1 Wu'no mwanja wangu' wene tatu isa kasinu. Maandiko Mapeleteu gabaya panga, "Kila likowe lyalibu'kana na mwalo lipalikwa likong'ondelwe kwa akong'ondeli abi'li' au atatu." 2 Niyomwike kunkwi'li'ka panaabile pamope na mwenga mumwanja wangu' wu'lu' wene ibi'li'. Nambi'yambi' nibwi'li'gi'ya kai' kunkwi'li'ka nibile kuutalu panga, panaaisa kai' naalu'a kwabi'kyali kiya balu' babaapangite sambi palipite, wala bi'ngi' boti. 3 Mupala ukong'ondeli panga Kilisitu kakape alongela pi'tya nenga. Kilisitu ywembe kigopi lili kasinu, ila ywembe alaya uweso wake kwinu mwenga. 4 Pamope no panga aabambilwe bu'kana na ukigopi, lakini nambi'yambi' alama kwa uweso wa Nnu'ngu'. Nyinyonyo na twenga twaakigopi kati ywembe, lakini kwa kitumbu sinu tulama pamope na ywembe kwa makakala ga Nnu'ngu'.

5 Mwipekeseni mwabene mupate tanga panga kakape mubile nayo imani. Mwilinguli mwabene! Buli, mutangiteli panga Kilisitu Yesu abile nkati yinu? Na mana lili bai, mwenga musindilwe. 6 Lakini niu'bi'lya panga mulu'a tanga panga twenga tunasindwali. 7 Tunnu'ba Nnu'ngu' panga kanemupange likowe lyolyoti lilau, kwenda twenga tupala tubonekane panga tutesinda lili. Ila tupala mupange manogau ata mana twenga katubonekana panga tusindilwe. 8 Kwa mwanjaa tuwesali panga lyolyoti lyalitaukana na ukakape, ila tuwesa panga ukakape bai. 9 Twendanapusika, kwa mwanjaa twenga kila patubaa twaakigopi, mwenga mubaa na makakala. Tunnu'ba Nnu'ngu' amwawane. 10 Bai, niandika balua yi'no nibile kuutalu na mwenga, li'nga panaalu'a ika kasinu kanenaabe nankali' kwo tumya utawala wangu' wanipeyilwe na Bwana, wo senga na wala wo bomwanali. 11 Nambi'yambi' mwaalongo bangu', nendakunnaganga. Mube mwaatimya muimani, mukamwanemboko, mube na umope, mutame kwa amani. Na ywembe Nnu'ngu' ywa upendo na amani aalu'a baa pamope na mwenga.

12 Musalimiyane kwa upendo wa Kilisitu. Ku'no, apeleteu boti ba Nnu'ngu' bendakunsalimiyanga.

13 Ngu'ngu' ya Bwana Yesu Kilisitu na upendo wa Nnu'ngu' na umope wa Loo Mpeleteu ube pamope na mwenga.