1 Muulole upendo nku'lu' kati gu', wabatupendi Tati' ata tukemelwa twabana ba Nnu'ngu', na kakape ngamwatubile. Na kwa nyo bandu ba dunia batutangiteli kwa mwanjaa bembe bantangiteli Nnu'ngu'. 2 Mwaapendwa, mpaka nambi'yambi' tutangite panga twabana ba Nnu'ngu', ata nnyo inatanganikwali mpu'la mwatwalu'a baa, ila tutangite panga, Kilisitu paalu'a ki'li'bu'ka kai' twaalu'a landana nakwe kwa mwanjaa twalu'a kummona kati mwabile. 3 Bai, kila mundu mwene liu'bi'lyo lyo kwa Kilisitu apalikwa aipeleteye kati Kilisitu mwabile Mpeleteu muno.

4 Kila mundu ywapanga sambi aiti'kwana salya ya Nnu'ngu', kwa mwanjaa sambi iti'kwana salya. 5 Mwenga mutangite panga Kilisitu aaisi li'nga kugabu'ya masambi ga bandu, na kwake ywembe ntu'pu' sambi yoyoti. 6 Kwa nyo, kila mundu ywatama nkati ya Kilisitu apangali sambi kai', na ywapanga sambi amwenili ywembe na wala antangiteli. 7 Bai mwabana bangu', kanemuyi'ki'ti mundu ankonge, kila mundu ywapanga makowe ga aki nga mundu wa aki, kati Kilisitu mwabile wa aki. 8 Ywoywoti ywapanga sambi, aywo nga ywa Ibilisi, kwa mwanjaa Ibilisi aapangite sambi bu'ka kwai'mbu'. Kwa nyo, aso nga kitumbu so isa kwa Mwana wa Nnu'ngu' padunia li'nga kulialabia lyengo lya Ibilisi.

9 Ywoywoti ywabelekwi kwa Nnu'ngu' apangali sambi, kwa mwanjaa abile na maisa gayambi' gapeyilwe na Nnu'ngu'. Ayendelyali panga sambi kwa mwanjaa ywembe abelekwi kwa Nnu'ngu'. 10 Yu'lu' ywakotoka kugapanga makowe ga aki au ywakotoka kumpenda mumini nnyine, aywo abelekwili kwa Nnu'ngu'. Yi'no nga ndi'la yailaya panga ywaku' mwana wa Ibilisi, na ywaku' ywabelekwi kwa Nnu'ngu'.

11 Abali yi'no ngayamwiyu'wine bu'ka tokyaa, panga tupalikwa pendana twabene na bene. 12 Kanemube kati Kaini ywaalongoyilwe na Ibilisi, aammulige nnunawe. Aammulige kwa mwanjaa ywembe abile na makowe malau, lakini nnunawe abile nnogau.

13 Mwaalongo bangu' kanemusangale mana bandu ba dunia kabansukwa. 14 Twenga tutangite panga tupite mukiwo no yingya muukoto, kwa kitumbu sa kwapenda aumini aitu. Mundu ywaasukya aumini aine, aywo atama nkati ya kiwo. 15 Ywoywoti ywaasukya aumini aine, aywo mmulagi, na mutangite panga kila ywabulaga ntu'pu' ukoti wa milele nkati yake. 16 Kwa kitumbu si' twenga tupatike tanga upendo wa Nnu'ngu', kwa mwanjaa Yesu Kilisitu aapiyike maisa gake kwa kitumbu situ. Na twenga tupalikwa kugapiya maisa gitu kwa aumini aitu. 17 Manaitei mundu abile na mali ya padunia, na kammona mundu nnyine kapala, lakini abileli na mwoyo wa kunnyangatia, buli upendo wa Nnu'ngu' utama nkati yake? 18 Mwabana bangu', upendo witu kaneube wa pankano bai, ila ube wa kakape na iyendo.

19 Bai amo nga mwatwalu'a tanga panga twenga twabandu ba kweli, kwa nyo myoyo yitu yabaali na kyukala nnu'ngi' ya Nnu'ngu'. 20 Ata ikatei myoyo yitu yendatuukumu, tubile na amani kwa mwanjaa Nnu'ngu' nga nku'lu' kulikoni myoyo yitu, naywembe atangite kila kili'be. 21 Mwaapendwa bangu', manaitei myoyo yitu kaikotoka kutuukumu, twendakombwa egelya nnu'ngi' ya Nnu'ngu' pangali kyukala, 22 kai' tukombwa pokya kila satukilu'ba kasake, kwa mwanjaa twendakunnyu'wa na kugapanga gagannogelelya. 23 Na amuli yake nga yi'no, panga tumwu'bi'li Mwana wake Yesu Kilisitu na tupendane twabene na bene kati mwatuamulise. 24 Bandu boti babaiyu'wa salya ya Nnu'ngu' batama nkati yake na ywembe nkati yabe, na tutangite panga atama nkati yitu kwa kitumbu sa Loo Mpeleteu ywatupeile.