twenga.