1 Bai, kwa mwanjaa mwaayu'yilwe pamope na Kilisitu, mugapale gagabile kunani kwabile Kilisitu, ywatama kummalyo ga Nnu'ngu'. 2 Kanemuwase gano gagabile pano padunia, ila muwase gagabile kunani. 3 Kwa mwanjaa, mwawile na bwu'mi winu wiyilwe pamope na Kilisitu nkati ya Nnu'ngu'. 4 Bwu'mi winu ubu'kana na Kilisitu. Palu' paalu'a bonekana, namwenga nga pamwaalu'a bonekana pamope nakwe no panga kiselele muutukupu wake.

5 Kwa nyo, mugataikuli kuutalu makowe goti ga mudunia yi'no gagabile nkati yinu kati upege, usapu, maminyikio malau, mawaso maakau, no minyikia mali, ipanga nsawani na kwikilikitya inyago paali pa Nnu'ngu'. 6 Kwa kitumbu sa makowe kati go, Nnu'ngu' ngaausikya bandu bangali kunnyu'wa. 7 Namwenga kwai'mbu' mwaapangite malau, pamutami kati bembe. 8 Lakini nambi'yambi' mupalikwa mulekangane na makowe aga goti kati nyongo, minyikia na ulau, matukano au mayi'gi'yo gangali pwaika, katu kanegayu'wanike mumikano yinu. 9 Kanemukongane kwa mwanjaa, muulike ube winu wa kwai'mbu' na iyendo yake, 10 na nambi'yambi' muuweti ube wayambi' waupangika wayambi' kila lisu'ba mpaka kuwikya utangi waubu'kana na Nnu'ngu' ywamuumbike mwenga. 11 Apo, ntu'pu' Nnyunani au Nnyahudi, mwinilwa au ywangainilwa, nng'eni au ywangali soma au mmanda au ngwana. Kilisitu nga ywangama muno na abile nkati yinu mwaboti.

12 Bai, kwa mwanjaa mwenga musaulilwe na Nnu'ngu' na mwaapeleteu mwamupendelwa, apala mube na mwoyo wa kiya, mwanoga mwoyo, mwaagegekeu, mwatu'lya na mwakomeyi. 13 Mukomeyane no samyana. Manaitei yumo ywinu abile na kitumbu na nnyine, mupalikwa samyana kati mu'lu' Bwana mwansami mwenga. 14 Pamope na ago goti, muuwale upendo. Wembe nga kili'be sakilu'mbaniya kamilika. 15 Amani ya Kilisitu itawale mumyoyo yinu. Mwenga mupangike mwa yi'ga yimo, kwa nyo mukemilwe tama kwa amani. Kai', kanemulibali kunsukulu Nnu'ngu'. 16 Liyi'gi'yo lya Kilisitu liyolokane nkati yinu, muyi'ganane no kwi'li'kana kwa ikima yoti. Munnyi'mbi Nnu'ngu' kwa myoyo yinu yo sukulu kamutumya Zabuli, tenzi, na myambo ya Loo. 17 Lyolyoti lyamupanga au longela, mupange kwa lina lya Bwana Yesu kamwasukulu Tati' Nnu'ngu' kwo pi'tya ywembe.

18 Mwenga mwaalwawa, mwayu'we akinaasengo binu kati mu'lu' mwaipalikwa kwa bandu babamwu'bi'lya Bwana. 19 Na mwenga mwanalu'me, mwapende akinaayumbo binu kanemube mwakali' kwabe.

20 Mwenga mwabana, mwayu'we abelei binu kwa makowe goti, kwo panga nya mumpulaisa Bwana. 21 Mwenga mwaakinatati', kanemwasokesoke bana binu baakane ti'kwanika mwoyo.

22 Mwenga mwaabanda, mwayu'we abo angwana binu kiyi'ga kwa makowe goti. Kwenda kwa kwilaya paminyo ga bandu bai lili, ila kwa ugolou wa mwoyo kamunnyogopa Nnu'ngu'. 23 Kila samupanga, mupange kwa myoyo yinu yoti kati muntumikia Bwana, kwenda munduli. 24 Muku'mbu'ki panga mwapokya upo ya ulisi bu'ka kwa Bwana. Kilisitu nga Bwana wa kweli ywamuntumikia. 25 Kwa mwanjaa Nnu'ngu' abawali, kila ywapanga ulau aalu'a pwatilwa kwa kitumbu sa ulau wake.