1 Patumbu mwenga mwaawile kiloo, kwa kitumbu sa makosa na masambi ginu. 2 Mutamage kwa kuukoleya nnyendo mwakau wa padunia yi'no, na kunnyu'wa Ibilisi, ntawala wa moka ga kumaunde ywatawala nambi'yambi' bandu bangali kunnyu'wa Nnu'ngu'. 3 Ata twaboti twaai kati bembe, twaatami kwo koleya maminyikiyo ga payi'ga na kugapanga makowe gagapendelwa na yi'ga na malango gitu. Kwa ali yitu ya kiyi'ga, twaapalikwe kwipata nyongo ya Nnu'ngu' kati bi'ngi'. 4 Lakini Nnu'ngu' nga mwene kiya sambone, na aatupendi kwa upendo wangayomoka. 5 Ata mana twaabile twawaa kwa kitumbu sa masambi gitu, aatuyu'yite pamope na Kilisitu. Kwa nyo, tukosopolilwe kwa ngu'ngu' ya Nnu'ngu'. 6 Kwo lu'mbana na Kilisitu Yesu, Nnu'ngu' aatituu'bu'ya na kututamika pamope nakwe li'nga tukatawale pamope kunani. 7 Aapangite nyo li'nga laya unogau wake kwitu munsimu wawisa pi'tya Kilisitu Yesu, na uyolou wa ngu'ngu' yake yangayomoka. 8 Kwa mwanjaa, mukosopolilwe kwa ngu'ngu', kwa ndi'la ya imani wala kwa yendo yinu inannogali. Yi'no nga upo bu'ka kwa Nnu'ngu'. 9 Ankosopoli lili kwa iyendo yinu, kwa nyo mundu aakane kwilumba. 10 Nnu'ngu' nga ywatupangite tube kati mwatubile. Aatuumbite mpya mu Kilisitu Yesu li'nga tupange makowe manogau mumaisa gitu, makowe gaatubi'kile tugapange.

11 Kwa nyo muku'mbu'ki panga patumbu mwaabelekwi mubile mwa Ayahudi lili, ila mwabandu bangali Ayahudi. Na bankemage "Mwangainilwa" na bembe Ayahudi baaikemite "Ainilwa" kwo bu'kana no inilwa kwabe kwakupangilwa muyi'ga kwa moko ga bandu. 12 Muku'mbu'ki panga patumbu mwaabileli na Kilisitu. Na mwaabileli mwabandu ba Baisilaili, mwaatangiteli masikisano ga malagano gaabi'i Nnu'ngu' kwa bandu bake. Mwabileli na liu'bi'lyo wala mwaantangiteli Nnu'ngu'. 13 Lakini nambi'yambi' kwo lu'mbana kwinu na Kilisitu Yesu, mwenga mwamwaabile kuutalu muletilwe papipi kwa ndi'la ya myai yake. 14 Kwa mwanjaa Kilisitu mwene nga ywaatuleti amani kwo panga Ayahudi na bandu bangali Ayahudi babe amope. Aabu'yite undumu waubile kati kingu'mbi' pakati yitu. 15 Ywembe aaputike salya ya Ayahudi pamope na amuli na malagyo gake. Apangite nyo li'nga kwapanga bandu bano ba ngolo ibi'li' babe lukolo lumo. 16 Kwa yi'ga yake, Kilisitu aaulangamise undumu wabe, kwa nsalaba aailu'mbaniye ngolo ibi'li' ya bandu ibe lukolo lumo na kwaawana na Nnu'ngu'.

17 Apo Kilisitu aaisi kwa kitumbu so ala Abali Inannoga ya amani kwa bandu bangali Ayahudi babaabile kuutalu na Nnu'ngu' na kwa Ayahudi babaabile papipi na Nnu'ngu'. 18 Kwa mwanjaa, kwa ndi'la ya Kilisitu twenga twaboti, Ayahudi na bandu bangali Ayahudi, tupatike ndi'la ya kwayendelya Tati' kwa Loo yumo.

19 Bai nambi'yambi' mwenga mwagenili wala mwapi'ta ndi'lali, ila muyu'kite mwabenekaya pamope na apeleteu, na kai' mwaalongo mulukolo lwa Nnu'ngu'. 20 Musengilwe munsingi waubi'kilwe na atumilwe na alondoli ba Nnu'ngu', naywembe Kilisitu mwene nga liwe liku'lu' lya nsingi. 21 Kwa ywembe, nyumba yoti ilu'mbaniyilwe wiso no yi'mi'ki'lwa ata ipange nyumba mbeleteu kwa Bwana. 22 Kwo lu'mbana nakwe, mwenga mulu'mbaniyilwe pamope na bi'ngi' boti no pangilwa potamo wa Nnu'ngu' kwa ndi'la ya Loo wake.