1 Mwenga mwabana, mwaayu'we abelei binu kwa ndi'la yaipendi Kilisitu Bwana, kwa mwanjaa ayi' nga aki. 2 Nnu'ngu' paapiyike amuli yake, yayaalongoli mulilagano yaabaike panga, "Waisimu tati' bako na mau' bako." 3 "Li'nga upate yaliwa no tama masu'ba maingi padunia."

4 Na mwenga mwaakinatati', kanemwasokesoke bana binu. Lakini mwalele kwa ikima na kwapeya mayi'gano gagabu'ka kwa Bwana Yesu.

5 Na mwenga mwaabanda, mwayu'we angwana binu pano padunia kwa isima no lendema na kwa ugolou wa mwoyo. Mwayu'we kati mu'lu' mwamunnyu'wa Kilisitu. 6 Kanemwaayu'we palu' pabannola bai, li'nga bampendeli. Lakini, mutimise gapendi Nnu'ngu' kwa mwoyo woti na kwibalangilya kati mwaabanda ba Kilisitu. 7 Mupange mengo ginu kwo pulaika kati mwatumilwe ba Bwana, kwenda bandu baili. 8 Mutange panga, kila mundu ywapanga manogau, abe mmanda au nngwana, Bwana Yesu aalu'a kumpeya upo kwa iyendo yake inannoga.

9 Na mwenga mwa mabwana, nyinyonyo mwaapangi manogau abanda binu, kanemwaayogoye kwa mwanjaa mutangite, Bwana wabe na Bwana winu akwo kunani yumo bai, na mwenga mutangite panga ywembe ammawali mundu.

10 Kwo yomolya, muyi'me kwo kangamala no lu'mbana kwinu na Bwana kwa uweso wa makakala gake maku'lu'. 11 Muwale yombo yoti ya ngondo yamupeyilwe na Nnu'ngu' li'nga mupate kwiyepa ipi'li' ya Ibilisi. 12 Kwa mwanjaa, ngondo yitu ibu'kanali na yi'ga na myai, ila ibu'kana na kulungwa, makakala, na tawala ya api'ndo ba lubi'ndu', na mayesi ga Ibilisi abaya mudunia ya loo. 13 Kwa nyo, muwale yombo yoti ya ngondo yamupeyilwe na Nnu'ngu' li'nga muwese yi'ma lisu'ba lya ulau palyaisa, mana muyomwi panga goti, muyi'me kwo kangamala.

14 Kwa nyo, muyi'me mwakangamala ku'no mwitabite lunga lwa kweli mukibuno no wala kiibiliyo sa aki pakyuba. 15 Kai', kasana kwiala Abali Inannoga ya amani, ibe ilatu mumagu'lu' ginu. 16 Bu'ka pa ago goti, imani ibe kibao so imiya njage yoti yene mwoto ya yu'lu' Ibilisi. 17 Kai', ukosopoli wa Nnu'ngu' ube kapiya ya kyu'ma. Mutole lipanga lya Loo, ago nga mayi'gi'yo ga Nnu'ngu'. 18 Mulu'be kwa Loo wakati woti, na kila sampuli yo lu'ba na kila samupala. Li'nga mupange nya, mupalikwa mutame wiso. Kanemuti'kwanike mwoyo. Wakati woti mwalu'bi bandu ba Nnu'ngu'. 19 Kai' munilu'bi na nenga li'nga panilongela Nnu'ngu' anipei golongela, niwese longela iyo ya kweli ya Abali Inannoga pangali yogopa. 20 Nenga nga na yumbe wake muutabilwe. Mulu'be li'nga nipate ala kwa makakala kati mwaipalikwa.

21 Tikiko, nnongo witu na ntumisi nnyangu' ywau'bi'li'ka kwa Bwana, aalu'a kummakia kila kili'be sakinipata. Bu'kapo mwaatanga mwanibile, na sanikipanga. 22 Nintuma kasinu li'nga mutange mu'lu' mwatuyendelya na ansenge.

23 Ninu'byanga amani mwenga mwaalongo, upendo pamope na imani bu'ka kwa Tati' Nnu'ngu' na kwa Bwana witu Yesu Kilisitu. 24 Ngu'ngu' ya Nnu'ngu' ibe kwa bandu boti babampenda Bwana witu Yesu Kilisitu kwa upendo wangali yomoka.