1 Kwa nyo mwaalongo bangu', mupulaike kwa mwanjaa mwenga mwabake Bwana. Nitotokelwali ki'li'bu'kya kumwandikya galu' ganaamwandikile patumbu, kwa mwanjaa gali'ndi'la imani. 2 Mwili'ndi'le na balu' babapanga malau, abo mapwa, mwili'ndi'le na balu' babakong'ondelya kwikata yi'ga yabe. 3 Bandu babainilwe kwa kakape nga twenga, kwenda bembeli, kwa mwanjaa twenga tunkilikitya Nnu'ngu' kwa ndi'la ya Loo wake na kwibona kinemi kwo lu'mbana na Kilisitu Yesu. Twenga tubi'kali liu'bi'lyo litu mumakowe ga kiyi'ga. 4 Nenga namwene nilu'e wesa baa na kitumbu sa kwiu'bi'lya yi'ga. Manaitei mundu ywoywoti ywakita abile na kitumbu sa kwiu'bi'lya yi'ga, nenga nga kimuno. 5 Nainilwe lisu'ba lya nane bu'ka belekwa kwangu', nenga na Mwisilaili wa lukolo lwa Benyamini, na Mwebrania wa kweli. Kwa abali ya salya naai na Falisayo. 6 Naabile namundu ywapenda muno kunnyu'wa Nnu'ngu' ata nganiliku'su'mbwa kanisa. Na kwo bu'kana na aki yaipatikana kwa kwikamwa salya, nenga naabileli na likosa lyolyoti. 7 Lakini makowe goti gagaabile ga pwaila kasangu' nambi'yambi' nigabalangilya kili'beli kwa kitumbu sa Kilisitu. 8 Bu'ka pa ago goti, nibalanga panga makowe goti kili'beli kanilandanisa na pwaila ngu'lu' munomuno ya kuntanga Kilisitu Yesu Bwana wangu'. Kwa kitumbu sake niyi'ki'ti obeya goti, kanibalanga panga kati mmai li'nga kumpata Kilisitu, 9 no lu'mbana nakwe kabisa. Na nenga nibalangilwali aki kai' bu'kana na makowe ganigapangite, ago nga galu' ga aki yaipatikana kwa kwikamwa salya. Lakini nibalangilwa aki kwa ndi'la ya kumwu'bi'lya Kilisitu, nga yi'lu' aki yaibu'ka kwa Nnu'ngu' na ywembe ammalangilya aki yu'lu' ywamwu'bi'lya. 10 Kili'be sanikipala muno nga kuntanga Kilisitu na uweso waunnyu'yite bu'ka mukiwo. Nipange kiselele mungu'su'mbu' yake no landana nakwe mukiwo sake, 11 kaniu'bi'lya panga na nenga nalu'a yu'yi'lwa bu'ka mukiwo.

12 Niipunali panga niyomwike sinda au nikamilike. Lakini nendakasana li'nga nipate kulikamwa li'lu' kwa kitumbu sake Yesu Kilisitu anikamwile na kunipanga naywake. 13 Mwaalongo bangu', niibalangali panga niyomwike ika. Ila nilipanga likowe limo bai, nigalibalya makowe gagapite, no kasana kugapanga wiso makowe gagabile nnu'ngi' yangu'. 14 Niyendelya kasana li'nga kuundi'la nipate sinda no peyelwa upo yangu'. Nnu'ngu' mwene anikemite pata upo yo yingya kunani kwa ndi'la ya Yesu Kilisitu. 15 Twenga twaboti twatukomile muimani, tupalikwa tuganiye gamo. Na mana abile yumo nkati yinu ywagania mbali', Nnu'ngu' alu'a kumwumukulya makowe go. 16 Pano kili'be sa ngama, tuyendeli kugakamwa galu' gatubile nago.

17 Mwaalongo bangu', muniyige nenga na kwiyi'gana kwa balu' babatama kati mwatulayite kasinu. 18 Kwa nyo kati mwanammakiye mala yambone na nenga nambi'yambi' nibaya kai' kwa moli, bandu baingi batama kati andumu ba nsalaba wa Kilisitu. 19 Kuundi'la yabe langanyika, kwa mwanjaa itumbo yabe nga nnu'ngu' wabe, baibona kinemi bu'kana na makowe gabe ga oni, na bagania makowe ga padunia bai. 20 Lakini twenga nga twabenekaya ba kunani na tunni'nda Nkomboli witu Bwana Yesu Kilisitu aise bu'ka kunani. 21 Ywembe aaigalambuya yi'ga yitu ya ukigopi na kwipanga ilandane na yi'ga yake ya utukupu, kwa makakala galu' gagakombwa kwibi'ka ili'be yoti pai' ya utawala wake.