1 Kwa nyo, pamwoyo wangu' naabini kanenise kasinu kai', li'nga naakane kunnumiya mwenga. 2 Kwa mwanjaa, mana nimpangite mwenga muusunike, ntu'pu' ywaalu'a nipanga nipulaike kai', ila mwenga mwanimpangite muusunike! 3 Naandike nyo li'nga mana niisile mwakane kuniusunisa, mwabandu mwamupalikwa kunipanga nenga nipulaike. Niu'bi'lya panga, nenga mana nipulaike, nyinyonyo na mwenga mwaboti mwapulaika. 4 Namwandiki balua yi'lu' kwa lwu'ngu' na maku'ku'li'ko makali' pamwoyo wangu', kai' na kwa moli gambone. Kwo panga nyo, naabinili kumpanga muusunike, ila nipalage mutange mu'lu' mwanimpendi muno.

5 Manaitei mundu amuusunise nnyine, aniusuniseli nenga bai, pi'ngi' tuwesa baya, amuusunise mwenga mwaboti na nipendili kugaku'ya muno makowe. 6 Kwake ywembe, mbwatyo yayomwike pwatilwa na bandu baingi pakati yinu, inni'ngani. 7 Sakiigalile kwinu mwenga, ili'ngani kunsamya na kunkamwamboko mundu ywo, li'nga aakane usunika muno no ti'kwanika mwoyo mpamo. 8 Kwa nyo ninkong'ondelya, munnaye mpu'la panga mwendakumpenda. 9 Kitumbu si'ngi' sa kumwandikyanga balua yi'lu' yaai, li'nga nintange panga, mutami wiso kuniyu'wa kwa kila kikowe. 10 Mana munsami mundu, nanenga nendakunsamya. Kwa mwanjaa paninsamya, mana kakape nibile na kikowe na ywembe, nisamya nnu'ngi' ya Kilisitu kwa kitumbu sinu, 11 li'nga kanetumpei Ibilisi lipala lyakutukonga, kwa mwanjaa tugatangite mwagabile mabinio gake.

12 Panaaikite ku Troa kwiala Abali Inannoga ya Kilisitu, naakoli Bwana aniyu'gu'lile niango wo panga lyengo lyake kwo. 13 Lakini naapulaikeli pamwoyo wangu', kwa mwanjaa nankoli lili Tito muumini nnyangu'. Kwa nyo, nganaalaga bandu ba kilambo so no yenda Makedonia.

14 Lakini tunsukulu Nnu'ngu' ywatulongoya mumwanja wa usindi wa Kilisitu masu'ba goti. Ywembe atupanga tuubambiye ukweli wa Kilisitu kati lumba lunannungya lwalutwi'lya kila pandu. 15 Kwa mwanjaa twenga twalumba lunannungya lwa ubani, alwo Kilisitu apiya kwa Nnu'ngu'. Lumba lwo lwaikya boti babakosopolelwa na babaoba. 16 Kwa balu' babaoba, lumba lwo nga kiwo, lakini kwa balu' babakosopolelwa, lumba lwo nga ukoto. Bai lelo, pangali Nnu'ngu', ntu'pu' ywakombwa panga lyengo lyo. 17 Twenga tubileli kati balu' bi'ngi' babapanga nsuluso wa liyi'gi'yo lya Nnu'ngu'. Tuala kwo nogeya no lu'mbana na Kilisitu nnu'ngi' ya Nnu'ngu' kati twabandu twatutumilwe na Nnu'ngu'.