1 Balua yi' niandike nenga na Pauli nanibile nantumilwe, kwenda kwa amuli ya bandu au kwa makakala ga mundu lili, ila kwa Yesu Kilisitu na kwa Nnu'ngu' Tati' ywannyu'yite bu'ka kuuwi'li. 2 Nenga na aumini ayangu' boti bababile pamope na nenga pano, tunsalimia mwenga mwamubile mumakanisa ga kunkoa wa Galatia. 3 Tunnu'bya ngu'ngu' na amani bu'ka kwa Nnu'ngu' Tati' bitu, na kwa Bwana Yesu Kilisitu.

4 Kilisitu aaipiyite mwene kwa kitumbu sa masambi gitu, bu'kana na mwapendi Nnu'ngu' na Tati' bitu, li'nga apate kutukosopolya bu'ka muulau wa dunia yi'no ya nambi'yambi'. 5 Nnu'ngu' akwi'yi'lwe milele na milele! Amina.

6 Nisangala panga, muyu'ngwiye kunneka Nnu'ngu' ywembe ywaankemite kwa ngu'ngu' ya Kilisitu, na mutumbwa bi'ngi'ya mayi'gano gi'mbi'ke. 7 Kakape panga ntu'pu' Abali yi'ngi' Inannoga, lakini kubile na bandu babannyelenganiya no pala kwialabiya Injili ya Kilisitu. 8 Lakini ata ikatei twenga au malaika ywabu'ka kunani mana aalike Injili yi'ngi' mbali' na yi'lu' yatumwalile twenga, bai mundu ywo apate lasi milele! 9 Kati mu'lu' mwatwayomwike baya patumbu, na nambi'yambi' nendabaya kai', manaitei mundu ywoywoti alu'a kumwalya Injili yi'ngi' yangali landana na yi'lu' yamwaipokile, mundu ywo aapata lasi bu'ka kwa Nnu'ngu'.

10 Buli, mugania panga nipala yi'ki'ti'lwa na bandu? Lili, nenga nipala yi'ki'ti'lwa na Nnu'ngu'. Au mugania nipala kwapulaisa bandu? Mana ikapangage kanipala kwapulaisa bandu, nilu'e pangali na ntumisi wa Kilisitu.

11 Mwaalongo bangu', nipala mutange panga yi'lu' Injili yanamwalile, yaabu'kineli na bandu. 12 Na kwenda Injili yo naapeyilwe na mundu au yi'ganilwa na mundu ywoywoti lili, ila Yesu Kilisitu mwene ngaywaniumukulile.

13 Mwenga muyu'wine bu'kana na maisa gangu' ga kwai'mbu', panaabile na dini ya Kiyahudi, na mwanaalitesike likanisa lya Nnu'ngu' kwa makakala no paya kulilangamisa. 14 Na nenga naayendeli muno kamwa mimu ya Kiyahudi kulikoni bandu bi'ngi' baingi ba nng'elo wangu', kwa mwanjaa naabini muno kamwa mimu ya akinatati' bitu.

15 Lakini Nnu'ngu' kwa ngu'ngu' yake, aanisawi nibile balo ata belekwa, nganikema nintumikiye. 16 Yaannogeleli kumumukwa Mwana wake kasangu', li'nga niale Abali yake Inannoga kwa bandu bangali Ayahudi. Na apo, naapalikeli mawaso ga mundu ywoywoti, 17 na wala nau'bwikeli wi'ti' yenda Yelusalemu kwa balu' atumilwe babaabile alongoi baa atumilwe. Naayi'i wi'ti' kunkoa wa Arabia, bu'kapo nganibuyangania kai' kukilambo sa Damasko. 18 Bu'ka po pi'ta myaka itatu nganiu'bu'ka yenda Yelusalemu bonagana na Petili na naatami kasake kwa masu'ba ku'mi na tano. 19 Lakini nakummonali ntumilwe ywi'ngi' ila Yakobi, nnunawe Bwana Yesu. 20 Nilapa nnu'ngi' ya Nnu'ngu' panga ganimwandikyanga kwenda ga ubu'su'li.

21 Bu'kapo, nganiyenda kunkoa wa Silia na Kilikia. 22 Mumasu'ba galu' naabile natanganikwali kwa aumini ba makanisa ga Yudea. 23 Bembe sabaatangite nga si'lu' bai sabaayu'wine panga, "Mundu yu'lu' ywatutesage patumbu, nambi'yambi' aala bu'kana na imani yi'yi'lu'yi'lu' yaapalage kwilangamisa." 24 Bai, ngabankwi'ya Nnu'ngu' kwa kitumbu sangu'.