1 Bai, kwa mwanjaa mwenga mwabana ba Nnu'ngu' mwamupendilwe muno, munnyige ywembe. 2 Mutame maisa go pendana kati mu'lu' Kilisitu mwatupendi twenga na kwipiya kwa kitumbu situ panga salaka yene lumba lunannungya kwa Nnu'ngu'. 3 Lakini upege kaneuyu'wanike pakati yinu, wala usapu wa sampuli yoyoti, wala minyikia, kwa mwanjaa makowe ga gapalikwa gabe kuutalu na apeleteu. 4 Wala kanekube na malongelo masapu ga oni, au makowe ga kilogeloge au ga nsalango gangali pwaika, ila ipalikwa mayi'gi'yo ginu gansukulu Nnu'ngu'. 5 Kwa abali ya makowe ga, mutange kweli panga mpege, wala mundu nnau, wala ywaminyikia (mundu kati ywo aikilikitya inyago), katu aauyingyali ukulungwa wa Kilisitu na wa Nnu'ngu'.

6 Kanemuyi'ki'ti kongelwa na mundu ywoywoti kwa mayi'gi'yo gake gabule, kwa mwanjaa nyongo ya Nnu'ngu' iyaka kwa makowe kati ga kwa balu' bangali kunnyu'wa. 7 Kwa nyo, kanemupange kiselele na bandu kati bo. 8 Kwa mwanjaa, kwai'mbu' mwenga mwaai mulubi'ndu', lakini nambi'yambi' mubile mubweya kwa kitumbu sa Bwana. Bai, muyendeli tama kati mwabana ba bweya. 9 Kwa mwanjaa, bweya wu', uleta sampuli yoti ya unogau, aki, na kweli. 10 Mukasane pala tanga no panga makowe gagampulaisa Bwana Yesu. 11 Kanemupange kiselele na makowe ga mulubi'ndu' gangali pwaika, ila mugaumukwe. 12 Kakape, makowe gagapangika kwa iyo na bandu alau, ga oni ata kugalongela pankano. 13 Lakini kila kili'be mana kiumukulilwe pabweya, sendatanganikwa. 14 Kwa mwanjaa bweya ngaukipanga kila kikowe kibonekane, ngamo ibayilwa,

"Uyumuke wenga waugonjike,

uyu'yi'lwe bu'ka kwa awi'li,

Nembe Kilisitu aalu'a kumulikya."

15 Kwa nyo, mulinguli muno mu'lu' mwamutama. Kanemupange kati mwabapanga bandu bangali ikima, lakini mutame kati mwabene ikima. 16 Mwikase tumya kila lipala lyamubile nalyo kwo panga manogau, kwa mwanjaa masu'ba gano gamubile nago, ga ulau. 17 Kwa nyo kanemube mwalogeloge, lakini mugatange gagapala Bwana Yesu. 18 Kai' kanemulobi wi'mbi' kwa mwanjaa, lobya kumpanga mundu apange makowe ga oni. Mwaipalikwa, mwenga mutwi'li'yi'lwe na Loo Mpeleteu. 19 Pamupanga kyenga, mugatambwe mayi'gi'yo ga Zabuli, myambo, na tenzi ya muloo, munnyi'mbi Bwana kwa myambo ya Zabuli no sukulu mumyoyo yinu. Munnyi'mbi na kumwu'pi'lya Bwana kwa myoyo yinu yoti. 20 Mwasukulu Tati' bitu Nnu'ngu' masu'ba goti kwa kila kikowe kwa lina lya Bwana witu Yesu Kilisitu.

21 Kila mundu agegekeye kwa nnyine kwa isima yatubilenayo kwa Kilisitu.

22 Alwawa baagegekeye akinasengo babe, kati kunnyu'wa Kilisitu. 23 Kwa mwanjaa nnalu'me nga ntwe wa nnyumbowe, kati mwaibile Kilisitu nga ntwe wa kanisa. Kilisitu nga nkosopoli wa kanisa na lyembe nga yi'ga yake. 24 Bai, kati mu'lu' kanisa mwalinnyu'wa Kilisitu, nyinyonyo na alwawa, bapalikwa kwayu'wa asengo babe kwa kila kili'be.

25 Na mwenga mwanalu'me, mwapende ayumbo binu kati mu'lu' Kilisitu mwaalipendi kanisa na kuupiya bwu'mi wake kwa kitumbu sake. 26 Aapangite nnya li'nga alipeleteye kanisa kwa liyi'gi'yo lya Nnu'ngu' na kuligu'lwa kwa masi' ga ubatiso, 27 li'nga apate kwiletya kanisa lyaling'alang'atya lyangali malembele wala mangwinyakwinya au ulau wowoti, ila lipeleteu lyangali lukoolo. 28 Nyinyonyo analu'me bapalikwa kwapenda ayumbo babe kati yi'ga yabe bene. Nnalu'me ywampenda nnyumbowe, aipenda mwene. 29 Kwa mwanjaa ntu'pu' mundu ywaisukya yi'ga yake mwene, ila aipeya kilyo na kwikota. Na nyo, nga mu'lu' Kilisitu ngamwalipangya kanisa lyake, 30 kwa mwanjaa, twenga twaili'mbi'li'mbi' ya yi'ga yake. 31 Kati mwagabaya Maandiko Mapeleteu panga, "Kwa kitumbu si', nnalu'me aalu'a kwaleka tati' na mau' bake no lu'mbana na nnyumbowe, na abi'li' bo, baapanga yi'ga yimo." 32 Mumayi'gi'yo ga kubile na iyo. Na iyo yo, inonwipe kwikwipwa, lakini nenga nibona panga mayi'gi'yo ga, galombolya bu'kana na Kilisitu na kanisa lyake. 33 Bai, nibwi'li'gi'ya kummakia kai' panga, kila mundu ampende nnyumbowe kati mu'lu' mwaipenda mwene. Na nnwawa nembe, apalikwa kumwisimu nsengowe.