1 Kwa mwanjaa twenga twapangakasi pamope na Nnu'ngu', tunnu'ba muno kanemuyi'ki'ti ngu'ngu' yamwipoki bu'ka kwa Nnu'ngu' iobe wabule. 2 Nnu'ngu' abaya nyinya, "Pansimu waupwaika naakuyu'wine, naatikuyangatia lisu'ba lya ukosopoli." Nimmakianga panga "Nsimu waupwaika" nga wu'no. Na nambi'yambi' nga "Lisu'ba lya ukosopoli."

3 Tumpangyali mundu likowe lyolyoti lya kumpanga aku'bale, li'nga utumisi witu wakane bonekana na kipi'li'. 4 Ila tulaya mumakowe goti panga twenga twaatumisi ba Nnu'ngu'. Tukomeya mungu'su'mbu', tabu na siki mbali'mbali'. 5 Tuteku'mbu'lwa, twaai muutabilwe no yobelwa pabandu. Twaapangite mengo manonopau, twaagonjikeli lugono, na twaalileli. 6 Kai' tulaya panga twaatumisi ba Nnu'ngu' kwa upeleteu, utangi, ukomeyi na kwa unogau, kwo longoyelwa na Loo Mpeleteu na upendo wa kakape, 7 na kwo ala mayi'gano ga kakape. Tupanga ago goti kwa makakala ga Nnu'ngu' na aki nga yombo yitu ya ngondo kwa luboko lwamalyo na kunki'ya. 8 Twiibi'i wiso kwo isimilwa no salaulilwa, bi'ki'lwa lukoolo no lumbilwa. Tuganiyilwa panga twaabu'su', lakini kumbe tulongela ga kakape, 9 tubonekana kati twangatanganikwa, lakini kumbe twaatanganikwa muno. Tubonekana panga twendawaa, kumbe twaakoti! Tuteku'mbu'lwa muno lakini kumbe tubulagilweli. 10 Kai', tubonekana panga twendausunika lakini kumbe wakati woti twendapulaika. Tubonekana panga twaaki'ba, lakini kumbe twapei utayili bandu baingi. Tubonekana panga ntu'pu' kili'be, lakini kumbe tubile na kila kili'be.

11 Mwaalongo bitu Akolinto, tulongei na mwenga mpu'la bai kwa mwanjaa tutekumpenda kwa myoyo yitu yoti. 12 Upendo witu kwinu mwenga unayomokali, ila mwenga ngamwamuibiliye upenda winu kwitu twenga. 13 Nambi'yambi' nilongela na mwenga kati nilongela na bana panga, mutupende kwa myoyo yinu yoti, kati twenga mwatumpendi mwenga.

14 Kanemuyangatiane na bandu bangali u'bi'lya. Buli, aki na ulau yendayu'wangana? Bweya na lubi'ndu' bendakombwa tama pamope? 15 Kubile na masikisano gaku' kati ya Kilisitu na Ibilisi? Au ywau'bi'lya na ywangali u'bi'lya? 16 Kubile na masikisano gaku' kati ya Nyumba ya Nnu'ngu' na inyago? Kwa mwanjaa twenga nga twanyumba ya Nnu'ngu' ywai nkoti. Kati mwabaite Nnu'ngu' mwene,

"Kitamo sangu' salu'a panga kasabe,

no tyanga pamope nabo,

Nalu'a panga na Nnu'ngu' wabe,

nabembe baapanga bandu bangu'."

17 Kwa nyo Bwana abaya kai',

"Mubu'ke pakati yabe,

mwiibi'ke kuutalu nabo,

kanemukunywe kili'be kisapu,

na nenga naalu'a kumpokyanga.

18 Nenga naapanga na Tati' binu,

mwenga mwaapanga mwabana bangu', analu'me na alwawa,

Abaya Bwana Mwene Makakala Goti."