1 Bai, likowe lyanipala kummakia nga li'no, masu'ba goti mwana mana abile balo nnangu'ta apanga nnisi, lakini balekangineli na mmanda, pamope no panga ywembe nga mwene mali yoti. 2 Wakati awo woti abile pai' ya aleli na ayi'mi'li'ki mpaka wike nsimu waubi'kilwe na tati' bake. 3 Na twenga nyinyonyo, Kilisitu paabile balo isa, twaabile kati twabana pai' ya utawala wa dunia. 4 Lakini nsimu waupalikwage pawikite, Nnu'ngu' ngantuma Mwana wake, ywaabelekwi na nnwawa no tama pai' ya salya, 5 apate kutukosopolya twenga twatwaabile pai' ya salya ya Musa, tupate pokya ulisi no pangilwa twabana ba Nnu'ngu'.

6 Kwa mwanjaa mwenga nambi'yambi' mwabana ba Nnu'ngu', Nnu'ngu' antumike Loo wa Mwana wake mumyoyo yitu, ywakema "Abba" lombolya, "Tati'!" 7 Bai, nambi'yambi' mwenga mwaabandali kai', ila mwabana ba Nnu'ngu'. Kwa nyo, manaitei mwenga mwabana bake, mwalu'a pokya ulisi wa Nnu'ngu', waabi'ki bana bake.

8 Patumbu mwantangiteli Nnu'ngu', kwa nyo mwabile mwaabanda ba Nnu'ngu' ywa kakape lili. 9 Lakini kwa mwanjaa nambi'yambi' muntangite Nnu'ngu', au tubaye mutanganikwe na Nnu'ngu', muwesa buli kai' bukiya muutawala wa patumbu wa ukigopi na wangali pwaila? Au mupala mube mwaabanda babe kai'? 10 Balo kamwiku'mbu'kya si'li'ku'si'li'ku' ya Kiyahudi? Mugaisimu masu'ba, myei na myaka ya mimu ya api'ndo ba Kiyahudi. 11 Niyogopa panga, kwaali' kasi yangu' yaniipangite kasinu iwesa panga yabule.

12 Mwaalongo bangu', nendakunnu'banga muno panga mube kati nenga, kwa mwanjaa nenga nibile kati mwenga mwangali Ayahudi bu'kana na salya ya Musa. Mwaanipangili likowe lyolyoti lyakau. 13 Mutangite panga utamwe wanaabile nawo patumbu, ngawanipangite nipate lipala lya kumwalya Abali Inannoga. 14 Pamope no panga utamwe wangu' wannyingiye mumapayilwo, ata nyo mwaanisalawili wala kunisalanga, ila mwanikemi kati malaika ywa Nnu'ngu', kati mu'lu' mwamulu'e kumpokya Kilisitu Yesu. 15 Mwaabile na pulaa muno nsimu wu'lu', lakini nambi'yambi' pulaa yinu iyi'i kwaku'? Niwesa kong'ondelya panga, nsimu wu'lu' mulu'e wesa ata yokwa minyo ginu na kunipeya nenga. 16 Buli, nambi'yambi' nigalambwike no baa na nndumu winu kwa kitumbu sa kummakia ukakape? 17 Abo bandu bi'ngi' bendakumwaukya muno mwenga, lakini mabinio gabe manogauli. Bapala mutalukane na nenga li'nga mwaauki bembe. 18 Kakape inogite kwaaukya bandu bi'ngi' mumakowe manogau, na kwenda panibaa pamope na mwenga baili. 19 Mwabana bangu' nimmi'kya lwu'ngu' kai' kwa kitumbu sinu kati mau' ywapapa. Nilu'a yendelya na lwu'ngu' lwo mpaka Kilisitu abonekane nkati yinu kwa galu' gamugapanga. 20 Nambi'yambi' niminyikia nikabaa pamope na mwenga, kwaali' nilu'e galambwa lilobe lyangu' kwa mwanjaa, nibile na kyukala kwa kitumbu sinu.

21 Munibakiyange mwenga mwamupenda tawalilwa na salya, buli mutangite mwaibaya salya? 22 Kwa mwanjaa iandikilwe panga Bulaimu aabile na bana abi'li', yumo aai mwana ywa nnwawa mmanda ywakemelwage Ajiri, na ywene ibi'li' kwa nnyumbowe Sara, ywembe nga nnwawa ywaabile ulu. 23 Yu'lu' mwana ywa nnwawa mmanda aabelekwi bu'kana na mwabapendi bandu, lakini yu'lu' ywa nnwawa ulu ywembe aabelekwi bu'kana na lilagano lya Nnu'ngu'. 24 Makowe go gabile na kilombolyo si'ngi' kwinu mwenga. Kwa mwanjaa abo alwawa abi'li' nga lukongo lwa malagano gabi'li'. Lilagano lilongoi, nga li'lu' lya salya ya Musa lyalyaapangike mukitu'mbi' sa Sinai, lyalipapa bana abanda. Alyo nga aywo Ajiri. 25 Kwa nyo, Ajiri ayi'ma paali pa kitu'mbi' sa Sinai, sakibile Arabia, na nga lukongo lwa bandu ba Yelusalemu ya nambi'yambi', mwaibile muubanda pamope na bana bake. 26 Lakini Sara ayi'ma paali pa Yelusalemu ya kunani nga nni'ma ulu, na ywembe nga mau' bitu. 27 Kwa mwanjaa iandikilwe,

"Upulaike, wenga wa nnwawa waubile wantonga,

wu'bu'ye lilobe wenga wangali pata lwu'ngu' lwo papa mwana,

mwanjaa bana ba yu'lu' ywalekilwe, banambone,

kulikoni ba yu'lu' nnwawa ywabile na nsengowe."

28 Bai, nambi'yambi' mwaalongo bangu', mwenga nga mwabana ba Nnu'ngu' bu'kana na lilagano lyake, kati mwabile Isaki. 29 Lakini kati mu'lu' mwayaabile masu'ba galu' kwa yu'lu' ywaabelekwi kimundu, ngantumbwa nnomo yu'lu' ywaabelekwi kwa uweso wa Loo Mpeleteu. Na ngamwaibile ata nambi'yambi'. 30 Lakini Maandiko Mapeleteu gabaya buli? "Mummu'ye nnwawa mmanda pamope na mwana wake, kwa mwanjaa mwana wa nnwawa mmanda katu awesali lisi pamope na mwana ywa nnwawa nngwana." 31 Kwa nyo, mwaalongo bangu', twenga kwenda twabana ba nnwawa mmandali, ila twabana ba nnwawa nngwana.