1 Na mwenga mwaangwana, mwapangi aki abanda binu kati mwaipalikwa, kamuku'mbu'kya panga, namwenga mubile na Bwana kunani.

2 Katu, kanemukotoke saalya! Muyi'me wiso kwa lyolyoti kwo lu'ba no sukulu. 3 Kai', mutulu'bi twenga li'nga Nnu'ngu' atuyu'gu'li nniango wa kwiala abali yaibu'kana na iyo ya Kilisitu. Kwa kitumbu sa yo, nambi'yambi' nenga nibile muutabilwe. 4 Munilu'bi nipate kugalongela ganipalikwa longela, li'nga niwese kwiumukwa kweli yi' kwa kila mundu.

5 Mube na ikima palu' pamupanga makowe pamope na bandu bangali kumwu'bi'lya Yesu. Mutumi wiso wakati winu. 6 Mayi'gi'yo ginu gabe manogau na go utya masu'ba goti li'nga mutange kunnyangwa wiso kila mundu.

7 Tikiko, nnongo witu ywapendilwe na ntumisi nnyangu' ywau'bi'li'ka mu Kilisitu Bwana, aalu'a kummakia makowe gangu' goti. 8 Nintuma kwinu li'nga mupate tanga mu'lu' mwatuyendelya na kunnyi'ya mwoyo. 9 Nintuma ywembe na Onesimo, nnongo witu ywapendilwe na ywau'bi'li'ka, abo, baalu'a kummakia abali ya makowe goti gagapangika pano, kai' aywo mundu wa kasinu.

10 Alisitako, ntabilwe nnyangu', endakunsalimia na Maluko mwibaniwe Balanaba, nembe endakunsalimia. Mupokile malagyo gagabu'kana no isa kwa Maluko, mana aikite kasinu mumpoki wiso. 11 Nembe Yoshua ywakemelwa Yusto endakunsalimia. Mu Ayahudi babapoki imani, aba kisabe bai ngabapanga kasi pamope na nenga kwa kitumbu sa ukulungwa wa Nnu'ngu'. Kwangu' nenga, abo bapangite ayangatiyi aku'lu'. 12 Epafila, ntumisi ywi'ngi' ywa Yesu Kilisitu, kai' mundu ywa kasinu, endakunsalimia. Ywembe akasana kunnu'bya mwenga kila palu'ba li'nga muyi'me kwo kangamala, mukomale kiloo, no yi'ma wiso kwa makowe goti gapala Nnu'ngu'. 13 Nikong'ondelya panga, endakasana panga kasi kwa kitumbu sinu na kwa bandu ba ilambo ya Laodikia na Hierapoli. 14 Luka, yu'lu' nng'anga witu ywatumpendile, na Dema, bendakunsalimia.

15 Salamu yitu kwa alongo ba Laodikia. Mwasalimie dada Nimfa pamope na kipi'nga sa aumini babakwembana kasake. 16 Balua yi'no mana muyomwi kwisoma, mupange kila ndi'la li'nga ikasomelwe kukanisa lya Walaodikia, na yi'lu' yaniandike kwa Laodikia, isomelwe na mwenga. 17 Ummakiye Arkipo panga, "Wilinguli wiso kasi yi'lu' yaupeyilwe na Bwana li'nga wiyomoli." 18 Nenga na Pauli niandika salamu yi'no kwa luboko lwangu' namwene. Muku'mbu'ki panga nibile muutabilwe. Ngu'ngu' ya Nnu'ngu' ibe pamope na mwenga.