1 Kilisitu atupei uulu na apala tutame muulu wo, kwa nyo muyi'me kwo kangamala na kanemuyi'ki'ti ki'li'bu'ka muubanda wo. 2 Mupi'kaniange! Nenga na Pauli, nimmakianga panga, mana muyi'ki'ti inilwa, bai Kilisitu aapanga kili'be sa ngamali kasinu. 3 Nilongela mpu'la bai panga, kila ywayi'ki'tya inilwa apalikwa kwikoleya salya yoti. 4 Mana kamupala balangilwa aki nnu'ngi' ya Nnu'ngu' kwa kwikoleya salya, mwapanga mwibi'kite kuutalu na Kilisitu, na kwiobeya ngu'ngu' ya Nnu'ngu'. 5 Lakini twenga tuli'nda kwo u'bi'lya kwa makakala ga Loo, tupangilwe twabene aki kwa ndi'la ya imani. 6 Kwa mwanjaa mana tulu'mbine na Kilisitu, inilwa au kotoka inilwa kupangali kili'be sosoti. Ila kili'be sa ngama nga imani yitu yaipanga kasi kwa upendo. 7 Patumbu mupangage kinannoga, nambi'yambi' nyai ywankanikia kugakamwa mayi'gano ga kakape? 8 Ywaampangite mube na ali yo, kwenda Nnu'ngu' ywankemangali. 9 Mulinguli! "Ngelule njene ilu'ya linnyate lyoti lya bwembe!" 10 Nibile na ukakape panga mulu'mbine na Bwana Yesu, kwa nyo, mwaabali na ndi'la yi'ngi' ya ubu'su'. Mundu mana aalu'a kunkonga aapwatilwa, ata akatei nyai. 11 Mwaalongo bangu', manaitei kakape niala panga analu'me boti bapalikwa inilwa kati mwababaya, kwa buli Ayahudi bendaniku'su'mbwa? Ikapangage kaniala nyo, ala kwangu' kwo bu'kana na kiwo sa Yesu munsalaba kulu'e kwapangali Ayahudi banisuki. 12 Naapendi bandu bo babamwauya kwa makowe go inilwa, bakaibu'ya bene mpamo kili'mbi'li'mbi' se. 13 Mwaalongo bangu', mwenga mwaakemilwe na Nnu'ngu' li'nga mube mwangwana, bai kanemuutumi ungwana wo kwa kugakoleya maminyikiyo ga yi'ga, ila muyangatiane kwa upendo. 14 Kwa mwanjaa, salya yoti iyomolelya muamuli yi' yimo, "Umpende mundu ywapapipi yako kati mwawipenda wamwene." 15 Lakini manaitei mwaalumiyana no taunana kati inyama ya mupu'ngu'ti', mwilole mwakane langamisana.

16 Bai, iyendo yinu ilongoyelwe na Loo Mpeleteu, na mwenga mwalu'a kugakoleyali maminyikiyo ga yi'ga. 17 Kwa mwanjaa yi'ga iminyikiya galu' gagataukilwa na Loo, na Loo iminyikiya galu' gagataukilwa na yi'ga. Kwa kitumbu so mukombwali kugapanga gamugapala. 18 Lakini mana kamulongoyelwa na Loo Mpeleteu, mwaatamali kai' pai' ya salya. 19 Bai, iyendo ya kiyi'ga kwa mpu'la nga yi'no, upege, usapu, makowe goti ga oni, 20 kilikitya inyago, bwabi', undumu, bulwe, bwigu, nyongo, bwimi, mitau, malekangano, 21 sukya, ubulagi, lobya, mila, na makowe gi'ngi' gagalandana na ago. Nendakunkwi'li'kanga kati mwanankwi'like patumbu panga, bandu babapanga makowe kati go baaulisili ukulungwa wa Nnu'ngu'. 22 Lakini mauno go longoyelwa na Loo nga upendo, pulaa, amani, ukomeyi, unogau, unogamwoyo, u'bi'li'ka, 23 tu'ya na kwikanikia. Ntu'pu' salya yaikanikia makowe kati ga. 24 Boti bababile ba Kilisitu baibambiye ali yabe ya dunia pamope na maminyikiyo gake maakau. 25 Kwa mwanjaa tutama kwa Loo, bai tulongoyelwe na Loo. 26 Kanetwipune na kwilumba. Tupalikwali sokosana wala bi'kyana bwigu.