1 Kwa nyo, mwaalongo bangu' mwanimpendile, nibile na kilu'lu' so bonagana na mwenga, mwamubile pulaa yangu' na upo yangu' ya usindi yanaapokya. Pano pabile ninnu'banga muyendeli yi'ma kwo kangamala kwa kumwu'bi'lya Bwana.

2 Euodia na Sintike sonde, ninnu'ba mutame kwo yu'wangana nnu'ngi' ya Bwana. 3 Na wenga wantumisi nnyangu' wauu'bi'like, nikulu'ba wayangatiye akinamau' bo, kwa mwanjaa baapangite lyengo lyo bambiya Abali Inannoga kwo kasana pamope na nenga, Klementi na apangakasi ayangu', babaandikilwe maina gabe mukitabu sa bandu bake Nnu'ngu'.

4 Bai, mupulaikange kwa Bwana masu'ba goti, kai' nibaya mupulaikange. 5 Liya kwinu kutanganikwe kwa bandu boti, kwa mwanjaa buya kwa Bwana kwegelile. 6 Kanemwiauye kwa likowe lyolyoti, ila kwa kila kili'be kwo lu'ba Nnu'ngu' no sali no sukulu, gamugalu'ba gatanganikwe na Nnu'ngu'. 7 Nayembe amani ya Nnu'ngu' yaipi'ta lunda lwoti lwa bandu, yalu'a li'ndi'la myoyo yinu na maganio ginu muulu'mbani winu na Yesu Kilisitu.

8 Kuundi'la mwaalongo bangu' mubini kugagania makowe goti gagabile ga kweli, ga isima, ga aki, gangali ulau, go nogelelya, gagapendelwa longelelwa, na go lumbilwa. 9 Mugapange galu' gamwiyi'ganiye na kugapokya bu'ka kasangu', galu' gamuyu'wine kanigabaya na kugabona kanigapanga. Naywembe Nnu'ngu' ywatuyalya amani aalu'a baa pamope na mwenga.

10 Nitepulaika muno kwa Bwana, kwa mwanjaa mulayite kai' panga mwendaniku'mbu'kya. Mwayendeli kuniku'mbu'kya, lakini yaabile ntu'pu' ndi'la yo laya likowe li'no. 11 Nimmakianga gano kwenda kwa mwanjaa nipala yangatiyilwa na ywoywotili, kwa mwanjaa niiyi'ganiye li'ngana na sosoti sanibile naso. 12 Nitangite oya na ata meya. Niiyi'ganiye iyo yo yi'ki'tyana na kila ali, yukuta au njala, nsimu wo meya au nsimu wo oya. 13 Nikombwa kugayi'ki'tya makowe goti kwa ywembe ywaniyi'ya makakala. 14 Ata nyo mwaapangite kinannoga kwo panga kiselele pamope na nenga mutabu yangu'.

15 Bu'ka pa ago mwenga mwabandu ba Filipi mutangite panga masu'ba ganaatumbwi ala Abali Inannoga panaabu'i Makedonia, mwenga kisinu nga likanisa lyaliniyangatiye mumakowe go piya no pokya. 16 Kwa mwanjaa ata panaabile Tesalonike mwaniyangatiye mala yambone bu'kana na makowe ganigapala. 17 Kwenda nenga nipala nipoki upoli, ila nipala pwaila iyongekeyelwe mumabi'ko ginu. 18 Nibile na kila kili'be sanikipala. Kai' nibile na yo pi'ti'li'ki'ya yaniipalage kwa mwanjaa, Epafrodito anileti kila samwampeile. Upo yinu ibile kati salaka yene lumba lunannungya yaipiyilwa kwa Nnu'ngu', nga salaka yaiyi'ki'tya na yainnogelelya. 19 Bai, kwa ndi'la ya Yesu Kilisitu, Nnu'ngu' wangu' aalu'a timilisa goti gamugapala, bu'kana na uyolou wa utukupu wa utayili wake. 20 Utukupu ube kwa Nnu'ngu' witu na Tati' bitu, milele na milele. Amina!

21 Nendakunsalimia mwaapeleteu boti, mwamubile mwabake Kilisitu Yesu. Alongo boti bababile pamope na nenga pano bendakunsalimiyanga. 22 Na apeleteu boti bababile pano bendakunsalimiyanga, munomuno balu' babatama munyumba ya Kaisali.

23 Ngu'ngu' ya Bwana witu Yesu Kilisitu ibe pamope na mwenga.