1 Nenga na Pauli namwene nendakunnu'banga muno, kwa pangali kibuli na kwo utu'li wake Kilisitu, nenga nanibayilwa panga nendayogopa panibaa pamope na mwenga, lakini panibaa kuutalu na mwenga nankali'. 2 Ninnu'banga panga, panaaisa kasinu, kanemwanipange nibe nankali'. Nibaya nya kwa mwanjaa nitangite panga nawesa baa nankali' kwa bandu boti babagania panga twenga tutama kati twabandu ba padunia yi'no. 3 Pamope no panga tutama mudunia yi'no, lakini tuku'mbwanali ngondo kati mwabaku'mbwana bandu ba padunia yi'no. 4 Kwa mwanjaa yombo yatutumya mungondo yitu, kati yabatumya bandu ba padunia lili, ila ibile na makakala gagabu'ka kwa Nnu'ngu' gagawesa bomwana lubi'go lwa andumu na maganio goti ga ubu'su', 5 no bomwana iku'balo yoti yabaipunia bandu kwo taukya ilimu ya Nnu'ngu'. Kai' tugaboywa na kugataba mawaso gabe goti, li'nga gawese kunnyu'wa Kilisitu. 6 Twenga tuyi'mi wiso kumpwatya kila mundu ywangali yu'wa, lakini tupala wi'ti' mwenga mube mwaatimilika kwo yu'wa kati mwaipalikwa.

7 Mwenga mulingulya makowe kwa panja bai. Mundu ywoywoti ywaibona panga ywembe nga ywa Kilisitu, aku'mbu'ki panga na twenga kai' twabandu ba Kilisitu kati ywembe mwabile ywa Kilisitu. 8 Pi'ngi' nibonekana panga nendakwilumba muno bu'kana na utawala watupei Bwana. Lakini ata nyo niibonali oni kwa mwanjaa utawala wo, woalabiya lili, ila wokangamaya imani yinu. 9 Nikana bonekana panga mubalua yangu' nendakunnyogoya. 10 Nibaya nyo kwa mwanjaa bi'ngi' babaya panga, "Balua ya Pauli ibile na milongelo minonopau na mikali'. Lakini pabaa papipi na twenga apanga ntu'pu' makakala, kai' milongelo yake ipanga kati ntu'pu' maana." 11 Bandu kati bo batange panga, galu' gatubaya mubalua patubaa kuutalu na mwenga, nga nyinyonyo mwatupanga ata mana twabaa pamope na mwenga.

12 Twenga tulowali kwibi'ka au kwilandaniya na balu' bandu babailumba bene. Bandu babaipanga bembe panga nga kili'ngo sa kwili'ngya, na bandu babailandanisa bene na bene, abo balaya panga alogeloge. 13 Lakini twenga twaailumbali pi'ta kili'ngo sa lyengo lyatupeyilwe. Ila, twalu'a kwilumba bu'kana na mipaka yatuikiye mulyengo lyaatupei Nnu'ngu' bai, na mipaka yi' ngaimwikya ata mwenga. 14 Manaitei twenga tunaikali kasinu, ntu'pu' kitumbu sa kwilumba, lakini tuwesa kwilumba kwa mwanjaa twaai twalongoi isa kunnetya Abali Inannoga yaibu'kana na Kilisitu. 15 Wala kwilumba kwitu kwa kitumbu sa lyengo lyabapangite bandu bi'ngi' lili, ila tuu'bi'lya panga imani yinu mwaiyendelya ku'la, lyengo litu pakati yinu ngapalyayendelya ku'la. 16 Apo ngapatwawesa ala Abali Inannoga mumili'ma ya kuutalu pi'ta mili'ma yinu, kwa mwanjaa tukana kwilumba bu'kana na lyengo lyaliyomwike pangilwa pandu pa mundu ywi'ngi'.

17 Lakini kati mwagabaya Maandiko mapeleteu, "Mundu ywoywoti ywailumba, na ailumbe bu'kana na lyengo lya Bwana." 18 Mundu ywayi'ki'ti'lwa, kwenda yu'lu' ywailumba mwene lili, ila yu'lu' ywalumbilwa na Bwana.