1 Kwa mwanjaa, tutangite panga ema yatutama nkati yake pano padunia, lombolya yi'ga yitu, yalu'a alabika. Palyapitya lyo, Nnu'ngu' aabi'ka wiso nyumba yo tama twenga nkati yake. Yaalandanali na yaisengelwa na bandu pano padunia, yaapanga ya kunani yayaalu'a konda milele. 2 Lakini nsimu wu'no patubile na ema yi'no, twendaminya kwo minyikia muno kwa Nnu'ngu' kutupeya nyumba yitu yayambi' ya kunani li'nga tupate tama. 3 Twaatama munyumba yayambi' ya kunani yayaatupanga kanetubonekane tubile panja. 4 Pano patubile balo muema ya dunia yi'no, twendaminya no topelwa, kwenda tupala tama panja lili, ila tubile na kilu'lu' so tama munyumba yi'lu' yangali alabika li'nga kiwo kimililwe mpamo na ukoti. 5 Bai, Nnu'ngu' mwene nga ywatubi'i wiso kwa kitumbu sa makowe go na kutupeya Loo Mpeleteu nkati yitu, panga kitomelelyo sa ili'be yoti yatubi'kile.

6 Kwa nyo, tubile twakangamala saa yoti. Tutangite panga, patuyendelya tama muyi'ga yi'no, tubaa kuutalu na kitamo situ pamope na Bwana. 7 Tutama kwa galu' gatuu'bi'lya, kwenda kwa gatugabonali. 8 Lakini tubile twakangamala na twaapendile ata kugaleka maisa gano ga padunia no amya kwa Bwana. 9 Lakini likowe lya ngama muno, tupala kumpulaisa Bwana, ibe patutama pano padunia au akwo. 10 Kwa mwanjaa, twenga twaboti tupalikwa yi'ma nnu'ngi' ya kiti'gu' sa ukumu sa Kilisitu, li'nga kila yumo apoki gagapalikwa bu'kana na gaagapangite paabile padunia, gabe manogau au maakau.

11 Bai, kwa mwanjaa tutangite kumwisimu Nnu'ngu', kwa nyo, tukasana kwauta bi'ngi'. Lakini Nnu'ngu' atutangite mwatubile, nanenga niu'bi'lya kai' panga namwenga mututangite wisowiso. 12 Kwenda tupaya kai' kwilumba twabene nnu'ngi' yinu li, ila tummakia mwenga lipala lya kwipuna kwa kitumbu situ, li'nga mupate kwayangwa balu' babaipunia ube wabe wa panja kulikoni mwababile pamwoyo wabe. 13 Mana tubonekine panga tuobite malango kati mwabatubaya, alyo kwa pwaila ya Nnu'ngu', na manaitei tubile na malango gitu, alyo kwa pwaila yinu. 14 Kwa mwanjaa upendo wa Kilisitu utulongoya twenga twatuyi'ki'tya panga, mundu yumo bai ngaywawile kwa kitumbu sa bandu boti, ilombolya panga boti bapanga kiselele kwa kiwo sake. 15 Nembe aawile kwa kitumbu sa bandu boti li'nga boti babatama bau'mi kanebatame kwa kitumbu sabe bene, ila batame kwa kitumbu sake ywembe ywawile no yu'yi'lwa kwa kitumbu sabe.

16 Bai, tumbulya nambi'yambi', twenga tummalangilyali mundu ywoywoti muisabu ya kimundu, pamope no panga twammalangi Kilisitu muisabu yi'yi'lu'yi'lu', lakini nambi'yambi' tupangali kai' nyo. 17 Mundu ywoywoti mana alu'mbine na Kilisitu, apanga kyumbe sayambi', makowe ga kwai'mbu' gabu'i, lingulya, gapangite gayambi'! 18 Lyoti lyengo lya Nnu'ngu' ywatuawaniye twenga na mwene kwa ndi'la ya Kilisitu, na kutupeya lyengo lya kwaawana bandu na ywembe mwene. 19 Ngo baya panga, Nnu'ngu' aabile kaiawana dunia na ywembe mwene kwa ndi'la ya Kilisitu, pangali balanga masambi gababile nago bandu. Ywembe aatulagi tuale liyi'gi'yo lya kwaawana bandu na ywembe mwene.

20 Bai, twenga tuyi'ma paali pa Kilisitu, na Nnu'ngu' mwene atutumya twenga kunkema mwenga. Tunnu'banga paali pa Kilisitu, muawane na Nnu'ngu'. 21 Kwa mwanjaa, Kilisitu aabileli na sambi, lakini Nnu'ngu' aampangite abe sambi kwa kitumbu situ, li'nga kwa ndi'la yake tupate panga aki nnu'ngi' ya Nnu'ngu'.