1 Balua yi'no iandikilwe na nenga na Pauli nantumilwe wa Kilisitu Yesu bu'kana na mwapendi Nnu'ngu', pamope na nnunangu' Timoteo. Tumwandikyanga mwenga mwa likanisa lya Nnu'ngu' lya Kolinto na apeleteu boti ba kunkoa wa Akaya. 2 Tunnu'byanga ngu'ngu' na amani yaibu'ka kwa Nnu'ngu' Tati' bitu na Yesu Kilisitu Bwana witu, ibe na mwenga.

3 Akwi'yi'lwe Nnu'ngu' Tati' ba Bwana witu Yesu Kilisitu, Tati' bene kiya na Nnu'ngu' ywatukamwamboko mumakowe gitu goti. 4 Ywembe atukamwamboko twenga mutabu yitu yoti, li'nga na twenga tuwese kwakamwamboko bi'ngi' mukila tabu kwa mboko yoyoyo yatupokya bu'ka kwa Nnu'ngu'. 5 Kati mu'lu' mwatuyendelya ku'su'mbu'lwa muno kwa kitumbu sa Kilisitu, nyinyonyo Nnu'ngu' ngayendelya kutukamwamboko muno kwo pi'tya kwa Kilisitu. 6 Manaitei twenga katuku'su'mbu'lwa, ipangika li'nga mupate kamulwamboko no kosopolelwa. Manaitei katukamulwamboko, nyinyonyo na mwenga mukamulwamboko no pata makakala ga kumpanga mukomeye tabu yi'yi'lu'yi'lu' yatuipata. 7 Liu'bi'lyo litu kwinu mwenga likangamile kwa mwanjaa tutangite panga, mu'lu' mwamuku'su'mbu'lwa kati twenga, ngamo mwaakamulwamboko kati twenga.

8 Kwa mwanjaa tupendili mwaalongo mukotoke tanga abali ya siki yaitupatike ku Asia panga, twaatopilwe pi'ta makakala gitu no ika po ti'kwanika mwoyo wo yendelya lama. 9 Twabene twibonage tuukumilwe kiwo. Kumbe gaatupiti go, li'nga twaakane kwiu'bi'lya twabene, ila tumwu'bi'li Nnu'ngu' ywayu'ya babawile. 10 Ywembe nga ywaatukosopoli twenga mumaule maku'lu' ga kiwo, na aalu'a kutukosopolya kai'. Kwake ywembe tubi'i mau'bi'lyo gitu panga, aayendelya kutukosopolya, 11 kati mu'lu' mwamulu'mbine yangatiyana na twenga kwo lu'ba, baingi baalu'a sukulu Nnu'ngu' kwa kitumbu situ kwa ndi'la ya balaka ya ngu'ngu' yitu kwo yangwa lu'ba kwa baingi.

12 Bai, twenga twipunia kikowe simo. Myoyo yitu itukong'ondelya panga, tutami mudunia yi'no kwo nogeya no u'bi'li'ka kwa bu'kana na Nnu'ngu'. Tupangiteli nyo kwa ikima yaibu'ka mudunia yi'no, ila kwa ngu'ngu' ya Nnu'ngu'. Amo nga mwatutami mudunia yi'no, munomuno muumope witu na mwenga. 13 Bai, mubalua yitu tumwandikyangali kwo iyaiya, ila makowe gamuwesa kugasoma na kugatanga. Nipi'kanilya panga, mulu'a tanga wiso, 14 kwa mwanjaa, mpaka nambi'yambi' mutangite pasene bai, tutangite panga, mulisu'ba li'lu' lya Bwana Yesu, mwaalu'a kwipunia kwitu twenga kati twenga mwatwiipunia kwinu mwenga.

15 Bu'kana no u'bi'lya ku', naabini longolya isa kasinu wi'ti', li'nga mupate balaka yo tyangililwa na nenga mala ibi'li'. 16 Naabini nipi'ti kasinu kaniyenda Makedonia, na nibuyangani kasinu kai', li'nga muniyabuye mumwanja wangu' wo yenda Yudea. 17 Buli, muwasa panga nimunaise mwanja wangu' wo ki'li'bu'kya kasinu kwa mwanjaa nenga nikombwali yi'mya ganigaamwa? Au muwasa panga nilongoyelwa na maganio ga kimundu bai, ngainipanga nibaye "Eloo" nambi'yambi' na nnu'ngi' nibaye "Lili"? 18 Lakini kati Nnu'ngu' mwabile ywo u'bi'li'ka, liyi'gi'yo litu kasinu ipalikwali kwa pamope baya "Eloo" na "Lili." 19 Kwa mwanjaa, Kilisitu Yesu Mwana wa Nnu'ngu' yu'lu' ywatwaamwalike nenga, Sila na Timoteo, aabileli ywa "Eloo" na "Lili" kwa pamope, ila kwake ywembe masu'ba goti aai ywa "Eloo." 20 Kwa mwanjaa ywembe ngatimisike malagano goti ga Nnu'ngu' gabe "Eloo." Kwa kitumbu so, "Amina" yitu ibayilwa kwa ndi'la ya Kilisitu li'nga kumpeya utukupu Nnu'ngu'. 21 Bai, ywembe ywatupanga tukangamale pamope na mwenga mu Kilisitu na kutusawa, nga Nnu'ngu'. 22 Ngaywatubi'i muuli wa kutupanga twa mali yake ywembe na kutuyalya Loo mumyoyo yitu kwo tomelelya* makowe goti gatubi'kile.

23 Nnu'ngu' atangite panga niku'pi'yali, nibuyanganili Kolinto kwa kitumbu sa kummi'kya mwenga lwu'ngu', mwakane lumya. 24 Tukani tumya makakala bu'kana na imani yinu, mwanjaa, mwenga mukangamile muimani yinu. Ila twenga twapanga kasi pamope na mwenga kwa kitumbu sa pulaa yinu.