1 Bai, nenga nanibile nantabilwe kwa kitumbu sa kuntumikia Bwana, ninnu'banga mutame kati mwaipalikwa bu'kana na nkemo wankemite Nnu'ngu', 2 kwo gegekea kwoti no tu'lya, komeya, no pu'tu'lyana kwo pendana. 3 Mukasane kondeya umope wa Loo, kwo lu'mbaniyilwa muamani. 4 Twenga twaboti tubile twayi'ga yimo na Loo yumo kati mu'lu' mwatukemilwe na Nnu'ngu' muliu'bi'lyo limo. 5 Kai', kubile na Bwana yumo, imani yimo, na ubatiso umo, 6 Nnu'ngu' yumo ywembe nga Tati' ywa boti, abile panani ya goti, apanga kasi pi'tya twenga twaboti, na nkati ya boti.

7 Lakini kila yumo ywitu apeyilwe ngu'ngu' bu'kana na kili'ngo saayalilwe na Kilisitu. 8 Kati mwagabaya Maandiko Mapeleteu, "Paau'bu'ki kunani muno, aayi'i na atabilwe pamope nakwe, aapei bandu upo." 9 Bai, tubaye panga "Paau'bu'ki kunani," ilombolya namani? Ilombolya panga Kilisitu paabile balo yenda kunani auluki wi'ti' pai' padunia. 10 Kwa nyo, Kilisitu aauluki pai', na ngaywau'bu'ki kunani. Aayi'i kunani ya kunani muno li'nga awese baa kila pandu. 11 Ywembe ngaywaasawi bi'ngi' panga atumilwe, bi'ngi' alondoli ba Nnu'ngu', bi'ngi' aali ba Abali Inannoga ya Yesu Kilisitu, bi'ngi' asungi na balimu. 12 Ywembe aapangite nyalu' kwa kitumbu sa kwabi'ka wiso bandu ba Nnu'ngu' kwa lyengo lyo tumika, li'nga yi'ga ya Kilisitu ipate kangamala, 13 mpaka twaboti patwauikya umope muimani kwa kuntanga muno Mwana wa Nnu'ngu' no panga mwabandu akomala kwo ika mukyi'mo so kamilika kwa Kilisitu.

14 Kwa nyo, twaapangali kai' kati twabana, katupepetuka no utilwa na mayi'gano ga kila sampuli gagaletelwa na bandu babaakonga ayabe na kwaobeya kwa ubu'su' wabe. 15 Lakini mana katubakiana kweli kwa mwoyo wa upendo, tukangamala mumakowe goti na kumwikya Kilisitu, ywembe nga ntwe. 16 Ywembe aalu'mbaniya bandu bake boti bapanga amope, kati mu'lu' ili'mbi'li'mbi' yoti ya payi'ga, mwailu'mbaniyilwa no kamuyilwa pamope ku'no kila kili'mbi'li'mbi' kakipanga lyengo lyake. Ali', ngaliipanga yi'ga yoti iku'le no sengeka muupendo.

17 Bai, kwa lina lya Bwana nimmu'langa nnyanya, kanemutame kai' kati mwabatama bandu bangali Ayahudi bababi'ngi'ya mawaso gabe gangali pwaika. 18 Bandu bo malango gabe gatwi'li lubi'ndu' na babaulilwe kuutalu na Nnu'ngu' kwa kitumbu sa ulalo wabe waubu'kana no nonopa kwa myoyo yabe. 19 Baibonali oni ata pasene, baiyingiye musampuli yoti ya maminyikiyo no panga makowe goti malau pangali li'ngi'lya.

20 Lakini mwenga mwiyi'ganiyeli nyo bu'kana na Kilisitu. 21 Niu'bi'lya panga, mwayu'wine wiso bu'kana na Yesu na ukweli wake. 22 Mwayi'ganilwe kuula nnyendo winu wa kwai'mbu' na umundu winu wa kibelekwe waualabike na maminyikio gake ga ukongi, 23 li'nga mupangilwe mwayambi' muloo na maganio ginu. 24 Kai', muwale maisa gayambi' kati mu'lu' mwamumbike Nnu'ngu' no landana nakwe, mubile mwabene aki ya kweli na upeleteu.

25 Kwa nyo, muuleke ubu'su', kila mundu alongele kweli kwa nnyine, kwa mwanjaa twenga twaboti twaili'mbi'li'mbi' ya yi'ga yimo. 26 Pamuusika, kanemupange sambi, kanemusinde lisu'ba lyoti mwausika. 27 Usika kumpanga Ibilisi apate lipala lya kukusopa. 28 Mwii, kaneayibe kai', ila apange kasi kwa moko gake mwene li'nga abe na kili'be sa kwapeya apali. 29 Kanemulongele makowe gogoti maakau, ila mulongele makowe gagayangatia kwasenga bi'ngi' bai, no leta pwaila kwa balu' babagayu'wa. 30 Wala kanemumusunise Loo Mpeleteu wa Nnu'ngu', kwake ywembe mwayi'yilwe muuli kwa lisu'ba lyo kosopolelwa. 31 Mutaikuli kuutalu na mwenga mabinio goti ga undumu, nyongo, mayu'mano, na maku'pi'ki'yano ga ulau. 32 Ila mube mwanogamwoyo, no bi'kyana kiya, kila mundu ansami nnyine kati mu'lu' Nnu'ngu' mwansami mwenga kwa ndi'la ya Kilisitu.