1 Balua yi'no niiandike nenga na Pauli, ntumilwe bu'kana na mwapendi Nnu'ngu'. Nimwandikyanga mwaapeleteu ba Nnu'ngu' akwo Efeso, mwamuu'bi'like muulu'mbani na Kilisitu Yesu. 2 Tunnu'bya ngu'ngu' na amani bu'ka kwa Nnu'ngu' Tati' bitu, na kwa Bwana Yesu Kilisitu.

3 Alumbilwe Nnu'ngu', Tati' ba Bwana witu Yesu Kilisitu. Kwa kitumbu so lu'mbana kwitu na Kilisitu, Nnu'ngu' atupei balaka yoti ya kiloo yaibile kunani. 4 Kubile balo umbilwa kwa dunia, Nnu'ngu' aatusawi tupange twabake muulu'mbani na Kilisitu li'nga tube twapeleteu na twangali baa na kipi'li' nnu'ngi' yake. Kwa kitumbu sa upendo wake, 5 aalongoli kutusawa tupange twabana bake kwa ndi'la ya Yesu Kilisitu, kwa pulaa na kwo penda mwene. 6 Kwa nyo tunsukulu Nnu'ngu' kwa ngu'ngu' yake ya ayabu, yaatupei wabule kwa ndi'la ya Mwana wake ywampendile, Yesu Kilisitu. 7 Nnu'ngu' atukombwi kwa ndi'la ya myai yake, lombolya nsama wa sambi, bu'kana na uyolou wa ngu'ngu' yake. 8 Ywembe aatuyongekiye muno ngu'ngu' yake pamope na ikima na utangi. 9 Nnu'ngu' aatupangite tuitange iyo yaiyite ya galu' gaagapendile. Aapangite nyo li'nga ayomoli panga gaabinile kwo pi'tya kwa Kilisitu. 10 Makowe ga Nnu'ngu' gaalu'a yomolelya nsimu pawaatimya, nga palu' paalu'a lu'mbaniya pamope yumbe yoti na kila kili'be sa kunani na padunia no baa pai' ya utawala wa Kilisitu. 11 Nnu'ngu' aapangite kila kili'be bu'kana na mabinio na mwapendi mwene. Ywembe aatusawi kwa kitumbu so lu'mbana kwitu na Kilisitu pala tube twabandu bake. 12 Kwa nyo twenga twatulongoli kumwu'bi'lya Kilisitu, tupalikwa kuulumba utukupu wa Nnu'ngu'. 13 Na mwenga mwabandu bangali Ayahudi, mwaiyu'wine Abali Inannoga yayaanneti ukosopoli, na kumwu'bi'lya Kilisitu. Naywembe Nnu'ngu', li'nga laya panga mwenga mwabake, ammi'kite muuli kwa kumpeyanga Loo Mpeleteu ywaatulagile. 14 Aywo Loo nga kitomelelyo situ so pata kila kili'be sa Nnu'ngu' saalagi bandu bake, na likowe li' litukong'ondelya panga Nnu'ngu' aalu'a kwakombwa boti bababile bake. Tuulumbe utukupu wake!

15 Kwa kitumbu so, bu'ka panaayu'wine bu'kana na imani yinu kwa Kilisitu Yesu na upendo winu kwa apeleteu boti, 16 ninakotokali kunsukulu Nnu'ngu' kwa kitumbu sinu. Nendakunku'mbu'kyanga mumalu'bo gangu'. 17 Ninnu'ba Nnu'ngu' wa Bwana witu Yesu Kilisitu, annyalyange Loo wa ikima na amuumukuli li'nga mupate kuntanga muno. 18 Ninnu'ba Nnu'ngu' aiyu'we myoyo yinu ipate kuubona bweya wake. Kwa nyo mwaalu'a litanga liu'bi'lyo lyamubile nalyo bu'kana na nkemo wa Nnu'ngu'. Kai' mupate tanga utayili nku'lu' wa ulisi waubi'kilwe kwa apeleteu bake, 19 na uweso wake nku'lu' wangali li'ngi'li'lya kwa kitumbu situ twenga twatuu'bi'lya. Uweso wo nga waupanga kasi nkati yitu, na ngawaulandana na galu' makakala maku'lu' muno, 20 gaagatumile nsimu wa kunnyu'ya Kilisitu bu'ka kuuwi'li, na kuntamika kuluboko lwake lwamalyo akwo kunani. 21 Akwo Kilisitu atawala kila utawala, makakala, lenji, na uku'lu', atawala bu'kana na kila lina lyaliwesa kemelwa padunia yi'no na padunia yayaaisa. 22 Nnu'ngu' ampei Kilisitu utawala wa ili'be yoti, na kummi'ka panga ntwe wa likanisa. 23 Likanisa nga yi'ga ya Kilisitu na kutwi'li timilika kwake. Ywembe ngatimilisa kila kili'be na kila pandu.