1 Nimmakianga panga, ntu'pu' kitumbu sa kumwandikyanga bu'kana na kwayangatia kwinu aumini ba ku Yelusalemu. 2 Nitangite panga mupala yangatia. Naatikwilumba muno bu'kana na mwenga kwa bandu ba Makedonia. Naabakiye panga mwabandu ba Akaya mwaaibi'kite wiso piya bu'ka makaso. Na kilu'lu' sinu so piya saapangite bandu baingi pano bapende piya. 3 Naatuma alongo bo li'nga kwilumbiya kwitu bu'kana no piya kwinu kanekube mayi'gi'yo ga bule, ila mulaye panga kakape mwaibi'i wiso piya kati mwanaabakiye bandu ba Makedonia. 4 Manaitei naisa kwo na bandu ba Makedonia na kummona panga munaibi'kali wiso, apo mwalu'a tuisiya bu'kana na liu'bi'lyo litu kasinu. Kai' ata mwenga mwaaisika. 5 Kwa nyo niibweni panga yendapwaika alongo bangu' ba, balongoli isa kasinu li'nga babi'ke wiso ili'be yamwaalagi piya. Kwa nyo mwaapanga mupiyike kwo penda mwabene, kwenda kwo amuliswali.

6 Muku'mbu'ki panga ywapanda kisene aauna kisene, na ywapanda kiku'lu', aauna kiku'lu'. 7 Kila mundu apiye kwo bu'kana na mwaupendi mwoyo wake, kaneapiye kwo usunika wala kwo amuliswa, kwa mwanjaa Nnu'ngu' ampenda ywapiya kwa mwoyo wa pulaa. 8 Na Nnu'ngu' endakombwa kunnyalya pi'ta mwamupala, li'nga wakati woti mube na kila samupala, na mupange manogau gambone ga kwayangatia bi'ngi'. 9 Kati mwagabaya Maandiko Mapeleteu, "Aapiyike yambone kwa mwoyo wo penda, aapei aki'ba, aki yake yendakonda milele."

10 Nnu'ngu' ngaywampeya mpandi mbeyu na kilyo. Nyinyonyo aalu'a kumpeya mwenga mbeyu na kwiyongekeya, na kunnyongekeya mauno ga aki yinu. 11 Ywembe aalu'a kumpeya utayili mugoti li'nga, kila lisu'ba mube mwaanogamwoyo. Apo bandu nga pabaalu'a kunsukulu Nnu'ngu' kwa kitumbu sa ili'be yatwaalu'a kwapelekya bu'ka kasinu. 12 Kwa mwanjaa, lyengo li' lya unogamwoyo lyamulipanga lyayangatia aumini babapu'ngu'kilwe bai lili, ila lyapanga bandu baingi bansukulu muno Nnu'ngu'. 13 Baalu'a kunkwi'ya Nnu'ngu' kwa mwanjaa kasi yinu ilaya panga mwenga mwaatumisi annogau. Kai' bankwi'ya kwa kitumbu sa kwiyu'wa kwinu Abali Inannoga bu'kana na Yesu Kilisitu, na mwamubile na unogamwoyo wa kwayangatia bembe na bi'ngi' boti. 14 Nabembe bannu'bya kwa Nnu'ngu' kwa upendo nku'lu', kwa kitumbu sa ngu'ngu' ngu'lu' ya Nnu'ngu' yamupeyilwe. 15 Tunsukulu Nnu'ngu' kwa kitumbu sa upo yangalikombwa kwiawanikia.