1 Mwaalongo bangu', mundu mana aponangine no panga sambi, bai mwenga mwamulongoyelwa na Loo Mpeleteu munkwi'li'ke mundu ywo kwo liya. Na kila mundu ailinguli aakane payilwa. 2 Muyangatiane mwabene na bene kwipu'twa igombo yinu, kwa ndi'la yi' mwapanga mwikamuliye salya ya Kilisitu. 3 Mana mundu ywoywoti kaibona panga ywa ngama na kumbe lili, aywo aikonga mwene. 4 Kila mundu aili'nge kasi yake mwene, na apo ngapaalu'a kombwa kwilumba pangali landanisa na mundu ywi'ngi'. 5 Kwa mwanjaa, twaboti tupalikwa timisa galu' gatupalikwa kugapanga. 6 Mundu ywayi'ganilwa Abali Inannoga, apalikwa kummaulya mwalimu wake ili'be yoti nogau yapata. 7 Kanemwikonge! Nnu'ngu' apangilwali nsalango, sosoti saapanda mundu nga saalu'a una. 8 Ywapanda mumaminyikiyo ga yi'ga yake, aauna maakau muyi'ga yake, lakini ywapanda mwapala Loo Mpeleteu, aauna ukoti wangayomoka bu'ka kwa Loo. 9 Bai, kanetutotokelwe kwo panga manogau, kwa mwanjaa mana twatombolokali, twauna mauno pansimu wake. 10 Kwa nyo patupata lipala, twaapangi manogau bandu boti, munomuno kwa balu' alongo babau'bi'lile.

11 Lolange, mwaniandike elupi ngu'lu' kwa luboko lwangu' namwene. 12 Balu' babapala bonekana anogau kwa makowe ga yi'ga, bapala banni'ndi'ndi'li inilwa. Lakini bapanga nyo kwa mwanjaa bakana ku'su'mbu'lwa kwa kitumbu so ala abali ya kiwo sa Kilisitu munsalaba. 13 Ata babainilwe bene baiyu'wali salya, ila bapala muinilwe li'nga bailumbe kwa abali ya inilwa kwa yi'ga yinu. 14 Nenga niilumbali kwa kitumbu sa makowe kati ga, ila nsalaba wa Bwana witu Yesu Kilisitu awo nga kitumbu sa kwilumba kwangu'. Bu'kana na kiwo sa Yesu munsalaba, dunia ngaiwaa kasangu', na nenga niiwi'li dunia. 15 Kwa mwanjaa, inilwa au kotoka inilwa kili'beli, ila kili'be sa ngama nga pangilwa wa wayambi' kwa Kilisitu. 16 Amani na kiya yaibu'ka kwa Nnu'ngu' ibe kwa bandu boti babaukoleya ukakape wo, na abo nga bandu ba Nnu'ngu'. 17 Bai, bu'ka nambi'yambi' mundu kaneaniauye kai', kwa mwanjaa nenga nibile na mabai muyi'ga yangu' ganigapatike kwa kitumbu sa Yesu. 18 Mwaalongo bangu', ngu'ngu' ya Bwana witu Yesu Kilisitu ibe namwe. Amina.