1 Balua yi'no iandikilwe na nenga na Pauli, nantumilwe wa Yesu Kilisitu kati mwapendi Nnu'ngu', na nnongo witu Timoteo. 2 Tumwandikya mwaapeleteu mwamuu'bi'li'ka mu Kilisitu mwamubile Kolosai. Ngu'ngu' na amani yaibu'ka kwa Nnu'ngu' Tati' bitu ibe pamope na mwenga.

3 Kila patunnu'bya, tunsukulu Nnu'ngu' Tati' wa Bwana witu Yesu Kilisitu. 4 Na twenga tunsukulu ywembe kwa mwanjaa tuyu'wine bu'kana no u'bi'lya kwinu mu Kilisitu Yesu, na upendo winu kwa apeleteu boti. 5 Imani na upendo winu, ibu'kana na mau'bi'lyo gagabi'kilwe kunani na Nnu'ngu' kwa kitumbu sinu. Alyo nga liu'bi'lyo li'li'lu'li'lu' lyamwabile nalyo bu'ka pamwatumbwi aalilwa abali ya kweli, lombolya Abali Inannoga. 6 Abali Inannoga yo yayaaikite kwinu mwenga, ilandala mudunia yoti, no yendelya kwapanga bandu bagalambuki kwa Nnu'ngu' kati mu'lu' mwayaapiti kwinu tumbulya lisu'ba lyamwayu'wine na kwitanga kakape ngu'ngu' ya Nnu'ngu'. 7 Abali yo mwaiyu'wine bu'ka kwa Epafila, ywembe ntumisi ywapendilwe pamope na twenga. Ayu' atuyangatia twenga kati ntumisi wa Kilisitu ywau'bi'li'ka. 8 Ywembe ngaywaatupei abali ya upendo winu wamuyaliwite bu'ka kwa Loo.

9 Kwa kitumbu si', tunatotokelwali kunnu'bya mwenga bu'ka lisu'ba lyatuyu'wine abali yinu. Tunnu'ba Nnu'ngu' annyu'gu'li kugatanga munomuno gaagapenda ywembe na kuntwi'li'ya ikima no tanga kwakubu'ka kwa Loo wake, 10 li'nga ago gannyangatiye tama maisa gagannetya Bwana isima na kumpulaisa ywembe muali yoti. Maisa ginu gabeleye itunda inannoga ya sampuli mbali'mbali', no yongeya kuntanga Nnu'ngu'. 11 Tulu'ba Nnu'ngu' ankangamaye kwa makakala gake maku'lu' li'nga muwese komeya goti pangali totokelwa. Bai, munapusike, 12 kamwasukulu Tati' babapangite muwese panga kiselele muulisi wa apeleteu babatama muukulungwa wa bweya. 13 Aatukosopoli bu'ka muukulungwa wa lubi'ndu' na kutuamiya tuyingi muukulungwa wa Mwana wake ywampendile, 14 kwo pi'tya Mwana wake tukombolilwe, na masambi gitu gasamilwe.

15 Kilisitu nga kuminyo ya Nnu'ngu' ywangali bonekana,

mmele mwene amuli kwa yumbe yoti.

16 Kwa ywembe ili'be yoti yaatiumbilwa,

yaibile padunia na kunani,

yaibonekana na yangali bonekana,

bene lenji, akulungwa, atawala au bene amuli,

yoti yaumbilwe kwake ywembe, na kwa kitumbu sake.

17 Ywembe aabile ili'be yoti ibile balo,

yoti iba kwa uweso wake.

18 Ywembe nga ntwe wa yi'ga yake, lombolya kanisa,

ywembe nga kitumbu sa bwu'mi wa ayo yi'ga,

Ywembe nga nnongoi,

mmele bu'ka kuuwi'li,

li'nga abe nnongoi wa ili'be yoti.

19 Mwanjaa, Nnu'ngu' aapendi timilika kwake kwoti kube nkati yake Mwana.

20 Kwa ywembe ili'be yoti yaawaniyilwe na Nnu'ngu',

kwa myai yake munsalaba aaipangite amani,

na ili'be yoti ya mudunia na kunani.

21 Kwai'mbu', mwenga mwabile kuutalu na Nnu'ngu' kwa mwanjaa mwaai mwaandumu bake bu'kana no wasa kwinu na itibe yinu akau. 22 Lakini nambi'yambi' bu'kana na kiwo sa Mwana wake ywaatami pano padunia, Nnu'ngu' amwawaniye na ywembe li'nga ammi'ke nnu'ngi' yake mubile mwaapeleteu, mwalengelya pangali laumilwa. 23 Ila kanemuyi'ki'ti kunyangunyilwa bu'ka muliu'bi'lyo li'lu' lyamulipatike palu' pamwiyu'wine Abali Inannoga yaialilwe kwa kila mundu pano padunia. Nenga na Pauli naabile na ntumisi wa Injili yo. 24 Nambi'yambi', niipulaikya ngu'su'mbu' yaniipata kwa kitumbu sinu. Muyi'ga yangu' nipanga kiselele na ngu'su'mbu' ya Kilisitu yaiyendelya kwa kitumbu sa yi'ga yake, lombolya kanisa.

25 Bu'kana na mwabi'kite Nnu'ngu', aanibi'kite nenga nipange nantumisi wake li'nga nimwali mwenga mu'lu' mwaibile Abali Inannoga yake yoti. 26 Abali yo nga yi'lu' iyo yayaaiyilwe bu'ka kwai'mbu' kwa mbelekwo yoti, lakini nambi'yambi' aumukulile apeleteu. 27 Nnu'ngu' apalike kwabakia bandu bangali Ayahudi uku'lu' wa iyo yo. Nayembe nga yi'no, Kilisitu abile nkati yinu, lombolya panga liu'bi'lyo lya utukupu. 28 Kwa kitumbu so, tumwala Kilisitu kwa bandu boti, kwakalipya na kwayi'gana boti kwa ikima yoti li'nga tuwese kunneta kwa Nnu'ngu' kila mundu abile nkomala kwo lu'mbana na Kilisitu. 29 Kwo panga nya, nipanga lyengo kwo kasana, kanitumya na makakala maku'lu' ganipeyilwe na Kilisitu. Makakala go gapanga kasi muno mumaisa gangu'.