1 Ata ikatei nilongela kati nannogeloge pasene, nilu'ba munikomeye. Eloo, munikomeye pasene. 2 Nimmi'kya bwigu, lakini bwigu waubu'ka kwa Nnu'ngu', kwa mwanjaa mwenga mubile kati nnwawa mwi'nja ywanankobeki nnalu'me yumo, li'nga ninnete kwa Kilisitu. 3 Lakini nambi'yambi' niyogopa panga kati mwaakongilwe Awa na yu'lu' nng'ambo nng'anga, namwenga mwaakongelwa no kotoka kumpenda Kilisitu kwo nogeya na upeleteu. 4 Nibaya nya, kwa mwanjaa mwenga muyu'ngu'ya kumpokya mundu ywaisa ala makowe gagapi'yana na galu' ga Yesu mwatwaalike twenga. Kai' mupokya loo ywi'ngi' au mayi'gano gi'ngi' kwa kiyu'ngu'ya, pamope no panga galandanali na galu' gamwaapokile bu'ka kwitu.

5 Nenga niibonali panga nansene pi'ta abo babaipanga kati "atumilwe aku'lu'." 6 Iwesa panga nenga niwesali longela wisowiso, lakini kwa ilimu, nibile wiso. Na likowe li' tulilayite mpu'la kwinu kwa masu'ba goti na kwa ndi'la yoti.

7 Buli, naapangite sambi kwiuluya namwene li'nga kuntu'ndu'bi'ya mwenga, kwa kumwalya Injili ya Nnu'ngu' pangali li'pi'lwa? 8 Panaabile kanintumikia mwenga, naabile kanipokya liposo bu'ka mumakanisa gi'ngi', na yaai kati naapokonywa mali yabe li'nga nintumikiye mwenga. 9 Panaabile na mwenga no pu'ngu'ki'lwa, naabileli na kigombo kwa mundu ywoywoti. Kwa mwanjaa alongo bu'ka Makedonia baanileti kila sanipalage, na naatikwili'ndi'la muno li'nga naakane baa na kigombo kwinu, na nilu'a yendelya panga nyo. 10 Kati mwaibile kweli ya Kilisitu nkati yangu', ntu'pu' mundu ywoywoti munkoa wa Akaya ywawesa kunikanikia kwilumba bu'kana na alyo. 11 Mwanjaa namani nibaya ngani kumpeya kigombo? Buli, mugania nimpendili? Lili! Nnu'ngu' atangite panga nendakumpenda!

12 Nilu'a yendelya panga kasi kati mu'lu' mwanipanga nambi'yambi', li'nga atumilwe bo babaipanga kati bembe nga aku'lu' kanebapate lipala lya kwilumba panga bapanga kasi kati twenga. 13 Bandu kati bo nga atumilwe ba ubu'su', bapanga kasi ya kwakonga bandu, na kwipanga kati atumilwe ba Kilisitu. 14 Wala likowe lyo sangalali, kwa mwanjaa ata Ibilisi mwene aipanga kati malaika wa bweya. 15 Kwa nyo alyo likowe lyo sangalali, manaitei abo atumisi bake kabaipanga kati atumisi ba aki, kuundi'la baalu'a pata si'lu' sabapalikwa pata bu'kana na iyendo yabe.

16 Kai' nibaya nnyinya, mundu ywoywoti kaneaganiye panga nenga nannogeloge. Lakini ata mana kamugania nyo, bai munipoki kati na nnogeloge li'nga nipate kwilumba pasene. 17 Milongelo ya kwilumba yaniilongela nambi'yambi', ibu'kali kwa Bwana, ila nilongela kati nannogeloge. 18 Kwa mwanjaa baingi bendakwilumba kati bandu ba dunia mwabapanga, na nenga nilu'a kwilumba. 19 Mwenga mwabene ikima, ngamuwesa kwakomeya ata alogeloge. 20 Munkomeya ata mundu ywaapanga abanda, mundu ywannyibya na kumpokonywa mali yinu, ywansalawa na kunku'mbwa kuminyo. 21 Niibona oni panga, twaabile "twa akigopi muno" kugapanga makowe kati go kasinu.

Lakini mana kubile na mundu ywaalowa kwilumba, na nenga naalowa kwilumba kwa likowe lyo. (Nilongela nya kati nannogeloge.) 22 Manaitei bembe Aebrania au Baisilaili au bembe ba lukolo lwa Bulaimu, bai na nenga nyinyonyo kai'. 23 Nambi'yambi' nilu'a longela kati niminya lilalu', buli bembe atumisi ba Kilisitu? Ata nenga nantumisi wa Kilisitu pi'ta bembe. Nenga nipangite kasi inannonopa muno, nitami muutabilwe kwa mala yambone muno, na kwa mala yambone niteku'mbu'lwa, kai' naabile mmaule go waa kwa mala yambone. 24 Nimesilwe mikwasu salasini na tisa na Ayahudi kwa kila panimeselwa, mpaka mala tano. 25 Nimesilwe mikwasu kwa mala itatu, naai papipi no waa kwo ku'mbu'lwa maliwe mala yimo. Ngalaba yaanialabiki mala itatu, na amo naakelike mubaali kilo na muntwekati yake. 26 Kwa mala yambone mumyanja yangu' nikwembine na tabu ya nkukulo mumabi'ndi', nikwembine na tabu ya apokonyoli, tabu yaibu'ka kwa Ayahudi ayangu' na yaibu'ka kwa bandu bangali Ayahudi. Naapatike tabu panaabile pakilambo, mmwitu na mubaali, naabile mmaule bu'kana na babaipanga aumini aitu na kumbe lili. 27 Nipangite kasi inanonopa no totoyelwa, kwa mala yambone nitekeleka, nitangite tama na njala na kwibona nnyota, kwa mala yambone nitami na njala kwo kosa kilyo no tama mumbepo pangali ngu'bo. 28 Pamope na go goti, kila lisu'ba nibile na kigombo sa kasi yangu' kwa makanisa goti. 29 Manaitei mundu ywi'ngi' kigopi, nanenga niibona nakigopi. Nyinyonyo, mundu ywoywoti payingiyilwa musambi, mwoyo wangu' wendalumya muno.

30 Mana kanipalikwa kwilumba, nilu'a kwilumba bu'kana na ukigopi wangu'. 31 Nnu'ngu', Tati' ba Bwana Yesu, ywapalikwa lumbilwa milele, atangite panga nilongelali ubu'su'. 32 Panaabile Damasko ntawala ywaabile pai' ya nkulungwa Areta, aabile kaaniyu'bi'lya pakilambo sa Damasko li'nga aniboywe. 33 Lakini naauluyilwe mukitu'ndu' kiku'lu' kwo pi'tya mulilisa lya mukingu'mbi', nganiku'su'pu'ka bu'ka mumaboko gake.