1 Nipala mutange mu'lu' mwanikasana panga kasi kwa kitumbu sinu, kwa kitumbu sa aumini ba Laodikia na kwa kitumbu sa boti bababile balo kunibona. 2 Nipala aumini boti bapendane no kangamayana bene na bene. Kwo panga nyo, Nnu'ngu' aalu'a kwayalya muno li'nga batimi tanga wiso iyo yaiumukulilwe na Nnu'ngu', lombolya Kilisitu mwene. 3 Nkati yake nga mwagaiyilwe mabi'ko goti ga ikima na ilimu.

4 Nimmakianga go li'nga mwaakane yi'ki'tya kongelwa na mundu ywoywoti kwa makowe gake ga ubu'su', ata ikatei gabonekana go utya muno. 5 Pamope no panga nibile kuutalu na mwenga, lakini nibile pamope na mwenga kwa Loo. Nipulaika mu'lu' mwanimmona kamupanga kasi pamope kinannoga no kangamala kwa imani yinu kwa Kilisitu.

6 Bai, kwa mwanjaa mumwu'bi'li Kilisitu Yesu nga Bwana, muyendeli tama kwo lu'mbana nakwe. 7 Na ndandai yinu iyendeli ku'la ata nkati yake na kwisenga muimani kati mu'lu' mwamuyi'ganilwe. Kai', mube mwabandu ba kunsukulu Nnu'ngu' wakati woti.

8 Mutame minyo kanemuyi'ki'ti mayi'gano ga ubu'su', gagabu'kana na mimu ya bandu na ndi'la yaitawala dunia yi'no. Mayi'gano go, gabu'kanali na Kilisitu. 9 Nilongela li' kwa mwanjaa Nnu'ngu' kati mwabile ntimya kwa Unnu'ngu' wake, ubile nkati ya Kilisitu. Ayi' yaai ata mumaisa gake pano padunia. 10 Kwa mwanjaa mwenga mutimilike kwo lu'mbana na Kilisitu. Ywembe nga ntawala wa kila makakala na kulungwa yi'ngi' yoti.

11 Mwainilwe mu Kilisitu kwenda kwa maboko ga kimunduli, ila kwa ndi'la yo ula yi'ga yinu ya sambi. 12 Na pamubatisilwe, mwatisikilwa no yu'ka pamope nakwe bu'kana no u'bi'lya kwinu kwa makakala ga Nnu'ngu' ywannyu'yite Kilisitu bu'ka mukiwo. 13 Namwenga mwaai kati mwawaa kwa kitumbu sa masambi ginu, kai' mwainilweli yi'ga yinu ya sambi, lakini Nnu'ngu' aampei ukoto pamope na Kilisitu na atusami masambi gitu goti. 14 Aakiputike seti sa leni sa kutusitakya na kutuukumu, na kuibu'ya, kwikong'ondya munsalaba kaneibe kai'. 15 Kwa ndi'la ya nsalaba, Kilisitu aapokonywi utawala kwa atawala na bene yeo, ngaasinda kwa si'li'ku'si'li'ku' na kwapeya oni bandu kabalola.

16 Bai, mundu kaneansenwe bu'kana na yakulya, au yamunywaa, au si'li'ku'si'li'ku' ya dini au lisu'ba lyo boneka kwa mwei, au lisu'ba lya Sabato. 17 Ago goti, kiwili bai sa makowe gagalu'a isa. Lakini makowe ga kakape gabonekana mu Kilisitu mwene. 18 Kanemuyi'ki'ti ukumilwa na mundu ywoywoti ywailaya kwa panja panga ywembe endagegekeya na kwakilikitya malaika. Mundu ywa kubi nnya aipunia ulalo wa mawaso gake ga kimundu. 19 Ywembe alu'mbanali na ntwe, lombolya Kilisitu, na yi'ga yoti imwu'bi'lya ywembe. Kwa kitumbu sa Kilisitu, ili'mbi'li'mbi' yoti ya payi'ga yendakotana no yangatiyana simo na si'ngi', kwo bu'kana na Nnu'ngu' mwaipeya uweso wo ku'la.

20 Bai, manaitei mwawile pamope na Kilisitu na kuileka ndi'la yaitawala dunia yi'no, mwanjaa namani mwiyingiya pai' ya salya kati mwabatama bandu ba mudunia yi'no? 21 "Kanemukamwe si'lu'!" "Kanemupaye si'!" "Kanemukunywe si'!" 22 Salya yi' ilagya ikowe ya padunia, ikowe yooba bu'ka pakwitumya. Amuli yi' na mayi'gano gake, ga kimundu bai. 23 Salya yi', ibonekana panga ya ikima bu'kana na ibala yo li'ndi'ndi'lya, gegekeya kwa panja na kwitawala yi'ga kwa malango, lakini ipwaikali kugakanikia maminyikiyo ga payi'ga.