1 Bai, kwa mwanjaa Nnu'ngu' atupei lyengo li' kwa kiya sake, tutotokelwali pamwoyo. 2 Lakini tugakani makowe ga oni gagayu'bite na tupangali kwo ku'pi'ya, wala tuliyangabanali liyi'gi'yo lya Nnu'ngu' na ubu'su'. Ila, kwa kwikong'ondelya kweli, twiilaya panga tubile na aki kwa myoyo ya bandu boti nnu'ngi' ya Nnu'ngu'. 3 Manaitei Abali inannoga yatuala iteiyanika, iyanike kwa balu' bababi'ngi'ya ndi'la yo oba bai. 4 Bandu bo bamwu'bi'lyali Yesu kwa mwanjaa Ibilisi, nkulungwa wa dunia yi'no, agawi'ki'li malango gabe. Aso nga kitumbu sabasindwa kuubona bweya wa Abali Inannoga ya utukupu wa Kilisitu, ywalaya mwabile Nnu'ngu'. 5 Kwa mwanjaa, tualali makowe gitu twabene, ila tumwala Kilisitu Yesu nga Bwana, na twenga twabene nga twatumisi binu kwa kitumbu sa Yesu. 6 Nnu'ngu' ywaabaite, "Bweya ung'alang'ati mulubi'ndu'," nga ywang'alang'atya mumyoyo yitu, li'nga atupei bweya wa ilimu ya utukupu wa Nnu'ngu' kuminyo ya Kilisitu Yesu.

7 Lakini twenga tubile na mabi'ko ga kiloo kati kibi'ga so kanjwanika li'nga bandu balole uweso wu' wa maayabu muno waubu'ka kwa Nnu'ngu', kwenda kwitu twabene lili. 8 Twendaku'su'mbu'lwa ku'no na ku'no, lakini tubanilwali, tutangiteli lyo panga, lakini tuti'kwanikali mwoyo, 9 twendateselwa, lakini Nnu'ngu' atulekali, tutu'yi'lwe pai', lakini tulangamiswali. 10 Masu'ba goti yi'ga yitu ibile mmaule kwo waa kati Yesu, li'nga ukoto wa Yesu ubonekane muyi'ga yitu. 11 Kwa mwanjaa, twenga twatubile twabau'mi masu'ba goti tupiyilwe tuwee kwa kitumbu sa Yesu, li'nga ukoto wake upate bonekana muyi'ga yitu yo waa. 12 Kwa nyo, twenga tubile mmaule go waa, lakini nkati ya alyo, mwenga mupata ukoto.

13 Maandiko Mapeleteu gabaya panga, "Naamwu'bi'li Nnu'ngu', nga kitumbu sanaalongei." Na twenga kai' nyinyonyo tubile na imani yi'yi'lu'yi'lu', twendau'bi'lya, ngapo tulongela. 14 Tulongela nyo kwa mwanjaa tutangite panga, yu'lu' ywannyu'yite Bwana Yesu bu'ka kuuwi'li aalu'a kutuyu'ya twenga kai', kati mu'lu' mwannyu'yite Yesu, na kutuleta twenga pamope na mwenga nnu'ngi' yake. 15 Kwa nyo, makowe ga goti kwa pwaila yinu, li'nga ngu'ngu' yayaikya bandu baingi muno iyongeyelwe. Bu'kana na lyo, sukulu kwalu'a yongeyelwa, na Nnu'ngu' aakwi'yi'lwa.

16 Kwa nyo, tuti'kwanikali mwoyo ata pasene. Pamope no panga ube witu wa panja wendaalabika, lakini ube witu wa nkati uyu'ka wayambi' kila lisu'ba. 17 Kwa mwanjaa, siki yitu yatupata njene bai na ikondali, itubi'kya wiso utukupu nku'lu' muno na wangayomoka waubile nnogau pi'ti'li'ki'ya mateso ga. 18 Kwa mwanjaa, twenga tulingulyali ili'be yaibonekana, ila tulingulya yangalibonekana. Yi'lu' yaibonekana ikondali, lakini yi'lu' yangalibonekana ikonda mpaka milele.