1 Bu'kana na go, nenga na Pauli nendakunnu'bya. Nenga nantabilwe kwa kitumbu sa lyengo lyaanipei Yesu Kilisitu kwinu, mwabandu bangali Ayahudi. 2 Niibona mutangite panga, kwa ngu'ngu' yake Nnu'ngu' aanikamukiye lyengo lya kumwaalya mwenga Abali Inannoga, 3 yani yi'lu' iyo yaiumukulilwe kwangu' nenga kati mwanilongoli andika. 4 Kwo soma gano muwesa tanga mu'lu' mwaniitangite iyo ya mabinio ga Nnu'ngu' kwa Kilisitu. 5 Kwai'mbu' bandu baabakiyilweli iyo yo, lakini nambi'yambi' Nnu'ngu' aabakiye atumilwe na alondoli ba Nnu'ngu' apeleteu, kwa ndi'la ya Loo. 6 Iyo yene nga yi'no, kwa ndi'la ya Injili bandu bangali Ayahudi bapata pandu pabe pabalaka ya Nnu'ngu' pamope na Ayahudi. Bembe nga ili'mbi'li'mbi' ya yi'ga yi'yi'lu'yi'lu' na bapanga kiselele mulilagano li'li'lu'li'lu' lyalipangite Nnu'ngu' kwa ndi'la ya Kilisitu Yesu.

7 Nenga nipangilwe na ntumilwe wa Injili kwa ngu'ngu' yaniyali Nnu'ngu' kwa uweso wake nku'lu'. 8 Nenga nansene kulikoni bandu boti ba Nnu'ngu', lakini Nnu'ngu' aniyali ngu'ngu' ngu'lu' ya kwaalya bandu bangali Ayahudi Abali Inannoga ya Kilisitu, 9 na kumumukulya kila mundu iyo yayaaiyilwe na Nnu'ngu' ywaumbike ili'be yoti bu'ka kwai'mbu'. 10 Li'nga nambi'yambi' kwa ndi'la ya kanisa, ikima yoti ya Nnu'ngu' ipate tanganikwa kwa atawala na bene makakala ga kunani. 11 Nnu'ngu' aapangite likowe lyo bu'kana no binia kwake kwangaliyomoka kwaapangite kwa ndi'la ya Yesu Kilisitu Bwana witu. 12 Bai, kwo lu'mbana kwitu na Yesu Kilisitu kwa ndi'la ya kumwu'bi'lya, tupeyelwa ndi'la yo ika nnu'ngi' ya Nnu'ngu' pangali yogopa. 13 Kwa nyo, ninnu'banga kanemuti'kwanike mwoyo kwa mwanjaa, niipata ngu'su'mbu' kwa kitumbu sinu na ngayainnetya isima.

14 Bai, kwa kitumbu sa makowe ago goti, ninkilikitya Nnu'ngu'. 15 Ywembe nga Tati' ba ili'be yoti yaibile padunia na kunani. 16 Ninnu'ba Nnu'ngu' kwa uyolou wa utukupu wake, annyali makakala li'nga mube mwakangamau mumyoyo yinu kwa ndi'la ya Loo wake, 17 li'nga Kilisitu apate tama mumyoyo yinu kwa ndi'la ya imani. Nanenga nilu'ba panga namwenga mube na ndandai kai' ngangamau kwa nsingi wa upendo. 18 Mube na uweso wo tanga pamope na apeleteu boti mu'lu' mwaulandala upendo wa Kilisitu, kwo panuka, ulaso, kyi'mo no yendekeya, 19 na kuutanga upendo wu'no waupi'ta utangi wa bandu boti, li'nga mupate twi'li'yi'lwa no ikya kukili'ngo so timilika kwoti kwa Nnu'ngu'.

20 Bai, kwa ywembe ywawesa panga makowe ga ayabu gangali li'ngi'ka kulikoni goti gatugalu'ba au gatugawasa kwo bu'kana na uweso wake wu'lu' waupanga kasi nkati yitu, 21 ywembe alumbilwe mulikanisa na mu Kilisitu Yesu kwa lubelekwo lwoti, milele na milele. Amina.