1 Balua yi'no niandike nenga na Pauli, nibile pamope na Timoteo, ntumisi nnyangu' mu Kilisitu Yesu, nimwandikya mwabandu boti ba Nnu'ngu' akwo Filipi mwamulu'mbaniyilwe na Kilisitu Yesu, pamope na alongosi na ayangatiyi ba kanisa. 2 Tunnu'bya ngu'ngu' na amani bu'ka kwa Nnu'ngu' Tati' bitu na kwa Bwana Yesu Kilisitu.

3 Kila paninku'mbu'kyanga ninsukulu Nnu'ngu' kwa kitumbu sinu. 4 Na kila paninnu'bya, nilu'ba kwa pulaa, 5 kwa mwanjaa mwaniyangatiye kwibambiya Abali Inannoga, bu'ka pamwau'bi'lile mpaka nambi'yambi'. 6 Kakape nitangite panga, Nnu'ngu' ywalitumbwi lyengo li' linannoga nkati yinu alu'a yendelya kulipanga mpaka kulitimisa mulisu'ba lya abuya Yesu Kilisitu. 7 Nitangite panga mwaning'wasilya nga mwembe kwa mwanjaa masu'ba goti mubile papipi muno na mwoyo wangu'. Nnu'ngu' atupei ngu'ngu' yo panga kasi yake pamope, mana nibile muutabilwe, au kwa kwikengelya na kwikong'ondelya Abali Inannoga. 8 Nnu'ngu' nga nkong'ondeli wangu' panga nimpendangite muno kwa mwoyo wa upendo wa Yesu Kilisitu, na niminyikia bonagana na mwenga.

9 Ninnu'byanga kwa Nnu'ngu' panga upendo winu uyendeli yongekeya muno pamope na ikima na utangi woti, 10 li'nga mukombwe sawa makowe gagabile manogau. Na apo ngapamwalu'a panga mwaapeleteu, pangali lukoolo lwolwoti mulisu'ba lyo buya Kilisitu. 11 Maisa ginu gaalu'a twi'lya iyendo ya aki yi'lu' yannyalyanga Yesu Kilisitu kwa utukupu na sipwa kwa Nnu'ngu'.

12 Bai mwaalongo bangu', mbala mutange panga makowe galu' gagaanipatike, kakape gaaniyangatiye muno kwibambiya Abali Inannoga. 13 Bu'kana na go ali'ndi'li boti ba nyumba ya nkulungwa na bi'ngi' boti batangite panga nibile muutabilwe kwa kitumbu sa kuntumikia Kilisitu. 14 Kwa kitumbu so tabilwa kwangu', alongo bambone bamwu'bi'li Bwana no kasana muno kulibambiya Liyi'gi'yo lya Nnu'ngu' pangali yogopa. 15 Kakape, bandu bi'ngi' bamwala Kilisitu kwa bwigu na bulwe, lakini bi'ngi' bamwala Kilisitu kwa mabinio ganannoga. 16 Aba bamwala Kilisitu kwa upendo, kwa mwanjaa batangite panga Nnu'ngu' anipei lyengo lya kwikengya Abali Inannoga. 17 Abo bi'ngi' bamwala Kilisitu kwa masindano na kwenda kwa mwoyo nng'olou lili, kabagania panga balu'a kuniyongekeya ngu'su'mbu' muutabilwe wangu'.

18 Lakini kili'beli, nenga nipulaika manaitei bandu bamwala Kilisitu kwa ndi'la mbali'mbali', ibe kwa ndi'la akau au ngolou. Kai', nilu'a yendelya pulaika, 19 kwa mwanjaa nitangite panga kwa sala yinu na kwa uyangatiyi wa Loo wa Yesu Kilisitu, naalu'a kombolwa. 20 Nipi'kanilya kwa kilu'lu' muno no u'bi'lya panga niisikali kwa ndi'la yoyoti, ila nilu'a panga na ukangamau wo li'ngana nambi'yambi' kati nsimu wi'ngi' wowoti, Kilisitu akwi'yi'lwe muyi'ga yangu' ata manaitei kwo lama au kwo waa. 21 Kwa mwanjaa, kwangu' nenga lama nga kuntumikia Kilisitu, no waa nga pwaila muno. 22 Lakini manaitei yendelya lama mudunia, naalu'a kwibona itunda ya lyengo lyanipanga. Nambi'yambi' nitangiteli nisawe lyaku'. 23 Niutilwa na makowe gabi'li'. Niminyikia kugaleka maisa gano, nikatame na Kilisitu kwa mwanjaa li'no nga likowe lya mpu'ku'bi'la muno kwangu'. 24 Lakini likowe lya ngama kwinu, nenga niyendeli lama padunia. 25 Kwa mwanjaa nibile na ukakape bu'kana na likowe li'. Nenga nitangite panga nilu'a igala, no tama pamope na mwenga li'nga ninnyangatiange mupate ku'la no baa na pulaa muimani. 26 Bai, panalu'a ki'li'bu'kya kai' kasinu mwalu'a kwipuna muno kwa kitumbu sangu' kwo lu'mbana kwinu na Yesu Kilisitu.

27 Nnyendo winu ube wu'lu' waupalikwa mu Abali Inannoga ya Yesu Kilisitu. Apo, mana naisa kummona au mana naisali, nipala niyu'we panga muyendelya kangamala muimani no baa na umope kai', na mwaboti muku'mbwana ngondo kwa kitumbu sa imani yaibu'kana na Abali Inannoga. 28 Kanemwayogope andumu binu. Yi'no yapanga mwasu kwabe panga baalanganyika, lakini mwenga mwakosopolelwa, na li'no nga lyengo lya Nnu'ngu'. 29 Kwa mwanjaa Nnu'ngu' ampei mwenga ngu'ngu' kwenda kwa kumwu'bi'lya Kilisitu baili, ila kai' ata kwo ku'su'mbu'lwa kwa kitumbu sake. 30 Mwaagabweni manonopau gambone ganikwembine nago, na mwendayu'wa panga balo kanikwembana nago. Nyinyonyo, namwenga mupalikwa kwembana nago.