João 13

Yesu agu’lwa magu’lu' atumilwe

1 Lyaaigali lisu’ba limo nnu’ngi' lyo timya kwa si’li’ku’si’li’ku' ya Pasika, Yesu aatangite panga saa yake yo bu’ka mudunia no yenda kwa Tati' yaikite. Aapendi bandu bake babaai mudunia, kakape aapendi mpaka kuundi’la!

2 Bai, Yesu na banamasi' bake baai batami pakilyo sa kitamwiyo. Ibilisi ansopite Yuda, mwana wa Simoni Isikalioti, li’nga ansongi Yesu. 3 Yesu aatangite panga Tati' bampei kila kili’be, no panga aaumi kwa Nnu’ngu' na abukiya kwa Nnu’ngu'. 4 Bai, aabu’i pamesa, ngabi’ka pambwega nganju yake, tola kitambala na kwitaba mukibuno. 5 Bu’kapo ngayi’ya masi' mukibakuli, tumbwa kwagu’lwa banamasi' bake magu’lu' na kwaponwa kwa si’lu' kitambala saaitabite nkibuno. 6 Bai, paamwiki Simoni Petili, Petili ngabaya, "Bwana, upala kunigu’lwa nenga magu’lu'?" 7 Yesu ngayangwa, "Nambi’yambi' utangiteli sanikipanga, lakini nnu’ngi' waalu’a kitanga." 8 Petili ngammakia, "Wenga katu unigu’lwali magu’lu' gangu'!" Yesu ngayangwa, "Mana kaukana kukugu’lwa magu’lu' gako, katu walu’mbanali nanenga." 9 Simoni Petili ngannyangwa, "Bwana, unigu’lwe, kai' magu’lu' baili, ila maboko gangu' na ntwe." 10 Yesu ngammakia, "Ywau’gite ili’ngani ipalikwali uluwa ila magu’lu' bai, kwa mwanjaa yi’ga yake ipeletike. Mwenga mupeletike ila mwaboti lili." 11 (Yesu aantangite yu’lu' ywapalage kunsongya, kwa nyo ngabaya, "Mwenga mupeletike ila mwabotili.")

12 Paayomwi kwagu’lwa magu’lu' no wala kai' ngu’bo yake, ngatama pamesa, na kwabakia, "Buli, mulitangite likowe lyanimpangile? 13 Mwenga munikema ‘Mwalimu’ na ‘Bwana’, mwenga mubaya kweli, kwa mwanjaa nga nenga. 14 Bai, manaitei nenga ngana Bwana kai' na Mwalimu ninng’u’lwangite mwenga magu’lu', na mwenga mupalikwa gu’lwana magu’lu'. 15 Ninnayangite makowe ga li’nga namwenga muyige mupange kati mwanimpangile. 16 Kakape nimmakianga, ntumisi nku’lu' li kulikoni bwana wake, wala ntumilwa nku’lu' li kulikoni yu’lu' ywantumike. 17 Bai, mana mugatangite ga, yapanga nantali mana mwaagapanga.