1 Mwabana bangu' mwamupendilwe, nimwandikile makowe ga li'nga kane mupange sambi, lakini mana aapita yumo panga sambi, tubile nakwe yu'lu' ywatulu'bya kwa Tati' naywembe nga Yesu Kilisitu mwene aki. 2 Kilisitu nga salaka yaipiyilwe kwa kitumbu so samya masambi gitu, na kwenda kwa masambi gitu baili ila na kwa masambi ga bandu boti ba padunia.

3 Mana twalu'a kwiyu'wa amuli ya Nnu'ngu', apo nga tuwesa baya panga tuntangite. 4 Mundu mana kabaya panga antangite Nnu'ngu', lakini kakana yu'wa amuli yake, mundu ywo mmu'su'bu'su' na ukakape ntu'pu' nkati yake. 5 Lakini mundu ywoywoti ywaliyu'wa liyi'gi'yo lya Nnu'ngu', aywo nga ywabile nawo upendo wautimilike kwa Nnu'ngu' nkati yake, na kwa nyo tutanga panga tutama nkati yake. 6 Mundu ywoywoti ywabaya panga atama nkati ya Nnu'ngu', apalikwa atame kati mu'lu' mwaatami Yesu Kilisitu.

7 Mwaapendwa bangu', nimwandikyangali amuli yayambi' ila yi'yi'lu'yi'lu' yamwabile nayo bu'ka tokyaa. Amuli ya kwai'mbu' yo, nga li'lu' liyi'gi'yo lyamwaaliyu'wine. 8 Ata nyo nimwandikyanga amuli yayambi' na ukakape wake ubonekana nkati yake Kilisitu na kwinu, kwa mwanjaa lubi'ndu' lwendabu'ka, na bweya wa kakape utumbwile mulika.

9 Mundu ywoywoti mana kabaya panga atama mubweya, lakini kansukya mumini nnyine, aywo balo akatama mulubi'ndu'. 10 Ywoywoti ywampenda mumini nnyine, aywo atama mubweya, na ntu'pu' kili'be sosoti nkati yake sakumpanga mundu ywi'ngi' apange sambi. 11 Lakini mundu ywansukya mumini nnyine, atama mulubi'ndu' no tyanga mulubi'ndu' na atangiteli kwayenda kwa mwanjaa lubi'ndu' lumpangite abe mbulibuli.

12 Nimwandikyanga mwabana bangu' mwamupendilwe, kwa mwanjaa masambi ginu gasamilwe kwa ndi'la ya Yesu Kilisitu.

13 Nimwandikyanga mwenga mwaakinatati' kwa mwanjaa muntangite ywembe ywaabile tangu' kwai'mbu'.

Nimwandikyanga mwenga mwaang'elo kwa mwanjaa munsindike yu'lu' Nnau.

Nimwandikyanga mwenga mwabana kwa mwanjaa mwatangite Tati'.

14 Nimwandikyanga mwenga mwaakinatati' kwa mwanjaa muntangite ywembe ywaabile tangu' kwai'mbu'.

Nimwandikyanga mwenga mwaang'elo kwa mwanjaa mubile na makakala,

Liyi'gi'yo lya Nnu'ngu' litama nkati yinu

na mwenga munsindike yu'lu' Nnau.

15 Kanemwipende dunia wala makowe gagabile nkati yake, kwa mwanjaa mundu ywaipenda dunia, upendo wa Tati' Nnu'ngu' upanga ntu'pu' nkati yake. 16 Kwa mwanjaa kila kili'be sakibile mudunia, kati maminyikiyo ga payi'ga, maminyikiyo ga minyo, kwipuna mumaisa, ago goti gabu'kali kwa Tati', ila gabu'ka mudunia. 17 Nayembe dunia na maminyikiyo gake, ago gendapi'ta bai. Lakini mundu ywapanga mwapendi Nnu'ngu', aywo alama milele.

18 Mwabana bangu' mwamupendilwe, masu'ba ga kuundi'la gaegelile! Muyu'wine panga nndumu wa Kilisitu endaisa, lakini mpaka nambi'yambi' andumu bambone ba Kilisitu bayomwike pitya. Kwa nyo, tutanga panga masu'ba ga kuundi'la gaegelile. 19 Bandu ba bapitike mukipi'nga situ lakini baabileli kweli ba kipi'nga situ, na kwa kitumbu so ngabaatulei. Bakapangage bitu balu'e tulekali na balu'e tama pamope na twenga. Lakini baatulei li'nga ibonekane mpu'la panga baabileli mukipi'nga situ.

20 Lakini mwenga mupeyilwe na Yesu Kilisitu Loo Mpeleteu wake, kwa nyo mwaboti muutangite ukakape. 21 Bai, nimwandikyanga kwenda muomongwa ukakape lili, ila kwa mwanjaa muutangite, na mwenga mutangite panga ntu'pu' ubu'su' wowoti waupita mukakape.

22 Buli, mmu'su'bu'su' nga nyai? Mmu'su'bu'su' nga mundu yu'lu' ywabaya panga Yesu nga Kilisitu lili. Mundu wa kubi nnya, nga nndumu wa Kilisitu ywaakana Tati' na Mwana. 23 Kwa mwanjaa ywoywoti ywankana Mwana, aakosa Tati' na ywoywoti ywannyi'ki'tya Mwana aapata na Tati' kai'.

24 Kwa nyo, likowe lyamwaaliyu'wine bu'ka patumbu mulikote nkati ya myoyo yinu. Na mana mwalikota mumyoyo yinu likowe li'lu' lya patumbu, mwalu'a tama nkati ya Mwana na Tati'. 25 Kilisitu mwene aatulagi panga twapokya ukoto wangayomoka.

26 Nimwandikyangite makowe gano kwa kitumbu sa bandu balu' babapala kumwobeya mwenga. 27 Kwa mwenga Kilisitu ampeyangite Loo Mpeleteu, naywembe atama nkati yinu. Aywo ngaywannyi'gana goti, na mayi'gano gake ga kakape na gaku'pi'yali. Kwa nyo, mupalali yi'ganilwa na ywi'ngi', kati mwamuyi'ganilwe na Loo Mpeleteu. Bai, muyendeli tama nkati ya Kilisitu.

28 Nambi'yambi' mwabana bangu' mwamupendilwe, mutame nkati yake li'nga paalu'a umukulilwa, twabe twaakangamala li'nga twakaneisika nnu'ngi' yake nsimu wo isa kwake. 29 Mana mutangite panga Kilisitu nga mwene aki, bai mupalikwa tanga kai' panga kila ywapanga aki abelekwi kwa Nnu'ngu'.