1 Nipalikwa kwilumba, pamope no panga inipwaikali kili'be. Lakini nambi'yambi' nilu'a baya bu'kana na makowe gaayambi' na maumukulwa ganipatike bu'ka kwa Bwana. 2 Nintangite mundu yumo ywalu'mbine na Kilisitu, ywembe myaka ku'mi nansese yaipite, aatu'ndu'bi'yilwe mpaka kunani munomuno. (Akwo nitangiteli panga aai kwa yi'ga au kwa loo, Nnu'ngu' ngaywatangite.) 3 Nibwi'li'gi'ya baya, nitangiteli panga mundu ywo ywatu'ndu'bi'yilwe, aatu'ndu'bi'yilwe abile kwa yi'ga au aabile kwa loo, Nnu'ngu' ngaywatangite, 4 aatu'ndu'bi'yilwe mpaka kumbepo. Akwo ngayu'wa makowe gagaiyilwe muno, makowe go ata mundu ayi'ki'ti'lwali kugaawanikia. 5 Bai nilu'a kwilumba bu'kana na mundu kati ywo, lakini bu'kana na nenga namwene niilumbali, ila nilu'a kwilumba kwa ukigopi wangu'. 6 Mana nikapala kwilumba, nilu'e pangali nannogeloge, kwa mwanjaa nilu'e baya ukakape sika. Lakini niilumbali li'nga mundu ywoywoti aakane kunibona na ywa ngama muno kulikoni mwabanibona no yu'wa bu'ka kasangu'.

7 Lakini naapeyilwe ngu'su'mbu' muyi'ga yangu' yaibile kati mimwa waunikima. Likowe lyo lyaai lya kindumindumi ywatumilwe na Ibilisi anipei ngu'su'mbu' li'nga makowe maku'lu' ganiumukulilwe kaneganipange nilobi kwipuna muno. 8 Nannu'bite muno Bwana mala itatu bu'kana na likowe lya kunibu'ki'ya mimwa wo. 9 Lakini Bwana nganibakia, "Ngu'ngu' yangu' yendakuli'ngana, kwa mwanjaa, uweso wangu' utimilika na ukigopi wako." Kwa nyo nilu'a kwilumba kwo napusika muno bu'kana na ukigopi wangu' li'nga uweso wa Kilisitu utame panani yangu'. 10 Kwa nyo, niyi'ki'tyana na ukigopi, tukanilwa, ngu'su'mbu', siki na tabu kwa kitumbu sa Kilisitu, kwa mwanjaa panibaa na kigopi, ngapanibaa na makakala.

11 Nibile kati nannogeloge, lakini mwenga ngamunili'ndi'ndi'li nibe nyo. Kwa mwanjaa naapalikwe nilumbilwe na mwenga, pamope no panga nibonekana nipwaikali, na nenga nanseneli pi'ta bababile "atumilwe aku'lu'." 12 Panaabile kwinu naapangite kati nantumilwe, kwa mwanjaa naapangite myasu, maayabu na mangelongelo kwo komeya goti. 13 Ntu'pu' likowe lyolyoti lyanalipangite kwa makanisa gi'ngi' lyanikotwike panga kwinu, ila kwo kotoka baa na kigombo sinu. Munisami bai! 14 Nambi'yambi' niibi'ka wiso isa kasinu kwa mala yene tatu, na wala naapangali na kigombo sinu. Nipalali mali yinu, ila nimpalanga mwenga mwabene. Kwa mwanjaa lyengo lya bana lili kwaabi'kya amana abelei babe, ila ipalikwa abelei kwa bana babe. 15 Kwa nyo nipulaika ata tumya kila kili'be sanibile naso kwa kitumbu sinu mwenga, ata kwipiya namwene. Lakini ibonekana panga mwaniyendelya kumpenda muno, ngapamuyendelya pu'ngu'ya upendo winu kwangu'.

16 Muyi'ki'tile panga naai nakigomboli kasinu. Lakini bandu bi'ngi' balu'a baya panga, "Kwa mwanjaa Pauli nng'anga aasopite bandu kwa kwakonga." 17 Buli, naampokonywi kili'be sosoti pi'tya kwa bandu banaatumike kasinu? 18 Nannu'bite Tito aise kasinu pamope na nnongo witu ywi'ngi'. Buli, muwesa baya Tito aatekunnyibya? Bai, nenga pamope na ywembe twaai twabamo mulyengo, kai' ata nnyendo witu gumo?

19 Kwaali' mugania mpaka nambi'yambi', twiikengya twabene nnu'ngi' yinu! Lakini tulongei makowe ga nnu'ngi' ya Nnu'ngu', ku'no tulu'mbine na Kilisitu. Na sosoti satupanga, mwaalongo bangu' mwamupendilwe, tupanga li'nga kunnyangatia mwenga mukangamale muimani. 20 Nipanga nya kwa mwanjaa niyogopa panga panaaisa, mwabaali kati mu'lu' mwanipendi mube. Niyogopa pi'ngi' kuwesa baa na nnomo, bwigu, nyongo, kwipendelea, ubai, mayu'yu'to, kwipuna na puyo nkati yinu. 21 Niyogopa panga panaaisa kai' kasinu, Nnu'ngu' wangu' awesa nipanga niibone oni nnu'ngi' yinu. Naatiku'ku'li'ka muno bu'kana na bandu baingi nkati yinu babapangite sambi ya upege, usapu na makowe gi'ngi' ga oni, lakini banabuyanganiali kwa Nnu'ngu' kwa galu' gabagapangite.