1 Buli, maisa ginu mu Kilisitu gampeyanga makakala? Buli, upendo wake unkamwa mboko? Buli, mubile na umope na Loo Mpeleteu no bi'kyana kiya no ku'ku'li'kyana mwabene na bene? 2 Bai, muitimilise pulaa yangu' kwo baa na mabinio gamo, pendana mwabene na bene, muyu'wangane na muganiye gamo. 3 Kanemupange lyolyoti kwa kwikwi'ya wala kwipuna, ila kwo gegeya, kila mundu ammalangili nnyine panga ywa ngama kuliko mwene. 4 Kila yumo ywinu kaneaganiye makowe gake mwene baili, ila aganiye na makowe ga bi'ngi'. 5 Mube na mabinio gaagalu'galu' gaabile nago Kilisitu Yesu.

6 Bu'ka kwai'mbu' ywembe aabile kati mwabile Nnu'ngu',

lakini ku'lu' baa nsawani na Nnu'ngu',

aakibweni kili'be so pu'tu'lyana nasoli muno.

7 Ila ngalekekeya kila kili'be,

na kwiuluya no panga kati ntumisi,

ngabelekwa kuminyo ya mundu,

kakape mundu.

8 Aatigegekeya no yu'wa mpaka waa,

ata waa munsalaba!

9 Kwa kitumbu so Nnu'ngu' amwu'bwiye Yesu kunani muno kuliko ili'be yoti,

ngaampeya lina liku'lu' lyalipi'ta maina goti,

10 li'nga kwa isima ya lina lya Yesu,

yumbe yoti kunani, padunia na kumambi',

ikilikite nnu'ngi' yake,

11 na boti bayi'ki'ti panga Yesu Kilisitu nga Bwana,

kwa utukupu wa Tati' Nnu'ngu'.

12 Kwa nyo mwaapendwa bangu', panaabile na mwenga kakape mwendeniyu'wa na ata nambi'yambi' panibaa kuutalu na mwenga muyongeye yu'wa muno. Muutimilise ukosopoli winu mwabene kwo lendema no yogopa. 13 Kwa mwanjaa Nnu'ngu' ngaywapanga kasi nkati yinu na kumpeya mwoyo wo penda timisa makowe gagannogelelya mwene.

14 Mupange makowe goti pangali ku'ku'li'ka wala taukana, 15 li'nga mwapange mwabandu mwaapeleteu pangali lukoolo, bangali kipi'li' nnu'ngi' ya Nnu'ngu', mwamutama mudunia akau na yaialabike. Mwalu'a melemetya pakati yabe kati ndondwa mwaimelemetya padunia. 16 Mulikamwe liyi'gi'yo lya ukoti, li'nga nipate kwipuna mulisu'ba lya Kilisitu panga binia kwangu' na kasi yangu' yaai yabuleli.

17 Ata ikatei naapiya maisa gangu' na myai yangu' yaayitanika kati salaka pamope na imani yinu yaipanga salaka nnu'ngi' ya Nnu'ngu', nenga nalu'a pulaika, kai' naalu'a pulaika pamope na mwenga mwaboti. 18 Na mwenga nyinyonyo mupulaike kai' mupulaike pamope na nenga.

19 Bwana Yesu mana apenda nipala kuntuma Timoteo aise kasinu nambi'yambi', li'nga paaki'li'bu'kya kasangu' nayi'yi'lwe mwoyo kwa kitumbu so yu'wa abali yinu. 20 Nintuma ywembe kwa mwanjaa ntu'pu' mundu ywi'ngi' ywanku'mbu'kya mwenga kwa mwoyo woti kati Timoteo. 21 Kwa mwanjaa kila mundu aukilya muno makowe gake, na wala galu' ga kasi ya Yesu Kilisitu lili. 22 Mwenga mwabene mutangite mwailayite Timoteo panga ayi'ki'tilwe kwa mwanjaa apangite kasi ya Abali Inannoga pamope na nenga kati mwapanga mwana na tati' bake. 23 Kwa nyo niu'bi'lya kuntuma kasinu palu' panalu'a tanga makowe gangu' mwagaayendelya. 24 Nanenga nimwu'bi'lya Bwana panga nibile papipi no isa kunnola.

25 Lakini nibweni bola kai' kuntuma kwinu Epafrodito, nnongo wangu' na mpangakasi nnyangu' ywabile asikali nnyangu'. Ywembe ywo nga ywamwantumike kuniyangatia muupali wangu'. 26 Ywembe abile na kilu'lu' muno sa kummona mwaboti, kai' abile na kyukala kwa mwanjaa mwaayu'wine panga aabile ntamwe. 27 Eloo, aabile ntamwe papipi no waa. Lakini Nnu'ngu' ammi'ki kiya, na wala ywembe baili ila ata nenga aanibi'ki kiya li'nga kaneniusunike muno. 28 Kwa nyo nintuma kasinu kiyu'ngu'ya, li'nga pamwalu'a kummona kai' mwapate pulaika, na nenga kyukala sangu' saalu'a pu'ngwa. 29 Kwa nyo mumpoki mu Bwana kwa pulaa ngu'lu' na mwenga mwapei isima bandu bababile kati ywo, 30 kwa mwanjaa ywembe aabile papipi no waa kwa kitumbu sa kasi ya Kilisitu. Aagabi'i maisa gake mmaule kwa kitumbu sa kuniyangatia galu' gangalikombwa mwenga kuniyangatia.